କନକ ବ୍ୟୁରୋ: ଉତ୍ତରପ୍ରଦେଶର ଦୁଇଟି ଗୁରୁତ୍ୱପୂର୍ଣ୍ଣ ଆସନ ଆମେଠି ଓ ରାଏବରେଲି । କଂଗ୍ରେସରୁ ପ୍ରାର୍ଥୀ କିଏ ହେବେ ସସପେନ୍ସ ଜାରି ରହିଛି । ଆଜି ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧୀ ନାମାଙ୍କନ ପତ୍ର ଦାଖଲ କରିପାରନ୍ତି । ଉଭୟଙ୍କ ପ୍ରାର୍ଥୀତ୍ୱ ପାଇଁ ଆମେଠିରୁ ରାଏବରେଲି ପର୍ଯ୍ୟନ୍ତ କାର୍ଯ୍ୟାଳୟରେ ପ୍ରସ୍ତୁତି ଦେଖିବାକୁ ମିଳୁଛି । କଂଗ୍ରେସ କେନ୍ଦ୍ରୀୟ କାର୍ଯ୍ୟାଳୟରେ ପୂଜା ପରେ ନାମାଙ୍କନ କାର୍ଯ୍ୟକ୍ରମ ହେବ ବୋଲି ଜଣାପଡ଼ିଛି ।

Advertisment

ତେବେ ଜାତୀୟ ଗଣମାଧ୍ୟମର ସୂଚନା ଅନୁଯାୟୀ, ରାହୁଲ ଗାନ୍ଧୀ ତାଙ୍କ ପୂର୍ବ ଗଡ଼ ଆମେଠିରୁ ନିର୍ବାଚନ ଲଢିନପାରନ୍ତି । ସେ ଏବେ ତାଙ୍କ ମା’ ତଥା ସୋନିଆ ଗାନ୍ଧୀଙ୍କ ଲୋକସଭା ଆସନ ରାଏବରେଲିରୁ ଲଢ଼ିପାରନ୍ତି ବୋଲି ଜଣାପଡିଛି । ୨୦୧୯ରେ ବିଜେପିର ସ୍ମୃତି ଇରାନୀଙ୍କଠାରୁ ହାରିବା ପରେ ରାହୁଲ ଗାନ୍ଧୀ ଆମେଠି ଲୋକସଭା ଆସନରେ ନିଜ ଭାଗ୍ୟ ପରୀକ୍ଷା କରିବାକୁ ଚାହୁଁନଥିବା କୁହାଯାଉଛି । ଚଳିତଥର ସେ କେରଳ ୱାୟନାଡରୁ ମଧ୍ୟ ଦ୍ୱିତୀୟ ଥର ପାଇଁ ପ୍ରାର୍ଥୀ ହୋଇଛନ୍ତି । ପ୍ରଥମ ପର୍ଯ୍ୟାୟରେ ଏହି ଆସନ ପାଇଁ ଭୋଟ୍ ପଡିଛି ।

ମିଳିଥିବା ସୂଚନା ଅନୁଯାୟୀ, ଆମେଠି ଆସନରେ କଂଗ୍ରେସ ୟୁପିର ନେତା କେଏଲ ଶର୍ମାଙ୍କୁ ପ୍ରାର୍ଥୀ କରିପାରେ । ଆମେଠି ଓ ରାଏବରେଲି ଆସନରୁ ଯଥାକ୍ରମେ ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ପ୍ରାର୍ଥୀ କରିବାକୁ କଂଗ୍ରେସର ଉତ୍ତର ପ୍ରଦେଶ ୟୁନିଟରେ ଦାବି ହେଉଛି । ଯଦି ରାହୁଲ ଗାନ୍ଧି ରାୟବରେଲିରୁ ନିର୍ବାଚନ ଲଢ଼ିବେ, ତା'ହେଲେ ତାଙ୍କ ଭଉଣୀ ତଥା କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ନିର୍ବାଚନ ପଦାର୍ପଣ ପାଇଁ ଅଧିକ ସମୟ ଅପେକ୍ଷା କରିବାକୁ ପଡ଼ିବ । ଆନୁଷ୍ଠାନିକ ଘୋଷଣା ପୂର୍ବରୁ ଗୁରୁବାର ରାହୁଲ ଗାନ୍ଧି ଏବଂ ପ୍ରିୟଙ୍କା ଗାନ୍ଧିଙ୍କ ପୋଷ୍ଟର ଆମେଠି ଏବଂ ରାଏବରେଲିରେ ଲଗାଯାଇଛି ।