ବିଜେଡିରେ ଯୋଗଦେଲେ , ବିଜେପି ନେତାଙ୍କ ଉପରେ ମନଇଚ୍ଛା ବର୍ଷିଲେ ରାଜକିଶୋର । କହିଲେ, ଯାହାର ୱାର୍ଡମେମ୍ବର ଜିତିବାର ଯୋଗ୍ୟତା ନାହିଁ, ସେ ମୁଖ୍ୟମନ୍ତ୍ରୀ ହେବାକୁ ସ୍ୱପ୍ନ ଦେଖୁଛନ୍ତି
କନକ ବ୍ୟୁରୋ : ବିଜେଡିରେ ଯୋଗ ଦେଉ ଦେଉ ବିଜେପି ଉପରେ ବର୍ଷିଲେ ରାଜକିଶୋର ଦାସ । ଦଳ ଅଣଦେଖା କରୁଥିବା ଅଭିଯୋଗ ଆଣି ରାଜ୍ୟ ବିଜେପି ଉପସଭାପତି ପଦରୁ ଗତକାଲି ଇସ୍ତଫା ଦେଇଥିବା ରାଜକିଶୋର ଆଜି ଶଙ୍ଖ ଶିବିରରେ ଏଣ୍ଟ୍ରି ମାରିଛନ୍ତି । ଆଉ ବିଜେଡିରେ ଯୋଗ ଦେବା ପରେ ଧର୍ମେନ୍ଦ୍ରଙ୍କ ଉପରେ ବର୍ଷିଛନ୍ତି ରାଜକିଶୋର । ମୟୂରଭଞ୍ଜରେ ଦୀର୍ଘ ୪୦ ବର୍ଷ ଧରି ବିଜେପିରେ ଥିବା ରାଜକିଶୋର ଦଳ ଛାଡିବା ସହ ବଡ ଅଭିଯୋଗ ଆଣିଛନ୍ତି । ବିଜେପି ମୋତେ ଅପମାନିତ କରିବା ସହ ଅତ୍ୟାଚାର କରିଛି । ଯାହାକୁ ଭଗବାନ କେବେ କ୍ଷମା କରିବେନି ।
Kanak News is now on WhatsApp
Join and get latest news updates delivered to you via WhatsApp
ମୟୂରଭଞ୍ଜକୁ ନେଇ ବିଜେପି ଯେଉଁ ଗର୍ବ କରୁଥିଲା ଆଗାମୀ ଦିନରେ ସେଠାରେ ବିଜେପି ଶୂନ ହୋଇଯିବ ବୋଲି ଦମ୍ଭ ଦେଖାଇ କହିଛନ୍ତି ରାଜକିଶୋର । ଏହାଛଡା ନିଜ ଭାଷଣରେ ଧର୍ମେନ୍ଦ୍ରଙ୍କୁ ବୁଲେଇ ବଙ୍କେଇ ଟାର୍ଗେଟ କରିଛନ୍ତି ରାଜକିଶୋର । ବିଜେପି ନେତାଙ୍କୁ ଆହ୍ୱାନ ଦେଇ ରାଜକିଶୋର କହିଛନ୍ତି, ଯେଉଁ ବ୍ୟକ୍ତି ମୁଖ୍ୟମନ୍ତ୍ରୀ ହେବାକୁ ସ୍ୱପ୍ନ ଦେଖୁଛନ୍ତି ଯଦି ସତସାହସ ଅଛି ତେବେ ମୋରଡାରୁ ମୋ ସହ ଲଢିକି ଜିତନ୍ତୁ ତାହା ପରେ ଓଡିଶାର ନେତୃତ୍ୱ ନେବାକୁ ଚିନ୍ତା କରିବେ । ଯାହାର ୱାର୍ଡମେମ୍ବର ଜିତିବାର ଯୋଗ୍ୟତା ନାହିଁ ସିଏ ମୁଖ୍ୟମନ୍ତ୍ରୀ ହେବାକୁ ସ୍ୱପ୍ନ ଦେଖୁଛନ୍ତି । କିନ୍ତୁ ଏହି ସ୍ୱପ୍ନ କେବେ ପୂରଣ ହେବ ନାହିଁ । ଏହି ଔରଙ୍ଗଜେବଙ୍କୁ ଓଡିଶାରେ ରାଜନୈତିକ କବର ଦେବା ବୋଲି କହିଛନ୍ତି ରାଜକିଶୋର ।
ଧର୍ମେନ୍ଦ୍ରଙ୍କୁ ବୁଲେଇ ବଙ୍କେଇ ଟାର୍ଗେଟ କରିଥିବା ବେଳେ ନବୀନଙ୍କୁ ପ୍ରଂଶସାରେ ପୋତି ପକାଇଛନ୍ତି ରାଜକିଶୋର । ଗୋଟିଏ ପଟେ ଦୀର୍ଘ ୪୦ ବର୍ଷ ଧରି ବିଜେପିରେ ଥିଲେ ମଧ୍ୟ ମୋତେ ଅତ୍ୟାଚାର ଓ ଅପମାନ କରାଯିବା ସହ ହତ୍ୟା କରିବାକୁ ଉଦ୍ୟମ କରାଯାଇଥିଲା । ଆଉ ସେଭଳି ସମୟରେ ବିଜେଡି ମୋତେ ସୁରକ୍ଷା ଦେବା ସହ ନିଜ ଦଳରେ ସାମିଲ କରିଥିବାରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ରାଜକିଶୋର । ଏହାଛଡା ନବୀନଙ୍କ ସମୟରେ ରାଜ୍ୟରେ ଦ୍ରୁତ ବିକାଶ ହୋଇଛି । ଯେଉଁଥିପାଇଁ ଆଗାମୀ ନିର୍ବାଚନରେ ବିଜେଡି ୨୧ ଲୋକସଭା ଓ ୧୪୭ ବିଧାନସଭା ଆସନରେ ବିଜୟୀ ହେବ ବୋଲି ଦମ୍ଭ ଦେଖାଇଛନ୍ତି ରାଜକିଶୋର । ଏହାଛଡା ଆଗାମୀ ନିର୍ବାଚନରେ ଦଳ ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିବ ବୋଲି ଜୋର ଦେଇ କହିଛନ୍ତି ରାଜକିଶୋର ।