ସଞ୍ଜୟ ଦତ୍ତଙ୍କ ବ୍ୟକ୍ତିତ୍ୱକୁ ଭଲ ଦେଖାଇବା ପାଇଁ ସିନେମା ସଞ୍ଜୁରେ କିଛିଟା ପରିବର୍ତ୍ତନ ଆଣିଥିଲେ ନିର୍ଦ୍ଦେଶକ !
ନିର୍ଦ୍ଦେଶକ ରାଜକୁମାର ହିରାନୀଙ୍କ ଫିଲ୍ମ ‘ସଞ୍ଜୁ’ ରିଲିଜ୍ ହେବା ପରେ ବକ୍ସ ଅଫିସରେ ୫୮୦ କୋଟିର ଆୟ କରିଥିଲା । ଫିଲ୍ମର ଆୟ ଜବରଦସ୍ତ ରହିଥିବା ବେଳେ ଫିଲ୍ମର ସ୍କ୍ରିପ୍ଟକୁ ନେଇ ଅନେକ ପ୍ରଶ୍ନ ଉଠିଥିଲା । ଫିଲ୍ମରେ ସଞ୍ଜୁ ବାବାଙ୍କ ଭାବମୂର୍ତ୍ତିକୁ ଭଲ ବୋଲି ଦେଖାଇବା ପାଇଁ ଚେଷ୍ଟା କରାଯାଇଛି ବୋଲି ଅନେକ ଲୋକ କହିଥିବା ବେଳେ ଏପରି ହୋଇ ନଥିବା କହି ଆସୁଥିଲେ ହିରାନୀ । କିନ୍ତୁ ଏବେ ସେ ପୂରା ସତ ସମସ୍ତଙ୍କ ସାମ୍ନାକୁ ଆଣିଛନ୍ତି । ଫିଲ୍ମରେ ସଞ୍ଜୁ ବାବାଙ୍କ ଭାବମୂର୍ତ୍ତିକୁ ବଦଳାଯାଇଛି ବୋଲି ସ୍ୱୀକାର କରିବା ସହ ଏପରି କ’ଣ ପାଇଁ କରିଥିଲେ ତାହା ବି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତାଙ୍କ କହିବା ଅନୁଯାୟୀ, ଫିଲ୍ମର ସୁଟିଂ କରୁଥିବା ବେଳେ ମୁଁ ଭୁଲ ଦିଗରେ ଯାଉଛି ବୋଲି ଅନୁଭବ କରିଥିଲି । ସୁଟିଂ ସରିବା ପରେ ମୁଁ ଏହାକୁ କିଛି ଲୋକଙ୍କୁ ଦେଖାଇବା ପରେ ସେମାନେ ଫିଲ୍ମକୁ ପସନ୍ଦ କରି ନଥିଲେ । ଆମେ ଫିଲ୍ମରେ ଏହି ଚରିତ୍ରକୁ ଦେଖିବାକୁ ପସନ୍ଦ କରିବୁ ନାହିଁ ବୋଲି କହିଥିଲେ । ପ୍ରଥମେ ମୁଁ ସବୁ ସତ ଘଟଣା ଦେଖାଇବା ପାଇଁ ଭାବୁଥିଲି । କୌଣସି ପ୍ରକାରର ସହାନୁଭୂତି ପ୍ରକାଶ କରିବି ନାହିଁ ଭାବୁଥିବା ବେଳେ କିଛି ଲୋକ ଫିଲ୍ମରେ ସଞ୍ଜୁଙ୍କ ଚରିତ୍ର ପସନ୍ଦ କରୁ ନଥିବା ଦେଖି ମୁଁ ପରିବର୍ତ୍ତନ ଆଣିବା କଥା ଭାବିଥିଲି । ଯାହା ପରେ ମୁଁ ଫିଲ୍ମର କିଛି ଭାଗକୁ ଆଉ ଥରେ ସୁଟିଂ କରାଇଥିଲି । କୋର୍ଟର ରାୟ ଆସିବା ପରେ ସଞ୍ଜୁ ନିଜକୁ ମାରିବା ପାଇଁ ଚେଷ୍ଟା କରିଥିଲେ । କିନ୍ତୁ ଆମେ ତାହାକୁ ପ୍ରଥମେ ଦେଖାଇ ନ ଥିଲୁ । ପରେ ଦର୍ଶକଙ୍କ ସହାନୁଭୂତି ପାଇଁ ସଞ୍ଜୁଙ୍କ ଆତ୍ମହତ୍ୟା ଉଦ୍ୟମ ଦୃଶ୍ୟକୁ ସୁଟ୍ କରାଯାଇଥିଲା ବୋଲି ସେ ସ୍ୱୀକାର କରିଛନ୍ତି ।