୧୩ ଘଣ୍ଟାରେ ରାହୁଲ ଚାଲିଲେ ୪୬, ୪୩୩ ପାଦ ! ଜାଣନ୍ତୁ କଂଗ୍ରେସ ଅଧ୍ୟକ୍ଷଙ୍କ ମାନସରୋବର ଯାତ୍ରାର ଭିତିରି କଥା ।
କଂଗ୍ରେସ ପକ୍ଷରୁ ଅଫିସିଆଲ ଟ୍ୱିଟର ପେଜରେ ଏକ ଫଟୋ ଜାରି କରାଯାଇଛି । ଆଉ ଏହି ଫଟୋର ମଝିରେ ଅଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି, ବାମ ପଟରେ ସହଯାତ୍ରୀ ମିହିର ପଟେଲ ଏବଂ ଡାହାଣ ପଟରେ ଅଛନ୍ତି ଅନ୍ୟଜଣେ ସହଯାତ୍ରୀ କେନନ୍ ପଟେଲ । ରାହୁଲ ଗାନ୍ଧିଙ୍କ କୈଳାସ ମାନସରୋବର ଯାତ୍ରା ସମୟର ଏକ ଫଟୋ ଜାରି କରି ବିଜେପି ଉଠାଉଥିବା ପ୍ରଶ୍ନର ଉତ୍ତର ଦେଶବାସୀଙ୍କ ଆଗରେ ରଖିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଜଣେ ଶ୍ରଦ୍ଧାଳୁ ଭାବେ ଶିବଙ୍କ ଦର୍ଶନରେ ବାହାରିଥିବା ରାହୁଲ ଗାନ୍ଧିଙ୍କ ଯାତ୍ରାକୁ ନେଇ ବଡଧରଣର ରାଜନୀତି ଆରମ୍ଭ ହୋଇଯାଇଛି । କାରଣ ରାହୁଲଙ୍କ ଗସ୍ତର ସତ୍ୟତା ନେଇ ପ୍ରଶ୍ନ ଉଠାଉଛି ବିଜେପି । ଆଉ ରାହୁଲଙ୍କ କୈଳାସ ଯାତ୍ରାର ପ୍ରମାଣ ଦେବା ପାଇଁ ତାଙ୍କ ଫଟୋ ସହ ଯାତ୍ରାର ତଥ୍ୟ ରଖିଛି କଂଗ୍ରେସ । ଦଳ ପକ୍ଷରୁ ଟ୍ୱିଟରରେ ଜାରି କରାଯାଇଥିବା ଫିଟବିଟ୍ ରେକର୍ଡ କହୁଛି, ରାହୁଲଙ୍କ ଯାତ୍ରାର ରେକର୍ଡ ।
ରାହୁଲଙ୍କ ଯାତ୍ରାର ରେକର୍ଡ
– ୩୪.୩୧ କିଲୋମିଟର ପାଦରେ ଚାଲି ଅତିକ୍ରମ କରିଛନ୍ତି
– ଗୋଟିଏ ଦିନରେ ୪୬, ୪୩୩ ପାଦ ଚାଲିଛନ୍ତି ରାହୁଲ
– ଏଥିପାଇଁ ତାଙ୍କୁ ୪୬୩ ମିନିଟ୍ ସମୟ ଲାଗିଥିଲା
– ଗେଟିଏ ଦିନରେ ୪୪୬୬ କ୍ୟାଲୋରି କମ୍ କରିଛନ୍ତି
ତେବେ କଥା ହେଉଛି ଗତ ଅଗଷ୍ଟ ୩୧ ତାରିଖରୁ କୈଳାସ ମାନସରୋବର ଅଭିମୁଖେ ଯାତ୍ରା ଆରମ୍ଭ କରିଥିଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ଯାତ୍ରା ଆରମ୍ଭ କରିବା ପରେ ବିଭିନ୍ନ ବେସ କ୍ୟାମ୍ପରୁ ଫଟୋସବୁ ଟ୍ୱିଟ୍ କରିଥିଲେ । ହେଲେ କୌଣସି ଫଟୋରେ ସେ ନିଜେ ନଥିବାରୁ ଏହାକୁ ନେଇ ପ୍ରଶ୍ନ ଉଠାଇଥିଲେ ଟ୍ୱିଟର ବ୍ୟବହାରକାରୀ । ଏପରିକି ଇଣ୍ଟରନେଟରୁ ଫଟୋ ଡାଉନଲୋଡ କରି ସୋସିଆଲ ମିଡିଆରେ ପୋଷ୍ଟ କରୁଥିବା କମେଂଟ ମଧ୍ୟ କରାଗଲା । ବିଜେପି ଓ ଏହାର ସମର୍ଥକଙ୍କ ଦ୍ୱାରା ରାହୁଲଙ୍କ ଉପରେ ହେଲା ଜୋରଦାର ଆକ୍ରମଣ ।
ଆଉ ଏହାରି ମଧ୍ୟରେ ସୋସିଆଲ ମିଡିଆରେ ରାହୁଲ କରିଛନ୍ତି ଏକ ପୋଷ୍ଟ । ମାନସରୋବର ହ୍ରଦର ଦୁଇଟି ଫଟୋ ସହ କଂଗ୍ରେସ ଅଧ୍ୟକ୍ଷ ଲେଖିଛନ୍ତି ‘ମାନସରୋବର ହ୍ରଦର ପାଣି ଶାନ୍ତ, ସ୍ଥିର ଏବଂ କୋମଳ । ଏହି ହ୍ରଦର ପାଣି ସବୁକିଛି ଦେଇଦିଏ କିନ୍ତୁ କିଛି ନିଏ ନାହିଁ । ଏହାକୁ ଯେକେହି ଗ୍ରହଣ କରିପାରିବେ । ଏଠି କୌଣସି ଘୃଣା ନାହିଁ । ସେଥିପାଇଁ ଭାରତରେ ଏହି ପାଣିକୁ ପୂଜା କରାଯାଏ ।’ ଏଭଳି ଏକ ପୋଷ୍ଟ କରି ବିଜେପି ଉପରେ ରାଜନୈତିକ ଆକ୍ରମଣ କରିଛନ୍ତି ରାହୁଲ ଗାନ୍ଧି । କାରଣ ବିଜେପି ସରକାର ଦେଶରେ ଘୃଣା ସୃଷ୍ଟି କରୁଥିବା ନେଇ ସେ ବାରମ୍ବାର ଅଭିଯୋଗ କରିଆସୁଛନ୍ତି । ଆଉ ତାଙ୍କ ଯାତ୍ରାକୁ ନେଇ ଯେତେବେଳେ ବିଜେପି ପ୍ରଶ୍ନ କରୁଛି, ଠିକ ସେତିକି ବେଳେ ସୋସିଆଲ ମିଡିଆରେ ଏଭଳି ବିଜେପିକୁ ଘେରିଛନ୍ତି ରାହୁଲ ଗାନ୍ଧି । ସେହିପରି ରାହୁଲଙ୍କ ମାନସରୋବର ଯାତ୍ରାର ପ୍ରମାଣ ଦେବାଲାଗି କିଛି ସହଯାତ୍ରୀଙ୍କ ପାଖରେ ରାହୁଲ ଛିଡା ହୋଇ ଫଟୋ ମଧ୍ୟ ପୋଷ୍ଟ କରିଛନ୍ତି ।
ହେଲେ ରାହୁଲଙ୍କ ଏହି ଫଟୋ ମଧ୍ୟ ସମାଲୋଚକଙ୍କ ମୁହଁ ବନ୍ଦ କରିପାରି ନାହିଁ । କାରଣ ମୂଳରୁ ରାହୁଲଙ୍କ ଗସ୍ତକୁ ମିଛ ବୋଲି କହିଆସୁଥିବା ବିଜେପି ଏହି ଫଟୋକୁ ନେଇ ମଧ୍ୟ ଆପତ୍ତି ଉଠାଇଛି । କେନ୍ଦ୍ରମନ୍ତ୍ରୀ ଗିରିରାଜ ସିଂ ଆଉ ପାଦେ ଆଗେଇ ଯାଇ ଏହାକୁ ଫଟୋସପରେ ତିଆରି କରାଯାଇଥିବା