କନକ ବ୍ୟୁରୋ: ଆଜିକା ଦିନରେ ଆଗ ଧାଡିର କଳାକାର ରାଜ କୁମାର ରାଓ । ଗୁରଗାଓଁର ୩୬ ବର୍ଷିୟ ରାଜ କୁମାର ବଲିଉଡରେ ଜାଗା ବନାଇବା ପାଇଁ ଅନେକ କଷ୍ଟ ସହିଛନ୍ତି । ବଲିଉଡରେ ତାଙ୍କର କେହି ପରିଚିତ ନଥିଲେ । ଆକ୍ଟିଂ ଲକ୍ଷ୍ୟରେ ମୁମ୍ବାଇ ଆସିଥିବା ରାଜ କୁମାରଙ୍କୁ କୌଣସି ଛୋଟ ବିଜ୍ଞାପନ ସୁଟିଂ ପାଇଁ ମଧ୍ୟ ଘଣ୍ଟା ଘଣ୍ଟା ଛିଡା ହେବାକୁ ପଡୁଥିଲା । ମାସକୁ ୮ରୁ ୧୦ ଟଙ୍କା ରୋଜଗାର କରିବା ମଧ୍ୟ ତାଙ୍କ ପାଇଁ କାଠିକର ପାଠ ଥିଲା । ଏପରି ପ୍ରତିକୂଳ ପରିସ୍ଥିତି ଥିଲା ଯେ ମୁମ୍ବାଇ ଭଳି ଚାକଚକ୍ୟ ସହରରେ ମିଲଟିଏ ଖାଇବା ମଧ୍ୟ ତାଙ୍କ ପାଇଁ କଷ୍ଟକର ହେଉଥିଲା । ଏଠାରେ ଥିବା କିଛି ଚିହ୍ନା ଲୋକଙ୍କୁ ଫୋନ କରି ତାଙ୍କ ଘରେ ନିଜ ପାଇଁ ଖାଇବାର ଟିକେ ବନ୍ଦୋବସ୍ତ କରିବାକୁ ଅନୁରୋଧ କରୁଥିଲେ । ପେଟରେ ଭୋକ ଥିବାରୁ ମୁହଁର ଲାଜକୁ ସେ ଭୁଲିଯାଉଥିଲେ ବୋଲି ସେ ଏକ ସାକ୍ଷାତକାରରେ କହିଛନ୍ତି ।ହେଲେ ତାଙ୍କ କଷ୍ଟ ଓ ପରିଶ୍ରମର ପାଉଣା ଦେଇଛନ୍ତି ଭଗବାନ୍ । ଆଜି ସେ ନିଜ ଦମରେ ଆଗ ଧାଡିର ଜଣେ ଲୋକପ୍ରିୟ କଳାକାର । ଏଥିପାଇଁ ସେ ଶାହାରୁଖ ଖାନଙ୍କୁ ନିଜ ଆଦର୍ଶ ବୋଲି ଗ୍ରହଣ କରିଛନ୍ତି । ଅଭିନୟର ପ୍ରାରମ୍ଭିକ ଦିନରେ ଶାହାରୁଖଙ୍କ ଅସହାୟତା ଓ ପ୍ରତିକୂଳ ସ୍ଥିତିକୁ ସେ ମନେପକାଇ ମୁମ୍ବାଇରେ ତିଷ୍ଠି ରହି ପରିଶ୍ରମ କରିବାକୁ ପଣ କରିଥିବା କହିଛନ୍ତି । ପ୍ରକୃତରେ ଶାହାରୁଖ କିଙ୍ଗ ଖାନ୍ ବୋଲି ତାଙ୍କର ମତ । ଅଭିନୟର ଆରମ୍ଭ ସମୟରେ ଏକ କାର୍ଯ୍ୟକ୍ରମରେ ଶାହାରୁଖଙ୍କ ସହ ତାଙ୍କ ଭେଟ ହୋଇଥିଲା । କିଙ୍ଗ ଖାନ୍ ତାଙ୍କ ଅଭିନୟର ଖୁବ ପ୍ରଶଂସା କରିଥିଲେ । ଆଉ ଏ ଖରାପ ସମୟ ଦିନେ ନିଶ୍ଚୟ ଦୂରେଇ ଭଲ ସମୟ ଆସିବ ବୋଲି କହି ଶାହାରୁଖ୍ ତାଙ୍କୁ ଆଶ୍ୱାସନା ଦେଇଥିଲେ । ଆଜି ରାଜ କୁମାରଙ୍କ ପାଖରେ ପ୍ରସିଦ୍ଧି , ଧନ ସବୁ ଅଛି । ହେଲେ ,ସବୁ ଭିତରେ ବି ସେ ନିଜ ଅସମୟର ସାଥୀଙ୍କୁ ଭୁଲିନାହାଁନ୍ତି । ଅନେକ ସମୟରେ ତାଙ୍କୁ ଫୋନ କରି ନିଜ ଘରକୁ ଡାକନ୍ତି । ଆଉ ସାମାନ୍ୟ ଫୁରସତ୍ ପାଇଲେ ସେମାନଙ୍କ ସହ ସମୟ ବିତାଇବାକୁ ଭଲ ପାଆନ୍ତି ବୋଲି ପ୍ରକାଶ କରିଛନ୍ତି ରାଜ କୁମାର ରାଓ ।
Kanak News is now on WhatsApp
Join and get latest news updates delivered to you via WhatsApp
୨୦୧୩ରେ କାଇ ପୋ ଚେ ଫିଲ୍ମରେ ଅଭିନୟ ପାଇଁ ତାଙ୍କୁ ବେଷ୍ଟ ଫିଲ୍ମ ଫେୟାର ଆୱାର୍ଡ ମିଳିବା ସହ ସହିଦ ଫିଲ୍ମରେ ସହିଦ୍ ଆଜମି ଚରିତ୍ର ପାଇଁ ତାଙ୍କୁ ବେଷ୍ଟ ଆକ୍ଟର ଆୱାର୍ଡ ମିଳିଥିଲା ।