କନକ ବ୍ୟୁରୋ : ପୁଣି ଚର୍ଚ୍ଚାରେ କଂଗ୍ରେସ ନେତା ରାହୁଲ ଗାନ୍ଧୀ । ଏବେ ରାହୁଲଙ୍କୁ ଲୋକଙ୍କ ଗହଣରେ ଅଧିକ ସମୟ ଦେଖିବାକୁ ମିଳୁଛି । ଭାରତଯୋଡ ଯାତ୍ରା ପରେ ରାହୁଲ ଏବେ ଗ୍ରାଉଣ୍ଡରେ ଅଧିକ ନଜର ଆସୁଛନ୍ତି । ବିଭିନ୍ନ ବର୍ଗର ଲୋକଙ୍କ ସହ ରାହୁଲଙ୍କୁ ଆଲୋଚନା କରୁଥିବାର ଦେଖିବାକୁ ମିଳୁଛି । ଗତ ସୋମବାର ମଧ୍ୟ ରାହୁଲଙ୍କୁ ସେଭଳି କିଛି ଅନ୍ଦାଜରେ ଦେଖିବାକୁ ମିଳିଛି । ସୋମବାର ରାତିରେ ରାହୁଲ ନିଜର ଦାମୀ ଗାଡି ବଦଳରେ ଟ୍ରକରେ ଯାତ୍ରା କରିଥିଲେ ।ଯାହାର ଭିଡ଼ିଓ ଏବେ ସୋସିଆଲ ମିଡ଼ିଆରେ ଘୂରି ବୁଲୁଛି । ରାହୁଲ ହଠାତ୍ ଏକ ଟ୍ରକରେ ଦିଲ୍ଲୀରୁ ଚଣ୍ଡିଗଡ ଯାତ୍ରା କରିଥିଲେ । କଂଗ୍ରେସ ପକ୍ଷରୁ ଟ୍ୱିଟ୍ କରି କୁହାଯାଇଛି ଯେ, ଟ୍ରକ ଡ୍ରାଇଭରଙ୍କ ସମସ୍ୟା ବାବଦରେ ଅବଗତ ହେବା ପାଇଁ ରାହୁଲଙ୍କର ଏହି ଟ୍ରକ୍ ଯାତ୍ରା ଥିଲା । ତେବେ ଏହା ରାହୁଲଙ୍କର କୌଣସି ସ୍ଥିରୀକୃତ କାର୍ଯ୍ୟକ୍ରମ ନଥିଲା । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ରାହୁଲ ଗାନ୍ଧୀ ସିମଲା ଯାଉଥିଲେ । ଯେଉଁଠି ତାଙ୍କ ଭଉଣୀଙ୍କ ସମେତ ପୂରା ପରିବାର ଅଛନ୍ତି ।

Advertisment

ଭାରତ ଯୋଡ ଯାତ୍ରା ପରେ ରାହୁଲଙ୍କ ବିଭିନ୍ନ ସମୟରେ ଭିନ୍ନ ଭିନ୍ନ ବର୍ଗର ଲୋକଙ୍କ ସହ ଦେଖିବାକୁ ମିଳୁଛି । କେତେବେଳେ ଦିଲ୍ଲୀର ରାସ୍ତାକଡରେ ଗୁପଚୁପ୍ ଖାଉଥିବାର ଦେଖିବାକୁ ମିଳୁଛି ତ ପୁଣି କେତେବେଳେ ସାଧାରଣ ଷ୍ଟଲରୁ ତରଭୁଜ ସରବତ ପିଉଥିବାର ନଜର ଆସୁଛନ୍ତି । ଏପରିକି ଗତ କିଛି ଦିନ ପୂର୍ବେ ଦିଲ୍ଲୀର ମୁଖାର୍ଜୀ ନଗରରେ ୟୁପିଏସସି ଓ ଏସଏସସି ପାଇଁ ପ୍ରସ୍ତୁତ ହେଉଥିବା ଛାତ୍ରଛାତ୍ରୀଙ୍କୁ ଭେଟିଥିଲେ ରାହୁଲ ଗାନ୍ଧୀ । ସେହିଭଳି କେତେବେଳେ ଛୋଟ ଛୋଟ ଦୋକାନୀ, ଡେଲିଭରୀ ବୟଙ୍କୁ ଭେଟୁଛନ୍ତି ରାହୁଲ । ରାହୁଲଙ୍କର ଏଭଳି ଅଚାନକ ଗସ୍ତକୁ ସାଧାରଣ ଲୋକ ମଧ୍ୟ ବେଶ ପ୍ରଶଂସା କରୁଛନ୍ତି ।