କଂଗ୍ରେସ ସଭାପତି ପଦରୁ ଇସ୍ତଫା ଦେଲେ ରାହୁଲ ଗାନ୍ଧୀ । ପରାଜୟ ପାଇଁ ନିଜକୁ କଲେ ଦାୟୀ, କହିଲେ ଖୁବଶୀଘ୍ର ବଛାହେଉ ନୂଆ ସଭାପତି ।
କନକ ବ୍ୟୁରୋ : କଂଗ୍ରେସ ସଭାପତି ପଦରୁ ଇସ୍ତଫା ଦେଲେ ରାହୁଲ ଗାନ୍ଧୀ । ଚଳିତ ସାଧାରଣ ନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ପରେ ଦଳୀୟ ସଭାପତି ପଦ ଛାଡିଛନ୍ତି ରାହୁଲ । ଦଳୀୟ ସଭାପତି ପଦରୁ ଇସ୍ତଫା ଦେଇଥିବା ନେଇ ଟ୍ୱିଟରରେ ଜଣାଇବା ସହ ଏହି ପଦରୁ କାହିଁକି ଇସ୍ତଫା ଦେଊଛନ୍ତି ତାହାର କାରଣ ମଧ୍ୟ ଦର୍ଶାଇଛନ୍ତି ରାହୁଲ । ଚାରି ପୃଷ୍ଠାର ଇସ୍ତଫାପତ୍ରରେ ସଭାପତି ପଦ ଛାଡିବାର ପୂରା କାରଣ ଲେଖିଛନ୍ତି ରାହୁଲ ।
Kanak News is now on WhatsApp
Join and get latest news updates delivered to you via WhatsApp
ଚଳିତ ସାଧାରଣ ନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ପାଇଁ ରାହୁଲ ନିଜକୁ ଦାୟୀ କରିବା ସହ ସଭାପତି ପଦରୁ ଇସ୍ତଫା ଦେଇଥିବା ସ୍ପଷ୍ଟ କରିଛନ୍ତି । ଏହାସହ ରାହୁଲ ଇସ୍ତଫାପତ୍ର ଲେଖିଛନ୍ତି, ଦଳର ଅଭିବୃଦ୍ଧି ସମସ୍ତେ ଉତ୍ତରଦାୟୀ ରହିବା ଆବଶ୍ୟକ । ଏହାସହ ଦଳ ଖୁବଶୀଘ୍ର ନୂଆ ସଭାପତି ବାଛିବା ଦରକାର ବୋଲି କହିଛନ୍ତି ରାହୁଲ । କଂଗ୍ରେସର ସଭାପତି ପଦରେ ରହିବା ମୋ ପାଇଁ ଗର୍ବର ବିଷୟ । ଦଳ ପକ୍ଷରୁ ମୋତେ ଯେଉଁ ଭଲ ପାଇବା ମିଳିଛି ସେଥିପାଇଁ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ରାହୁଲ ।
ଏହାସହ ରାହୁଲ କହିଛନ୍ତି ସଭାପତି ପଦରୁ ଇସ୍ତଫା ଦେବା ନେଇ ଯେତେବେଳେ ସିଇସି କମିଟିକୁ ଜଣାଇଥିଲି ସେତେବେଳେ ମୋର ଏହି ନିଷ୍ପତିକୁ ବିରୋଧ କରିବା ସହ ଅନେକ ନେତା ଓ କର୍ମୀ ଧାରଣାରେ ମଧ୍ୟ ବସିଥିଲେ । ଏପରିକି କିଛି ସହଯୋଗୀ ନୂଆ ସଭାପତିଙ୍କ ଚୟନ ମୁଁ କରେ ବୋଲି ମତ ଦେଇଥିଲେ । କିନ୍ତୁ ଏଭଳି ଏକାକୀ ସଭାପତି ଚୟନ କରିବା ସମ୍ପୂର୍ଣ୍ଣ ଭୂଲ । ତେଣୁ ଦଳ ନିଷ୍ପତି ନେଉ ଯେ କାହାକୁ କଂଗ୍ରେସର ନେତୃତ୍ୱ ଦିଆଯିବ । ଯିଏ କଂଗ୍ରେସକୁ ଏଭଳି କଠିନ ପରିସ୍ଥିତିରେ ଆଗେଇ ନେବା ସହ ନିଜର ଦାୟିତ୍ୱ ଠିକ୍ ଭାବରେ ତୁଲାଇପାରିବ ।
ଏହାପୂର୍ବରୁ ୨୦୧୭ ମସିହାରେ ରାହୁଲ ଗାନ୍ଧୀ କଂଗ୍ରେସର ନୂଆ ସଭାପତି ଭାବେ ନିର୍ବାଚିତ ହୋଇଥିଲେ । ରାହୁଲଙ୍କ ନେତୃତ୍ୱରେ ଦଳ କିଛି ରାଜ୍ୟରେ ସଫଳତା ପାଇଥିବା ବେଳେ କିଛି ରାଜ୍ୟରୁ ଶାସନ କ୍ଷମତାରୁ ବିଦା ହୋଇଥିଲା । ଖାସକରି ରାହୁଲଙ୍କ ନେତୃତ୍ୱରେ ଛତିଶଗଡ, ରାଜସ୍ଥାନ, ମଧ୍ୟପ୍ରଦେଶ ଭଳି ବିଜେପି ଶାସିତ ରାଜ୍ୟକୁ ଅକ୍ତିଆର କରିଥିଲା କଂଗ୍ରେସ । ସେହିଭଳି ଗୁଜୁରାଟରେ ବିଜେପିକୁ କଡା ଟକ୍କର ଦେଇଥିଲା । ଅନ୍ୟପଟେ କର୍ଣ୍ଣାଟକ, ଆସାମ ଭଳି କଂଗ୍ରେସ ଶାସିତ ରାଜ୍ୟ ମଧ୍ୟ ଦଳ ହାତରୁ ଖସିଛି । ଆଉ ଏସବୁ ଭିତରେ ଚଳିତ ସାଧାରଣ ନିର୍ବାଚନ ରାହୁଲଙ୍କ ପାଇଁ ଥିଲା ଏସିଡ୍ ଟେଷ୍ଟ । କାରଣ ରାହୁଲଙ୍କ ନେତୃତ୍ୱରେ ମୈଦାନକୁ ଓହ୍ଲାଇଥିଲା କଂଗ୍ରେସ । କିନ୍ତୁ ରାହୁଲଙ୍କ ନେତୃତ୍ୱକୁ ଲୋକେ ଗ୍ରହଣ କରି ନଥିବା ବେଳେ ଦେଶରେ ପୁଣିଥରେ ଉଡ଼ିଥିଲା ଗେରୁଆ ବାନା । ମାତ୍ର ୫୨ଟି ଆସନରେ ସୀମିତ ରହିଥିଲା କଂଗ୍ରେସ ଦଳ । ଆଉ ଏଭଳି ପରାଜୟ ପାଇଁ ନିଜକୁ ଦାୟୀ କରିବା ସହ ନୈତିକତା ଦୃଷ୍ଟିରୁ ଦଳର ସଭାପତି ପଦରୁ ଇସ୍ତଫା ଦେଇଛନ୍ତି ରାହୁଲ ।