ହାସ୍ୟ ଅଭିନେତା ରାଜୁ ଶ୍ରୀବାସ୍ତବଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ : ଦିଲ୍ଲୀ ଏମ୍ସରେ ଚାଲିଛି ଚିକିତ୍ସା, ଡାକ୍ତର କହିଲେ …
କନକ ବ୍ୟୁରୋ : ଜୀବନ ଓ ମୃତ୍ୟୁ ମଧ୍ୟରେ ସଂଘର୍ଷ କରୁଛନ୍ତି ଦେଶର ଖ୍ୟାତନାମା କମେଡିଆନ୍ ରାଜୁ ଶ୍ରୀବାସ୍ତବ । ଦିଲ୍ଲୀ ଏମ୍ସରେ ସେ ଚିକିତ୍ସିତ ହେଉଛନ୍ତି । ତାଙ୍କର ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ଥିବା କହିଛନ୍ତି ଡାକ୍ତର । ଏବେ ତାଙ୍କୁ ଭେଣ୍ଟିଲେଟରରେ ରଖାଯାଇ ଚିକିତ୍ସା କରାଯାଉଛି । ହୃଦଘାତ ପରଠୁ ତାଙ୍କର ସଂଜ୍ଞା ଫେରିନାହିଁ । ହୃଦଘାତ ପରେ ତାଙ୍କର ମସ୍ତିସ୍କ ଆଘାତ ହୋଇଥିବା କହିଛନ୍ତି ଡାକ୍ତର । ବୁଧବାର ଜିମରେ ବ୍ୟାୟାମ କରୁଥିବା ବେଳେ ତାଙ୍କୁ ହୃଦଘାତ ହୋଇଥିଲା । ସୂଚନା ମିଳିଛି, ତାଙ୍କର ଆଂଜିଓପ୍ଲାଷ୍ଟି କରାଯାଇଛି । ହେଲେ ତାଙ୍କର ସ୍ୱାସ୍ଥ୍ୟାବସ୍ଥାରେ ବିଶେଷ ସୁଧାର ଆସିନାହିଁ । ଏମ୍ସର ଏକ ସ୍ୱତନ୍ତ୍ର ଡାକ୍ତରୀ ଟିମର ତତ୍ୱାବଧାନରେ ତାଙ୍କର ଚିକିତ୍ସା କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ରାଜୁ ଶ୍ରୀବାସ୍ତବ ରିୟାଲିଟି ଶୋ ‘ଦି ଗ୍ରେଟ୍ ଇଣ୍ଡିଆନ୍ ଲାଫ୍ ଚ୍ୟାଲେଞ୍ଜ’ର ପ୍ରଥମ ସିଜିନରୁ ଲୋକପ୍ରିୟତା ହାସଲ କରିଥିଲେ । ଏହା ପରେ ସେ ଅନେକ ଫିଲ୍ମରେ ଅଭିନୟ କରିଥିଲେ । ଏହି କ୍ରମରେ ସାମିଲ ଅଛି ‘ବାଜିଗର’, ‘ବମ୍ବେ ଟୁ ଗୋଆ’, ‘ଅମଦାନୀ ଅଠନ୍ନି ଖର୍ଚ୍ଚା ରୂପାୟା’ରେ ଅଭିନୟ କରିଥିଲେ । ଏହା ପରେ ରାଜୁ ଶ୍ରୀବାସ୍ତବଙ୍କୁ ‘ବିଗ୍ ବସ୍ ସିଜନ୍ ୩’ରେ ମଧ୍ୟ ଦେଖିବାକୁ ମିଳିଥିଲା । ୫୮ ବର୍ଷର ରାଜୁ ଶ୍ରୀବାସ୍ତବ ମଧ୍ୟ ଭାରତୀୟ ଜନତା ଦଳର ଜଣେ ନେତା । ବିଜେପିରେ ଯୋଗଦେବା ପୂର୍ବରୁ ସେ ସମାଜବାଦୀ ପାର୍ଟିରେ ମଧ୍ୟ ରହିଥିଲେ ।