କହିଛନ୍ତି । ଜଣେ ସହଯାତ୍ରୀଙ୍କ ପାଖରେ ରାହୁଲ ଛିଡା ହୋଇଥିବାବେଳେ ହାତରେ ଏକ ବଙ୍କୁଲି ବାଡି ଧରିଛନ୍ତି । ଦୁଇ ଜଣଙ୍କ ଛାଇ ପଛରେ ପଡୁଥିବାବେଳେ ବାଡିଟିର ଛାଇ କାହିଁକି ପଡିନାହିଁ ବୋଲି ପ୍ରଶ୍ନ କରି ଏହାକୁ ଏକ ଜାଲି ଫଟୋ ବୋଲି ସେ ଅଭିଯୋଗ କରିବାକୁ ପଛାଇ ନାହାନ୍ତି ।
କେବଳ ରାହୁଲଙ୍କ ମାନସରୋବର ଯାତ୍ରାକୁ ମିଛ ବୋଲି ଅଭିଯୋଗ କରୁନାହିଁ ବିଜେପି ବରଂ ଏକ ଆଧ୍ୟାତ୍ମିକ ଗସ୍ତ ପୂର୍ବରୁ ରାହୁଲ ଗାନ୍ଧି ଆମିଷ ଖାଇଥିବା ନେଇ ମଧ୍ୟ ବିବାଦ ଜୋରଦାର ହୋଇଥିଲା । ଗତ ଅଗଷ୍ଟ ୩୧ରେ ରାହୁଲ ମାନସରୋବର ଅଭିମୁଖେ ବାହାରିବା ପୂର୍ବରୁ ନେପାଳ କାଠମାଣ୍ଡୁରେ ଥିବା ଭୁଟୁ ରେଷ୍ଟୁରାଂଟରେ ରାହୁଲ ଗାନ୍ଧି ଚିକେନ କୁରକୁରେ ଖାଇଥିବା ନେଇ ଚର୍ଚ୍ଚା ହେବା ପରେ ରେଷ୍ଟୁରାଂଟ ପକ୍ଷରୁ ଫେସବୁକ ପେଜରେ ବିବୃତି ଜାରି କରାଗଲା । ମାନସିକ ରଖି ମାନସରୋବର ଯାତ୍ରାରେ ଯାଉଥିବା ରାହୁଲ ଗାନ୍ଧି କେବଳ ସାତ୍ୱିକ ଭୋଜନ କରିଥିବା କୁହାଗଲା ।
ମୋଟାମୋଟି କହିବାକୁ ଗଲେ ରାହୁଲ ଗାନ୍ଧିଙ୍କ ମାନସରୋବର ଯାତ୍ରାକୁ ନେଇ ସରଗରମ ହୋଇଛି ଜାତୀୟ ରାଜନୈତିକ ପାଣିପାଗ । କାରଣ ବିଜେପି ଓ ପ୍ରଧାନମନ୍ତ୍ରୀ ମୋଦିଙ୍କ ହିନ୍ଦୁତ୍ୱ ଛବିକୁ କାଉଂଟର କରିବା ଲାଗି ନିଜକୁ ଜଣେ ଶିବ ଭକ୍ତ ଭାବେ ପ୍ରଚାର ପ୍ରସାର କରିବା ଆରମ୍ଭ କରିଛନ୍ତି ରାହୁଲ ଗାନ୍ଧି । ଯାତ୍ରା କାଳରେ ନିଜ ଆଧ୍ୟାତ୍ମିକ ଅନୁଭୂତିକୁ ଗୋଟିଗୋଟି କରି ସୋସିଆଲ ମିଡିଆରେ ନିଜ ସମର୍ଥକ ଓ ଦେଶବାସୀଙ୍କ ଆଗରେ ରଖିବା ସହ ବିଜେପି ଅଭିଯୋଗର ଉତ୍ତର ରଖିବାକୁ ଫଟୋ ଓ ଭିଡିଓ ଜାରି କରିଛନ୍ତି । ଦୁଇ ଏସପିଜିଙ୍କ ସହ ଗୁଜରାଟର ଏକ ୨୦ ଜଣିଆ ତୀର୍ଥଯାତ୍ରୀଙ୍କ ସହ ନେପାଳ ଦେଇ କୈଳାସ ମାନସରୋବର ଯାତ୍ରାରେ ବାହାରି ପଡିଛନ୍ତି ।