କନକ ବ୍ୟୁରୋ : ରାଜ୍ୟସଭା ନିର୍ବାଚନ ପାଇଁ ବିଗୁଲ ବାଜିବା ପରେ ଏବେ ବିଜେଡି ଶିବିର ବେଶ ଚଳଚଞ୍ଚଳ । କାରଣ ଖାଲି ପଡୁଥିବା ଆସନ ଗୁଡିକ ପୁଣିଥରେ ବିଜେଡି ଖାତାକୁ ଆସିବା ଏକପ୍ରକାର ନିଶ୍ଚିତ ହୋଇସାରିଛି । ଆଉ ଏଭଳିସ୍ଥଳେ ଦିଲ୍ଲୀ ଯିବାକୁ ଆଶା ବାନ୍ଧିଥିବା ଦଳର କିଛି ନେତା ଏବେ ନିଜ ନିଜ ସ୍ତରରେ ଲବି ଆରମ୍ଭ କରିଛନ୍ତି । ଯେଉଁଥିରେ ଅନେକ ନୂଆ ମୁହଁ ଓ କିଛି ପୁରୁଣା ଚେହେରା ରହିଛନ୍ତି । ଆଉ ରାଜ୍ୟସଭା ଯିବାକୁ ଆଶାବାଦୀ ଥିବା ସେହିଭଳି ଜଣେ ଚେହେରା ହେଉଛନ୍ତି ବିଜେଡିର ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ବ୍ରହ୍ମପୁରର ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉପଟ୍ଟନାୟକ କହିଛନ୍ତି, ଗତ ୨୦୧୯ ନିର୍ବାଚନରେ ଟିକେଟ କଟିବା ପରେ ରାଜ୍ୟସଭା ପାଇଁ ପ୍ରତିଶ୍ରୁତି ମିଳିଥିଲା । ତେଣୁ ଏଥର ରାଜ୍ୟସଭା ପାଇଁ ଆଶା ରହିଛି । ମୁଖ୍ୟମନ୍ତ୍ରୀ ଯାହା କୁହନ୍ତି ତାହା କରନ୍ତି । ତେଣୁ ଯଦି ଏଥର ଚାହିଁବେ ତେବେ ରାଜ୍ୟସଭା ପଠାଇବେ ।
ଏହାଛଡା ମୁଖ୍ୟମନ୍ତ୍ରୀ ଯେଉଁ ଦାୟିତ୍ୱ ଦେଇଛନ୍ତି ତାକୁ ସୂଚାରୁ ରୂପେ ତୁଲାଉଛି । ବିଜେଡି ଜିଲ୍ଲା ସଭାପତି ଭାବେ କାର୍ଯ୍ୟ କରୁଛି । ବୟସ ଅଧିକ ହେଲେ ବି ମୁଁ ସବୁକିଛି କରିପାରୁଛି ଓ କରିପାରିବି । ସେ ମନୋବଳ ମୋର ରହିଛି । ଯଦି ବିଜେଡି ସୁପ୍ରିମୋ ମୋତେ ରାଜ୍ୟସଭା ପଠାନ୍ତି ତେବେ ରାଜ୍ୟର ଯାହା ସ୍ୱାର୍ଥ ଅଛି ତାହାକୁ ଉପସ୍ଥାପନ କରିବି । ଲୋକଙ୍କ ସେବା କରିବି ।
ରାଜ୍ୟସଭା ରେସରେ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କ ନାଁକୁ ନେଇ ସବୁଠୁ ଅଧିକ ଚର୍ଚ୍ଚା ହେବା ପଛର କାରଣ ହେଲା ପୌର ନିର୍ବାଚନରେ ଗଞ୍ଜାମରେ ବିଜେଡିକୁ ମିଳିଥିବା ସଫଳତା । ଜିଲ୍ଲା ବିଜେଡିର ସଭାପତି ଭାବେ ରମେଶଙ୍କ ଗୋଟିଚାଳନାରେ ବିଜେଡି ଭଲ ପ୍ରଦର୍ଶନ କରିଥିଲା । ତେଣୁ ଦଳ ତାଙ୍କୁ ପୁରସ୍କାର ସ୍ୱରୂପ ଦିଲ୍ଲୀ ପଠାଇପାରେ ବୋଲି କୁହାଯାଉଛି ।