କନକ ବ୍ୟୁରୋ : ଟିକିରି ପରେ ଏବେ ଗାଜିପୁର ସୀମାରୁ ବ୍ୟାରିକେଡ ହଟାଇବା ଆରମ୍ଭ କରିଛି ଦିଲ୍ଲୀ ପୋଲିସ । ଆଉ ଏହାକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି କୃଷକ ନେତା ରାକେଶ ଟିକାୟତ । ବ୍ୟାରିକେଡ ହଟାଇବା ନିଷ୍ପତ୍ତିକୁ ସଠିକ କହିବା ସହ ଟିକାୟତ କହିଛନ୍ତି, ଏବେ ଫସଲ ବିକିବାକୁ ଚାଷୀ ସଂସଦକୁ ଯିବେ ।
Kanak News is now on WhatsApp
Join and get latest news updates delivered to you via WhatsApp
ଗାଜିପୁର ସୀମାରେ ଚାଲିଥିବା ଚାଷୀଙ୍କ ଧାରଣାସ୍ଥଳରୁ ବ୍ୟାରିକେଡ ହଟାଇବାକୁ ନେଇ ପୋଲିସ ଅଧିକାରୀ କହିଛନ୍ତି, ସରକାରଙ୍କ ନିର୍ଦ୍ଦେଶ ପରେ ବ୍ୟାରିକେଡକୁ ହଟାଇ ରାସ୍ତା ଖୋଲାଯାଉଛି । ବ୍ୟାରିକେଡ ହଟିବା ପରେ ଗାଜିଆବାଦ-ଦିଲ୍ଲୀ ରାସ୍ତା ଖୋଲିଯିବ । କୃଷି ଆଇନକୁ ପ୍ରତ୍ୟାହାର ଦାବିରେ ପାଖାପାଖି ବର୍ଷେ ହେବ ରାସ୍ତାରେ ଆନ୍ଦୋଳନ କରୁଛନ୍ତି ଚାଷୀ ।
ଅନ୍ୟପଟେ ଟିକାୟତ କହିଛନ୍ତି, ପ୍ରାୟ ୧୧ ମାସ ହେବ ଚାଷୀ ଧାରଣାରେ ବସିଛନ୍ତି । ବ୍ୟାରିକେଡ ହଟୁଛି ଠିକ୍ ଅଛି । ଏନେଇ ସଂଯୁକ୍ତ କୃଷକ ମୋର୍ଚ୍ଚା ସହ ଆଲୋଚନା ହେବ । ଯେବେ ରାସ୍ତା ଖୋଲିଯିବ ଚାଷୀ ସିଧା ଦିଲ୍ଲୀ ଯିବେ । ସେଠାକୁ ଯାଇ ସଂସଦରେ ଫସଲ ବିକିବେ । ଧାନ ଭର୍ତ୍ତି ଟ୍ରାକ୍ଟର ଧରି ଦିଲ୍ଲୀ ଯିବୁ । ଦେଖିବୁ କିଏ ଓ କେଉଁଠି ଅଟକାଇବ । ପ୍ରଧାନମନ୍ତ୍ରୀ କହିଥିଲେ ଚାଷୀ ଯେଉଁଠି ଚାହିଁବେ ଫସଲ ବିକି କରିପାରିବେ । ତେଣୁ ରାସ୍ତା ଖୋଲିବା ପରେ ଚାଷୀ ସିଧାସଳଖ ସଂସଦ ଯିବେ ଫସଲ ବିକିବାକୁ । ତେବେ ବ୍ୟାରିକେଡ ହଟାଇବାକୁ ନେଇ ଏଯାଏଁ ପୋଲିସଙ୍କ ସହ କୌଣସି ଆଲୋଚନା ହୋଇନାହିଁ । ଯେଉଁଦିନ ଟ୍ରାକ୍ଟର ଯିବା ପାଇଁ ରାସ୍ତା ଖୋଲିଯିବ, ସେଦିନ ଟ୍ରାକ୍ଟରରେ ଫସଲ ଭର୍ତ୍ତି କରି ବିକିବାକୁ ଦିଲ୍ଲୀ ଯିବୁ ।
ପ୍ରଦର୍ଶନ ପାଇଁ ରାସ୍ତା ବନ୍ଦ କରି ରଖିବା ଘଟଣାକୁ ନେଇ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଥିଲେ । ଲମ୍ବା ସମୟ ଧରି ଏଭଳି ରାସ୍ତାରୋକ କରି ରଖାଯାଇପାରିବ ନାହିଁ । କାରଣ ଏଥିପାଇଁ ସାଧାରଣ ଲୋକ ସମସ୍ୟାର ସମ୍ମୁଖୀନ ହେଉଛନ୍ତି । ତେବେ ଟିକାୟତ କହିଥିଲେ, ବ୍ୟାରିକେଡ ଲଗାଇ ପୋଲିସ ରାସ୍ତା ବନ୍ଦ କରିଛି, ଚାଷୀ ନୁହଁନ୍ତି । ଆଉ ଏହାପରେ ପୋଲିସ ବ୍ୟାରିକେଡ ହଟାଇବା ଆରମ୍ଭ କରିଛି ।