ପ୍ରଧାନମନ୍ତ୍ରୀ ମୋଦୀ ଓ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ରାକ୍ଷୀ ପଠାଇଲେ ସୀମା ହାଇଦର । ଭିଡିଓ ଜାରି କରି ପଠାଇଥିବା ରାକ୍ଷୀ ପିନ୍ଧିବାକୁ କଲେ ଅନୁରୋଧ

କନକ ବ୍ୟୁରୋ : ଆଗକୁ ଆସୁଛି ପବିତ୍ର ରାକ୍ଷୀ ପୂର୍ଣ୍ଣିମା । ଆଉ ଏହି ପର୍ବକୁ ପ୍ରତ୍ୟେକ ଭାଇ ଭଉଣୀ ଚାତକ ଭଳି ଚାହିଁବସିଥାନ୍ତି । ଯିଏ ଯେତେ ଦୂରରେ ଥାଉ ଭାଇ ପାଇଁ ରାକ୍ଷୀଟିଏ ପଠାଏ । ହାତରେ ରାକ୍ଷୀ ବାନ୍ଧି ନପାରିଲେ ମଧ୍ୟ ଭାଈ ପାଇଁ ପଠାଏ ସ୍ନେହର ରାକ୍ଷୀ । ତେବେ ଏହାରି ମଧ୍ୟରେ ପାକିସ୍ତାନରୁ ଆସିଥିବା ମହିଳା ସୀମା ହାଇଦର ମଧ୍ୟ ପଛରେ ପଡ଼ିନାହାନ୍ତି । ସୀମା ସ୍ୱତନ୍ତ୍ର ରାକ୍ଷୀ ପ୍ରସ୍ତୁତ କରିଛନ୍ତି ଆଉ ପଠାଇଛନ୍ତି । ତେବେ ସୀମା ଆଉ କାହାକୁ ନୁହେଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରାକ୍ଷୀ ପଠାଇଛନ୍ତି । କେବଳ ମୋଦୀଙ୍କୁ ନୁହେଁ, ଯୋଗୀ ଆଦିତ୍ୟନାଥ, ରାଜନାଥ ସିଂ, ଅମିତ ଶାହା ଓ ମୋହନ ଭଗବତ ସମେତ ବହୁ ପ୍ରମୁଖ ନେତାଙ୍କୁ ସୀମା ରାକ୍ଷୀ ପଠାଇଛନ୍ତି । ଯାହାର ଏକ ଭିଡ଼ିଓ ଜାରି କରି ଖୁବ ଖୁସି ଅଛନ୍ତି ସୀମା ।

ପ୍ରଧାନମନ୍ତ୍ରୀ ମୋଦୀ ଓ ଯୋଗୀଙ୍କ ସମେତ ବହୁ ନେତାଙ୍କୁ ନିଜେ ରାକ୍ଷୀ ପ୍ରସ୍ତୁତ କରି ପଠାଇଛନ୍ତି ସୀମା । ଭିଡ଼ିଓରେ ରାକ୍ଷୀ ପଠାଇଥିବା ନେଇ କହିବା ସହ ଦେଶର ଦାୟିତ୍ୱ ଏହି ପ୍ରମୁଖ ବ୍ୟକ୍ତିଙ୍କ କାନ୍ଧରେ ରହିଛି ବୋଲି କହିଛନ୍ତି । ରାକ୍ଷୀ ପୂର୍ଣ୍ଣିମା ଦିନ ଏହି ରାଖୀ ପହଁଚିଯିବା ନେଇ ସେ ଆଶା ରଖିଛନ୍ତି । ଜାରି କରିଥିବା ଭିଡ଼ିଓରେ ପ୍ରଥମରୁ ଜୟ ଶ୍ରୀରାମ କହି ଆରମ୍ଭ କରିଥିବାବେଳେ ଶେଷରେ ଜୟ ହିନ୍ଦୁସ୍ଥାନ ଜିନ୍ଦାବାଦ କହି ଶେଷ କରିଛନ୍ତି । ଏବଂ ଖୁବ ଖୁସିଥିବା କହିଛନ୍ତି ପାକିସ୍ତାନରୁ ଆସିଥିବା ପାକିସ୍ତାନୀ ମହିଳା ସୀମା ହାଇଦର ।