ବେରୋଜକାରୀଙ୍କ ସଂଖ୍ୟାରେ ଭାରତର ରେକର୍ଡ ! ବିଗତ ୪୬ବର୍ଷରେ ବଢ଼ିଛି ୬.୧% ବେକାରୀ ହାର, ଟ୍ୱିଟ୍ କରି ମୋଦିଙ୍କୁ ସମାଲୋଚନା କଲେ ରାହୁଲ ।
କନକ ବ୍ୟୁରୋ : ଦେଶରେ ବଢିଛି ବେକାରୀ । ଏନଏସଏସଓର ରିପୋର୍ଟ ଅନୁସାରେ ବିଗତ ୪୫ ବର୍ଷ ଭିତରେ ଦେଶରେ ବେକାରୀ ହାର, ଶୀର୍ଷ ସ୍ଥାନରେ ପହଂଚିଛି । ୧୯୭୨-୭୩ ପରଠାରୁ ବେକାରୀ ଅଭିବୃଦ୍ଧି ହାରରେ ଏହା ହେଉଛି ସର୍ବକାଳୀନ ରେକର୍ଡ । ସେପଟେ ମୋଦି ସରକାରଙ୍କ ୫ ବର୍ଷର ଶାସନ ପରେ ଦେଶରେ ନିଯୁକ୍ତିକୁ ନେଇ ଟ୍ୱିଟ୍ କରି ପ୍ରଶ୍ନ କରିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ପଚାରିଛନ୍ତି ହାଓ ଇଜ୍ ଦା ଜବ୍ସ ।
Kanak News is now on WhatsApp
Join and get latest news updates delivered to you via WhatsApp
ପରଦାର ସଂଳାପ ପଲିଟିକ୍ସକୁ କେତେ ପ୍ରଭାବିତ କରେ ରାହୁଲ ପଚାରିଥିବା ଉରି ଫିଲ୍ମର ସେହି ଡାଇଲଗରୁ, ତାହା ସ୍ପଷ୍ଟ ହୋଇଯାଉଛି । ସିନେ ପ୍ରେମୀଙ୍କ ଉତ୍ସାହ ବଢ଼ାଉଥିବା ଫିଲ୍ମର ସେହି ସଂଳାପ ଏବେ ରାଜନୀତିରେ ଜନତାଙ୍କୁ ଉତ୍ସାହିତ କରିବା ପାଇଁ ଉପଯୋଗ ହେଉଛି । ଆଉ ଏହି ଫିଲ୍ମ ଡାଇଲଗକୁ ନିଜ ଢ଼ଙ୍ଗରେ ମୋଡ଼ି ଦେଇ ଟୁଇଟ୍ କରିଛନ୍ତି ରାହୁଲ ଗାନ୍ଧୀ । ଯେଉଁଥିରେ ରାହୁଲ ଲେଖିଛନ୍ତି-
-#ହାଓ ଇଜ୍ ଦ ଜବ୍ସ । ପ୍ରତିବର୍ଷ ୨ କୋଟି ନିଯୁକ୍ତିର ପ୍ରତିଶ୍ରୁତି ଦିଆଯାଇଥିଲା । ୫ବର୍ଷ ପରେ
ନିଯୁକ୍ତି ସୁଯୋଗର ରିପୋର୍ଟ ଜାତୀୟ ବିପର୍ଯ୍ୟୟ ଭଳି ସାମ୍ନାକୁ ଆସିଛି । ୪୫ବର୍ଷ ଭିତରେ ବେକାରୀଙ୍କ ସଂଖ୍ୟା ଶୀର୍ଷ ସ୍ଥାନରେ ପହଂଚିଛି । କେବଳ ୨୦୧୭-୧୮ବର୍ଷରେ ସାଢ଼େ ୬ କୋଟି ଯୁବକ ବେକାର ଅଛନ୍ତି । ନମୋଙ୍କ ବିଦାୟ ନେବାର ସମୟ ଆସିଛି । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଏହି ଟ୍ୱିଟ୍ ଏବଂ ମୋଦିଙ୍କ ସମାଲୋଚନା ପଛରେ ରହିଛି, ଏନଏସଏସଓର ସଦ୍ୟପ୍ରକାଶିତ ରିପୋର୍ଟ । ଯେଉଁ ରିପୋର୍ଟରେ କୁହାଯାଇଛି, ବିଗତ ୪୫ ବର୍ଷ ଭିତରେ ଦେଶରେ ବେକାରୀ ହାର, ଶୀର୍ଷ ସ୍ଥାନରେ ପହଂଚିଛି ।
