ଝାରସୁଗୁଡାରେ ପ୍ରଧାନମନ୍ତ୍ରୀଙ୍କୁ ରାହୁଲଙ୍କ ଟାର୍ଗେଟ: ଭାରତ ଯୋଡ ନ୍ୟାୟ ଯାତ୍ରାରେ କହିଲେ, ଓବିସି ନୁହନ୍ତି ନରେନ୍ଦ୍ର ମୋଦୀ, ସାଧାରଣ ବର୍ଗରେ ହୋଇଛନ୍ତି ଜନ୍ମ
କନକ ବ୍ୟୁରୋ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜାତି କଣ । ମୋଦୀ ନିଜକୁ ଓବିସି ବୋଲି କହୁଥିବା ବେଳେ ଏହାକୁ ଗ୍ରହଣ କରିବାରୁ ନାରାଜ ରାହୁଲ ଗାନ୍ଧୀ । ନିଜ ଯୁକ୍ତିକୁ ବଳ ଦେବା ପାଇଁ ମୋଦୀ କେବେ ଚାଷୀ ଏବଂ ଓବିସିଙ୍କୁ ଭେଟି ନଥିବା ଅଭିଯୋଗ କରିଛନ୍ତି । ଏପରି କି ସେ କୋଟିପତିଙ୍କ ସହ ରୁହନ୍ତି ବୋଲି କହିବାକୁ ପଛାଇ ନାହାନ୍ତି ରାହୁଲ । ହେଲେ ପ୍ରଧାନମନ୍ତ୍ରୀଙ୍କୁ ନେଇ ରାହୁଲଙ୍କ ଏଭଳି ଟିପ୍ପଣୀକୁ ନାପସନ୍ଦ କରିଛନ୍ତି ଉଭୟ ବିଜେପି ଓ ବିଜେଡି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାରେ ଭାରତ ଯୋଡ ନ୍ୟାୟ ଯାତ୍ରା କରିବା ଅବସରରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରି ଏଭଳି ଅଭିଯୋଗ ଆଣିଛନ୍ତି କଂଗ୍ରେସର ସବୁଠୁ ବଡ ନେତା ରାହୁଲ ଗାନ୍ଧୀ । ପ୍ରଧାନମନ୍ତ୍ରୀ ସାଧାରଣ ବର୍ଗରେ ଜନ୍ମ ହୋଇଥିବା ଜନସଭାକୁ ସମ୍ବୋଧନ କରି କହିଛନ୍ତି ରାହୁଲ । କଟାକ୍ଷ କରି ରାହୁଲ କହିଛନ୍ତି, ପ୍ରଧାନମନ୍ତ୍ରୀ କୌଣସି ଓବିସି ଲୋକଙ୍କୁ ଭେଟନ୍ତି ନାହିଁ । କୌଣସି ଚାଷୀଙ୍କୁ ମଧ୍ୟ ଭେଟନ୍ତି ନାହିଁ । ତେବେ ରାହୁଲ ଗାନ୍ଧୀଙ୍କ ଏଭଳି ଟିପ୍ପଣୀକୁ ନାପସନ୍ଦ କରିଛନ୍ତି ବିଜେପି ଓ ବିଜେଡି ନେତା ।
ଓଡିଶାରେ ରାହୁଲ ଗାନ୍ଧୀଙ୍କ ଭାରତ ଯୋଡୋ ନ୍ୟାୟ ଯାତ୍ରାର ତୃତୀୟ ଦିନରେ, ଝାରସୁଗୁଡା ପୁରୁଣା ବସଷ୍ଟାଣ୍ଡରୁ ଆରମ୍ଭ କରିଥିଲେ ଯାତ୍ରା । ଏହି ସମୟରେ ଲୋକଙ୍କ ସହ ହାତ ମିଳାଇଥିଲେ । ଅଟୋଗ୍ରାଫ ଦେଇଥିଲେ । ଚକୋଲେଟ୍ ବାଂଟିଥିଲେ । ଜଣେ ଛାତ୍ରୀକୁ ଗାଡି ଉପରେ ବସାଇଥିଲେ । ଏପରିକି ଜିଲ୍ଳାପାଳ କାର୍ଯ୍ୟାଳୟରେ ନିଯୁକ୍ତି ଦାବିରେ ଆନ୍ଦୋଳନ ଚଳାଇଥିବା ଯୁବକଙ୍କୁ ଭେଟି ସେମାନଙ୍କ ସହ ଆଲୋଚନା କରିଥିଲେ । ସେମାନଙ୍କ ଦାବି ସମ୍ପର୍କରେ ପଚାରି ବୁଝିଥିଲେ ।
ରାହୁଲ ଗାନ୍ଧୀଙ୍କ ସହ ଯାତ୍ରାରେ ସାମିଲ ହୋଇଥିଲେ ବରିଷ୍ଠ କଂଗ୍ରେସ ନେତା ଜୟରାମ ରମେଶ, ପିସିସି ପ୍ରଭାରୀ ଅଜୟ କୁମାର ଓ ପିସିସି ସଭାପତି ଶରତ ପଟ୍ଟନାୟକଙ୍କ ସମେତ ବହୁ ସଂଖ୍ୟାରେ ନେତା । ଆଉ ରାହୁଲଙ୍କ ଏହି ଗସ୍ତ ଦଳ ପାଇଁ ଆଗକୁ ସଞ୍ଜିବନି ହେବ ବୋଲି କହିଛନ୍ତି । ଓଡିଶା ପରେ ଛତିଶଗଡରେ ପହଁଚିଛି ରାହୁଲଙ୍କ ନ୍ୟାୟ ଯାତ୍ରା ।