ଯାତ୍ରୀଙ୍କ ପାଇଁ ଭାରତୀୟ ରେଳବାଇର ବଡ ଯୋଜନା ! ଏଣିକି ଜେନେରାଲ ବଗିରେ ମିଳିବ ରିଜର୍ଭେସନ୍ ଟିକେଟ୍, ଜାଣନ୍ତୁ ବୁକିଂ ପ୍ରକ୍ରିୟା ।
କନକ ବ୍ୟୁରୋ : ଯାତ୍ରୀମାନଙ୍କ ସୁବିଧା ପାଇଁ ବଡ ପଦକ୍ଷେପ ନେଇଛି ଭାରତୀୟ ରେଳବାଇ । ଏଣିକି ସାଧାରଣ ବଗିରେ ଯାତ୍ରା କରୁଥିବା ଯାତ୍ରୀମାନଙ୍କୁ ମଧ୍ୟ କନଫର୍ମ ଟିକେଟ୍ ମିଳିବ । ସାଧାରଣତଃ ରେଲୱେ ଷ୍ଟେସନରେ ସିଟ୍ ପାଇଁ କିଭଳି ସ୍ଥିତି ସୃଷ୍ଟି ହୋଇଥାଏ, ତାହା ତ ଆପଣ କେବେ ନା କେବେ ଅନୁଭବ କରିଥିବେ । ବିଶେଷ କରି ଯଦି ଆପଣ ସାଧାରଣ ବଗିରେ ଯାତ୍ରା କରିବାର ଅଛି, ତେବେ ଆପଣଙ୍କ ଟ୍ରେନ ସମୟରେ ଅନେକ ଘଣ୍ଟା ପୂର୍ବରୁ ପ୍ଲାଟଫର୍ମରେ ଅପେକ୍ଷା କରିବାକୁ ପଡେ ଏବଂ ସିଟ୍ ପାଇଁ ନାହିଁନଥିବା ଅସୁବିଧାର ମଧ୍ୟ ସମ୍ମୁଖୀନ ହେବାକୁ ପଡେ । ଅନେକ ସମୟରେ ସିଟ୍ ମଧ୍ୟ ମିଳିନଥାଏ ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ଭାରତୀୟ ରେଳବାଇର ଏହି ନୂଆ ପଦକ୍ଷେପ ଅନୁଯାୟୀ, ଆପଣଙ୍କ ସିଟର ନମ୍ବର, ଆପଣଙ୍କ ଫଟୋ ସମେତ ଆପଣଙ୍କ ହ୍ୱାଟ୍ସଆପ୍ ନମ୍ବରକୁ ଚାଲିଯିବ । ଏପରି ହେବା ଦ୍ୱାରା ରେଲୱେ ଷ୍ଟେସନରେ ଆଉ ଆପଣଙ୍କୁ ଘଂଟା ଘଂଟା ଧରି ଅପେକ୍ଷା କରିବାକୁ ପଡିବ ନାହିଁ । ଆଉ ସବୁଠାରୁ ବଡ କଥା ହେଉଛି ସିଟକୁ ନେଇ ଆପଣଙ୍କୁ ଆଉ କୌଣସି ପ୍ରକାର ଚିନ୍ତା ବି କରିବାକୁ ପଡିବନାହିଁ ।
ତେବେ ଏହି ଯୋଜନାର ଆରମ୍ଭ, ପୂର୍ବ-ମଧ୍ୟ ରେଳବାଇର ଦାନାପୁର ମଣ୍ଡଳରେ ପାଇଲଟ୍ ପ୍ରୋଜେକ୍ଟ ରୂପରେ କରାଯାଇଛି । ଏବଂ ପରବର୍ତୀ ସମୟରେ ଏହି ଯୋଜନାକୁ ସାରା ଦେଶରେ ଲାଗୁ କରିବା ନେଇ କାର୍ଯ୍ୟ କରୁଛି ଭାରତୀୟ ରେଳବାଇ । ଏହି ଯୋଜନା ଅନୁଯାୟୀ, ଜେନେରାଲ ବଗିରେ ଅଣସଂରକ୍ଷିତ ସିଟରେ ମଧ୍ୟ ଆପଣଙ୍କୁ କନଫର୍ମ ସିଟ୍ ମିଳିପାରିବ । ତେବେ ଆସନ୍ତୁ ଜାଣିବା କେମିତି ଏହି ଟିକେଟ୍ ଆପଣ ପାଇପାରିବେ ।
ଏହି ଟିକେଟକୁ ନେବା ପାଇଁ ଯେତେବେଳେ ଆପଣ ଟ୍ରେନ୍ ପାଇଁ ରେଲୱେ କାଉଂଟରରୁ ଟିକେଟ୍ ନେବେ, ସେଠାରେ ପାସ୍ ଫର୍ ଅନରିଜର୍ଭଡ ବୋର୍ଡ ନାମରେ ଅନ୍ୟ ଏକ କାଉଂଟର ରହିଥିବ । ଆଉ ସେଠାରେ ଆପଣ ନିଜର ପରିଚୟ ପତ୍ର ଦେଖାଇବା ପରେ ଆପଣଙ୍କର ଏକ ଫଟୋ ଉଠାଯିବ । ଏହା ପରେ ଆପଣଙ୍କ ହ୍ୱାଟ୍ସଆପ୍ ନମ୍ବରରେ ଆପଣଙ୍କୁ ଡିଜିଟାଲ୍ ଟିକେଟ୍ ପଠାଇବ ଭାରତୀୟ ରେଳବାଇ । ଯେଉଁଥିରେ ଆପଣଙ୍କ ସିଟ୍ ନମ୍ବର ସମେତ ଆପଣଙ୍କ ଫଟୋ ମଧ୍ୟ ରହିଥିବ । ଆଉ ଏପରି ହେବା ଦ୍ୱାରା ଆପଣଙ୍କୁ ସିଟ୍ ପାଇଁ ନା କୌଣସି ଚିନ୍ତା ରହିଥିବ ନା ଷ୍ଟେସନରେ ଆଉ ଘଂଟା ଘଂଟା ଧରି ଅପେକ୍ଷା କରିବାକୁ ପଡିବ ।