ପୁଣି ରାହୁଲଙ୍କ ମନ୍ଦିର ରାଜନୀତି ! ମଧ୍ୟପ୍ରଦେଶ ଗସ୍ତରେ ମା’ ପୀତାମ୍ବରୀଙ୍କୁ ଧୋତି ପିନ୍ଧି କଲେ ଦର୍ଶନ, ସେପଟେ ରାହୁଲଙ୍କୁ ଟାର୍ଗେଟ୍ କଲେ ବିଜେପି ନେତା ।
କନକ ବ୍ୟୁରୋ : ୨ ଦିନିଆ ମଧ୍ୟପ୍ରଦେଶ ଗସ୍ତରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ । ବୁନ୍ଦେଲଗଡ଼ କ୍ଷେତ୍ର ଦତିୟାରେ ଶ୍ରୀ ପିତାମ୍ବରୀ ପୀଠରୁ ମଧ୍ୟପ୍ରଦେଶ ଗସ୍ତ ଆରମ୍ଭ କରିଛନ୍ତି ରାହୁଲ । ସେଠାରେ ରାହୁଲ ଭଗବା ଧୋତି ପିନ୍ଧି ମାଆ ପୀତାମ୍ବରୀଙ୍କୁ ପୂଜାର୍ଚ୍ଚନା କରିଥିଲେ । ଏହା ପରେ ହେଲିକପ୍ଟରରେ ଯାଇ ଦିତୀୟା ଷ୍ଟାଡ଼ିୟମରେ ପହଁଚିଥିଲେ ରାହୁଲ । ଏଠାରେ କଂଗ୍ରେସ ପକ୍ଷରୁ ଆୟୋଜିତ ବିଶାଳ ଜନସଭାକୁ ସମ୍ବୋଧିତ କରିଛନ୍ତି ରାହୁଲ ଗାନ୍ଧି ।
Kanak News is now on WhatsApp
Join and get latest news updates delivered to you via WhatsApp
ଏହା ପରେ ରାହୁଲ ଗ୍ୱାଲିୟରରେ ମାଧବ ରାଓ ସିନ୍ଧିୟାଙ୍କ ସମାଧି ସ୍ଥଳକୁ ଯାଇ ଶ୍ରଦ୍ଧାଂଜଳି ଅର୍ପଣ କରିବାର କାର୍ଯ୍ୟକ୍ରମ ରହିଛି । ୪ ଟି ରାଜ୍ୟରେ ବିଧାନସଭା ନିର୍ବାଚନର ଘୋଷଣା ହେବା ପରେ ରାହୁଲ ନିର୍ବାଚନୀ ପ୍ରଚାର ପାଇଁ ଜୋରଦାର ଗସ୍ତ କାର୍ଯ୍ୟକ୍ରମ ଜାରି ରଖିଛନ୍ତି । ମଧ୍ୟପ୍ରଦେଶ ଗସ୍ତରେ ରାହୁୁଲ ରୋଡ଼ ଶୋ ମଧ୍ୟ କରିବେ । ଅନ୍ୟପଟେ ବିଜେପି ଅମିତ ଶାହା ମଧ୍ୟ ଆଜି ମଧ୍ୟପ୍ରଦେଶ ଗସ୍ତ କରିଛନ୍ତି ।
ସେପଟେ ରାହୁଲଙ୍କ ବିରୋଧରେ ବିବାଦୀୟ ବୟାନ ଦେଇଛନ୍ତି ରାଜସ୍ଥାନର ଜଣେ ମନ୍ତ୍ରୀ । ପାକିସ୍ତାନ ରାଫେଲ ଯୁଦ୍ଧ ବିମାନ ହାଲ କରିପାରି ନଥିବାରୁ ରାହୁଲ ଗାନ୍ଧିଙ୍କ ପେଟ ବ୍ୟଥା ବଢିଯାଇଛି ବୋଲି କହିଛନ୍ତି ରାଜସ୍ଥାନର ମନ୍ତ୍ରୀ ଜସୱନ୍ତ ସିଂହ ଯାଦବ । ଏକ ସଭାରେ ଭାଷଣ ଦେବା ଅବସରରେ ଏପରି କହିଛନ୍ତି ରାଜସ୍ଥାନର ଏହି କ୍ୟାବିନେଟ୍ ମନ୍ତ୍ରୀ । ସେ କହିଛନ୍ତି ଯେ ପାକିସ୍ତାନ ରାଫେଲ ଯୁଦ୍ଧ ବିମାନ ହାଲ କରୁ ବୋଲି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଚାହୁଁଥିଲେ । କିନ୍ତୁ ମୋଦି ଏହାକୁ ହାସଲ କରିନେବାରୁ ରାହୁଲ ହିନ୍ଦୁ ମାନଙ୍କୁ ଆତଙ୍କବାଦୀ ବୋଲି କହୁଛନ୍ତି ।
ଏହା ସହ ରାଜସ୍ଥାନର ମନ୍ତ୍ରୀ ତଥା ବିଜେପି ନେତା ଜସୱନ୍ତ ସିଂହ କହିଛନ୍ତି ଯେ ରାହୁଲ ପାକିସ୍ତାନର ଲୋକଙ୍କୁ ଖୁସି କରିବାକୁ ଚାହୁଁଛନ୍ତି । ଯେଉଁଥି ପାଇଁ ହିନ୍ଦୁସ୍ତାନୀଙ୍କୁ ଆତଙ୍କବାଦୀ କହିବାକୁ ପଛାଉ ନାହାଁନ୍ତି । ଏହା ସହ ରାଫେଲ ଚୁକ୍ତି ପ୍ରସଙ୍ଗରେ ରାହୁଲ ମୋଦିଙ୍କୁ ଚୋର କହୁଥିବାରୁ ଏହାକୁ ନେଇ ମଧ୍ୟ ଟାର୍ଗେଟ୍ କରିଛନ୍ତି ରାଜସ୍ଥାନର ଏହି ମନ୍ତ୍ରୀ । ସେ କହିଛନ୍ତି ଯେ ରାହୁଲ ସମ୍ପୂର୍ଣ୍ଣ ମିଛ କହୁଛନ୍ତି । ମୋଦି ଚୋର ନୁହଁନ୍ତି, ବରଂ ରାହୁଲ ଗାନ୍ଧିଙ୍କ ବାପ-ଅଜା ଚୋର ବୋଲି କହିଛନ୍ତି ଜସୱନ୍ତ ସିଂହ ଯାଦବ ।