କନକ ବ୍ୟୁରୋ: ରାଷ୍ଟ୍ରପତି ନିର୍ବାଚନ ପାଇଁ ରାଜନୀତି ଜୋର ଧରିଛି । ଉଭୟ ବିରୋଧୀ ଓ ବିଜେପି ଶିବର ଆରମ୍ଭ ହୋଇଯାଇଛି କସରତ । ଗୋଟିଏ ପଟେ ମମତା ବାନାର୍ଜ ୧୬ଟି ବିରୋଧୀ ଦଳର ନେତାଙ୍କୁ ନେଇ ମେଳି କରିଥିବା ବେଳେ ଅନ୍ୟପଟେ ସର୍ବସମ୍ମତ ପ୍ରାର୍ଥୀ ପାଇଁ ବିଜେପି ଉଦ୍ୟମ ଆରମ୍ଭ କରିଛି । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆଜି ସନ୍ଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଫୋନରେ କଥା ହୋଇଛନ୍ତି । ଏନଡିଏ ପ୍ରାର୍ଥୀଙ୍କୁ ସମର୍ଥନ କରିବା ପାଇଁ ଅନୁରୋଧ କରିଛନ୍ତି । ଅନ୍ୟ ବିରୋଧୀ ନେତାଙ୍କ ପାଖରେ ପହଂଚିବାକୁ ବି ଉଦ୍ୟମ ଆରମ୍ଭ କରିଛନ୍ତି ପ୍ରତିରକ୍ଷା ମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, କେବଳ ନବୀନ ନୁହଁନ୍ତି କଂଗ୍ରେସର ବରିଷ୍ଠ ନେତା ମଲ୍ଲିକାର୍ଜୁନ ଖଡଗେ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସହ ବି କଥା ହୋଇଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ରାଷ୍ଟ୍ରପତି ନିର୍ବାଚନରେ ସର୍ବସମ୍ମତ ପ୍ରାର୍ଥୀ ଚୟନ କରିବା ପାଇଁ ବିଜେପି ଦଳର ମୁଖ୍ୟ ଜେ.ପି.ନଡ୍ଡା ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଦାୟିତ୍ୱ ଦେଇଛି । ଏହାଛଡା ସେ ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ମୁଖ୍ୟ ନୀତିଶ କୁମାରଙ୍କ ସହ କଥା ହେଇଥିବା ଜଣାପଡିଛି । ପୂର୍ବରୁ ନବୀନ କହିଥିଲେ, ରାଷ୍ଟ୍ରପତି ପ୍ରାର୍ଥୀ ଦେଖି ନିଷ୍ପତି ନେବେ । ଭଲ ପ୍ରାର୍ଥୀଙ୍କୁ ସମର୍ଥନ କରିବେ । ତେବେ ଆଜି ବିରୋଧୀଙ୍କ ମେଳିରେ ସାମିଲ ନହେବା, ଆଉ ଏପଟେ ରାଜନାଥଙ୍କ ସହ କଥା ହେବା ଚର୍ଚ୍ଚାର ବିଷୟ ହୋଇଛି । ଏବଂ ନବୀନଙ୍କ ପରବର୍ତି ଆଭିମୁଖ୍ୟ ଉପରେ ସାରା ଦେଶର ନଜର ରହିଛି ।