ପରିସଂଖ୍ୟାନ ଏବଂ ଯୋଜନା ପ୍ରଣୟନ ମନ୍ତ୍ରାଳୟ ପକ୍ଷରୁ କରାଯାଇଥିବା ଏହି ରିପୋର୍ଟର ତଥ୍ୟ କହୁଛି ।
-ଭାରତରେ ବେକାରୀ ଅବିବୃଦ୍ଧି ହାର ୬.୧%କୁ ବୃଦ୍ଧି ଯାଇଛି, ଯାହା ୪୫ବର୍ଷ ଭିତରେ ସବୁଠୁ ଅଧିକ
-୧୯୭୨-୭୩ ପରଠାରୁ ବେକାରୀ ଅବିବୃଦ୍ଧି ହାରରେ ଏହା ହେଉଛି ସର୍ବକାଳୀନ ରେକର୍ଡ
– ଗ୍ରାମାଚଂଳ ଅପେକ୍ଷା ସହରାଚଂଳରେ ବେକାରୀଙ୍କ ସଂଖ୍ୟା ବହୁତ ଅଧିକ
– ଗ୍ରାମାଂଚଳରେ ୫.୩% ବେକାରୀ ହାର ଥିବା ବେଳେ ସହରାଚଂଳରେ ଏହା ୭.୮% ରହିଛି
– ୨୦୧୭-୧୮ ବର୍ଷରେ ଗ୍ରାମାଚଂଳରେ ଶିକ୍ଷିତ ମହିଳାଙ୍କ ବେକାରୀ ହାର ୧୭.୩%
– ଗ୍ରାମାଚଂଳରେ ଶିକ୍ଷିତ ଯୁବକଙ୍କ ବେକାରୀ ହାର ରହିଛି ୧୦.୫%
– ବେକାରୀ ସମସ୍ୟା ଯୋଗୁଁ ଶ୍ରମ ଶକ୍ତି ହାର ମଧ୍ୟ ୩୯.୯%କୁ ଖସି ଆସିଛି
ବଡ କଥା ହେଉଛି, ଆଗକୁ ୨୦୧୯ ନିର୍ବାଚନ ଥିବାରୁ ଏନଏସଏସଓ ରିପୋର୍ଟର ଗୁରୁତ୍ୱ ଆହୁରି ବଢ଼ିଯାଇଛି । କାରଣ କେନ୍ଦ୍ରରେ ଥିବା ମୋଦି ସରକାର ବର୍ଷକୁ ୨କୋଟି ନିଯୁକ୍ତିର ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲେ । ଆଉ ଯେତେବେଳେ ବେକାରୀ ସମସ୍ୟାକୁ ନେଇ ଏଭଳି ରିପୋର୍ଟ ଆସୁଛି । ବିରୋଧୀଙ୍କୁ ଏକ ବଡ ଅସ୍ତ୍ର ମିଳିଯାଇଛି । ଆଉ ସେଇଥି ପାଇଁ ବିଜେପିର କେନ୍ଦ୍ରୀୟ ନେତୃତ୍ୱ-ହାଓ ଇଜ୍ ଦ ଜୋସ୍ର ନାରା ଦେଉଥିବା ବେଳେ ରାହୁଲ ଗାନ୍ଧୀ ପାଲଟା ପ୍ରଶ୍ନ କରିଛନ୍ତି, ହାଓ ଇଜ୍ ଦ ଜବ୍ସ । ଆଉ ରାହୁଲଙ୍କ ସହ ତାଳ ଦେଇ ପକୁଡି ବିକ୍ରି କରି ବେକାରୀ ସମସ୍ୟାର ପ୍ରତିବାଦ କରିଛନ୍ତି କଂଗ୍ରେସ ନେତା ଜ୍ୟୋତିରାଦିତ୍ୟ ସିନ୍ଧିଆ ।