ସଂସଦର ରେକର୍ଡରୁ ହଟିଲା ରାହୁଲ, ମହୁଆଙ୍କ ବୟାନ। ଆଦାନୀ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ଉପରେ ବର୍ଷିଥିଲେ ଦୁଇ ନେତା।
କନକ ବ୍ୟୁରୋ: ସଂସଦର ରେକର୍ଡରୁ କଂଗ୍ରେସ ସାଂସଦ ରାହୁଲ ଗାନ୍ଧୀ ଏବଂ ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ରୋଙ୍କ ବୟାନକୁ ହଟାଇଦିଆଯାଇଛି । ଏହା ପରେ କଂଗ୍ରେସ ଅଭିଯୋଗ ଲଗାଇଛି । ଦଳ କହିଛି ଯେ, ଆଦାନୀ ଗ୍ରୁପ ସହ ଜଡିତ ମାମଲାରେ ରାହୁଲ ଗାନ୍ଧୀଙ୍କ ତରଫରୁ କରାଯାଇଥିବା ଟିପ୍ପଣୀ ରେକର୍ଡରୁ ହଟାଇ ଗୃହର ମର୍ଯ୍ୟାଦା ଏବଂ ଲୋକତନ୍ତ୍ରକୁ ଶେଷ କରାଯାଇଛି । ଦଳର ମହାସଚିବ ଜୟରାମ ରମେଶ କହିଛନ୍ତି, ପ୍ରଧାନମନ୍ତ୍ରୀଙ୍କ ସହ ଜଡିତ ଆଦାନୀ ମହାଦୁର୍ନୀତି ଉପରେ ରାହୁଲ ଗାନ୍ଧୀଙ୍କ ଟିପ୍ପଣୀ ହଟାଯିବା ସହ ଲୋକସଭାରେ ଲୋକତନ୍ତ୍ରର ଦାହସଂସ୍କାର କରିଦିିଆଯାଇଛି, ଓଁମ୍ ଶାନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଆଦାନୀ ଗ୍ରୁପ ସହ ଜଡିତ ମାମଲାକୁ ଉଦାହରଣ ଦେଇ ମଙ୍ଗଳବାର ଲୋକସଭାରେ ଅଭିଯୋଗ ଲଗାଇଥିଲେ । ୨୦୧୪ରେ କେନ୍ଦ୍ରରେ ବିଜେପି ସରକାରରେ ଆସିବା ପରେ ଏଭଳି ଅସଲି ଯାଦୁ ଚାଲିଲା ଯେ ଆଠବର୍ଷ ଭିତରେ ଉଦ୍ଦ୍ୟୋଗପତି ଗୌତମ ଆଦାନୀ ବିଶ୍ୱର ଦ୍ୱିତୀୟ ଧନୀ ବ୍ୟକ୍ତି ହୋଇଯାଇଥିଲେ ।
ସେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଉପରେ ଚର୍ଚ୍ଚା ବେଳେ ରାହୁଲ ଏଥିରେ ଭାଗ ନେଇଥିଲେ । ସେ ଏହା ମଧ୍ୟ ଦାବି କରିଥଲେ ଯେ ବର୍ତ୍ତମାନର ସରକାରଙ୍କ ଦ୍ୱାରା ପରିବର୍ତ୍ତନ କରାଯାଇଥିବା ନିୟମ କାରଣରୁ ଅନେକ ବିମାନବନ୍ଦର ଆଦାନୀ ଗ୍ରୁପକୁ ଦିଆଯାଇଛି । ରାହୁଲ ଗାନ୍ଧୀଙ୍କ ଦ୍ୱାରା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନେଇ ଅନେକ ଟିପ୍ପଣୀ ପରେ ଲୋକସଭା ବାଚସ୍ପତିଙ୍କ ନିର୍ଦ୍ଦେଶରେ ଏହାକୁ ହଟାଇଦିଆଯାଇଛି ।
ସେପଟେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଚର୍ଚ୍ଚାରେ ସାମିଲ ହୋଇଥିଲେ ଟିଏମସି ସାଂସଦ ମହୁଆ ମୈତ୍ରୋ । କେନ୍ଦ୍ର ସରକାରଙ୍କ ଉପରେ ସେ ଜୋରଦାର ବର୍ଷିଥିଲେ । ମହୁଆଙ୍କ ଭାଷଣକୁ ନେଇ ଭାଜପାର ସାଂସଦ ଜୋରଦାର ବିରୋଧ କରିଥିଲେ । ତାଙ୍କର ଏହି ବୟାନକୁ ବର୍ତ୍ତମାନ ପୁଣିଥରେ ହଟାଇଦିଆଯାଇଛି ।