ଆନ୍ଦୋଳନ ବେଳେ ମୃତ କୃଷକଙ୍କ ଚିଠା ଦେଖାଇଲେ ରାହୁଲ ଗାନ୍ଧୀ, ସରକାରଙ୍କ ପାଖରେ ରଖିଲେ ଏଭଳି ଦାବି

89

କନକ ବ୍ୟୁରୋ : ପୁଣିଥରେ ଆନ୍ଦୋଳନ ବେଳେ ମୃତ କୃଷକଙ୍କ ପରିବାରକୁ ସହାୟତା ଦାବି କଲେ କଂଗ୍ରେସ ନେତା ରାହୁଲ ଗାନ୍ଧୀ । ରାହୁଲ କହିଛନ୍ତି ଯେ ସରକାରଙ୍କ ପାଖରେ ଯଦି ମୃତ କୃଷକଙ୍କର ସୂଚନା ନାହିଁ ତେବେ ମୁଁ ସରକାରଙ୍କୁ ସେମାନଙ୍କର ସୂଚନା ଦେଉଛି । ଏହାକୁ ନେଇ ସରକାର ତୁରନ୍ତ ମୃତ କୃଷକଙ୍କ ପରିବାର ପ୍ରତି ସମବେଦନା ଜଣାଇ ସେମାନଙ୍କ ପାଇଁ ସହାୟତା ରାଶି ଘୋଷଣା କରନ୍ତୁ ।

ରାହୁଲ ଗାନ୍ଧୀ ଦିଲ୍ଲୀରେ ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି କି, ଚଳିତ ଅଧିବେଶନରେ ଆନ୍ଦୋଳନ କ୍ରମରେ ମୃତ୍ୟୁବରଣ କରିଥିବା ଚାଷୀଙ୍କ ପରିବାରକୁ ସହାୟତା ଯୋଗାଇ ଦେବା ପ୍ରଶ୍ନର ଉତ୍ତର ଦେଇ ସରକାରଙ୍କ ପାଖରେ ଏନେଇ ଡାଟା ନଥିବା କଥା କହିଥିଲେ । ହେଲେ ଏହାପରେ କଂଗ୍ରେସ ପକ୍ଷରୁ ଏହା ଉପରେ କାମ କରିବା ଆରମ୍ଭ କରାଯାଇଥିଲା । ଏବେ ପଞ୍ଜାବ ମୁଖ୍ୟମନ୍ତ୍ରୀ ଚରରଜିତସିଂ ଚନ୍ନିଙ୍କ ପାଖରେ ୪୦୩ ଜଣ ମୃତ କୃଷକଙ୍କର ଡାଟା ରହିଛି । ତାହାକୁ ସରକାର ନେଇ ତୁରନ୍ତ ମୃତ କୃଷକଙ୍କ ପରିବାରକୁ ସହାୟତା ରାଶି ପ୍ରଦାନ କରନ୍ତୁ ବୋଲି ରାହୁଲ ଗାନ୍ଧୀ ଦାବି କରିଛନ୍ତି ।

ସେ ଆହୁରି କହିଛନ୍ତି କି ଚନ୍ନି ସରକାର ମୃତ ୪୦୩ ଜଣ କୃଷକଙ୍କ ପରିବାରକୁ ୫ ଲକ୍ଷ ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରିଛନ୍ତି । କେବଳ ସେତିକି ନୁହେଁ ମୃତ କୃଷକଙ୍କ ପରିବାରରୁ ୧୫୩ ଜଣଙ୍କୁ ଚନ୍ନି ସରକାର ସରକାରୀ ଚାକିରୀ ଦେଇଛନ୍ତି ଓ ବାକି ହିତାଧିକାରୀଙ୍କୁ ଖୁବଶୀଘ୍ର ଚାକିରୀ ମିଳିବ । ଏହାସହ ରାହୁଲ କହିଥିଲେ କି ଏବେ ଆମେ ୪୦୩ ଜଣ ମୃତ କୃଷକଙ୍କ ଡାଟା ସରକାରଙ୍କୁ ଦେଉଛୁ ବାକି ସରକାର ଏହାକୁ ପର୍ଯ୍ୟବେକ୍ଷଣ କରି ତୁରନ୍ତ ସହାୟତା ପ୍ରଦାନ କରନ୍ତୁ ।

କେବଳ ସହାୟତା ନୁହେଁ କେନ୍ଦ୍ର ସରକାର ଯେଭଳି ଭାବେ କୃଷକଙ୍କୁ ଅପମାନିତ କରୁଛନ୍ତି ତାହାକୁ ନେଇ ରାହୁଲ ଗାନ୍ଧୀ ସରକାରଙ୍କ ଉପରେ ବର୍ଷିଛନ୍ତି । ସେ କହିଛନ୍ତି କି ମାତ୍ର ୨/୩ ଜଣ ବ୍ୟବସାୟୀ ବନ୍ଧୁଙ୍କ ପାଇଁ ପ୍ରଧାନମନ୍ତ୍ରୀ କିଛି ବି କରିବାକୁ ପ୍ରସ୍ତୁତ ଅଛନ୍ତି । ହେଲେ ଦେଶର ଅନ୍ନଦାତାଙ୍କ ପାଇଁ ଦୁଇମିନିଟ ନିରବ ପ୍ରଥନା କରିବାକୁ ପଛାଉଛନ୍ତି ପ୍ରଧାନମନ୍ତ୍ରୀ ।