ମହଙ୍ଗା ପଡିଲାକି ‘ଚୌକିଦାର ଚୌର୍ ହେ’ ନାରା ? ପରାଜୟ ପରେ କାରଣ ଖୋଜୁଛି କଂଗ୍ରେସ । ବସୁଛି ବୈଠକ, ଚାଲିଛି ମାନସ ମନ୍ଥନ ।
କନକ ବ୍ୟୁରୋ : ୨୦୧୯ ଲୋକସଭା ନିର୍ବାଚନରେ ବଡ ପରାଜୟ ପରେ, ପରାଜୟର କାରଣ ଖୋଜୁଛି କଂଗ୍ରେସ । ବସୁଛି ବୈଠକ, ଚାଲିଛି ମାନସ ମନ୍ଥନ । ଆଉ ଏହାରି ଭିତରେ ଚର୍ଚ୍ଚା ହେଉଛି, ନିର୍ବାଚନୀ ରଣାଙ୍ଗନରେ ଯେଉଁ ନାରା ନେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ମଇଦାନକୁ ଓହ୍ଲାଇଥିଲେ, ତାହା ହିଁ କଂଗ୍ରେସକୁ ସୁହାଇଲା ନାହିଁ । ଆଉ ସେହି ନାରା ଥିଲା ‘ଚୌକିଦାର ଚୌର୍ ହେ’ ।
Kanak News is now on WhatsApp
Join and get latest news updates delivered to you via WhatsApp
ଜନସଭା ହେଉ କିମ୍ବା କୌଣସି ନିର୍ବାଚନୀ ରାଲି, ପ୍ରତ୍ୟେକ୍ଷରେ କିମ୍ବା ପରୋକ୍ଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଜେପିକୁ ସମାଲୋଚନା କରିବାକୁ ଭୁଲିଯାଉନଥିଲେ କଂଗ୍ରେସ ଅଧ୍ୟକ୍ଷ । ପ୍ରତିଟି ଜନସଭାରେ ମୋଦିଙ୍କୁ ଟାର୍ଗେଟ୍ କରି ‘ଚୌକିଦାର ଚୌର୍ ହେ’ ନାରା ଦେଉଥିଲେ ରାହୁଲ ଗାନ୍ଧି । ତେବେ କୁହାଯାଉଛି ରାହୁଲଙ୍କ ଏହି ନାରା ହୁଏତ, ଜନସାଧାରଣଙ୍କ ଦ୍ୱାରା ଗ୍ରହଣ କରାଗଲାନି । ଆଉ ଯେଉଁଥିପାଇଁ କଂଗ୍ରେସକୁ ବଡ ପରାଜୟର ସାମ୍ନା କରିବାକୁ ପଡିଲା ।
କୁହାଯାଉଛି, କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ‘ଚୌକିଦାର ଚୌର୍ ହେ’ ନାରାକୁ କାଉଣ୍ଟର କରିବାକୁ ଯାଇ ଦେଶବାସୀଙ୍କ ଆଗରେ ରାଷ୍ଟ୍ରବାଦର ଯେଉଁ ବର୍ଣ୍ଣନା ମୋଦୀ ରଖିଥିଲେ, ସେଥିରେ ଏପରି ମୋହନୀ ଶକ୍ତି ଥିଲା ଚୁମ୍ବକ ଭଳି ଲୋକଙ୍କୁ ଯୋଡି ଦେଇଥିଲା ତାଙ୍କ ସହ । ଆଉ ତା’ର ପ୍ରମାଣ ହେଉଛି ମୋଦୀଙ୍କ ପ୍ରତି ପ୍ରଚଣ୍ଡ ଜନସମର୍ଥନ ।
ଆଉ ଅନ୍ୟପଟେ ପୁଲୱାମା ଆକ୍ରମଣ ଆଉ ଏହା ପରେ ପରେ ବାଲାକୋଟରେ ଭାରତର ସର୍ଜିକାଲ ଷ୍ଟ୍ରାଇକ୍ ସତେ ଯେମିତି, ମୋଦିଙ୍କ ଭାଗ୍ୟ ବଦଳାଇଦେଲା । ମାତ୍ର ୫ ମାସ ଆଗରୁ ରୋଜଗାର, ବିକାଶ, ବିମୁଦ୍ରାକରଣ ଓ ଜିଏସଟି ଭଳି ପ୍ରସଙ୍ଗରେ ପଛରେ ପଡିଯାଇଥିଲା ବିଜେପି । ଏପରିକି ତାଙ୍କର ଗଡ ରହିଥିବା ଛତିଶଗଡ, ମଧ୍ୟପ୍ରଦେଶ ଏବଂ ରାଜସ୍ଥାନରେ ସରକାର ମଧ୍ୟ ବଂଚାଇପାରିନଥିଲେ । କିନ୍ତୁ ପାକିସ୍ତାନ ବିପକ୍ଷରେ ସର୍ଜିକାଲ ଷ୍ଟ୍ରାଇକ, ସାରାଦେଶରେ ମୋଦିଙ୍କ ଏକ ନୂଆ ଛବି ସୃଷ୍ଟି କଲା । ୨୬-୧୧ ଆକ୍ରମଣ ପରେ କଂଗ୍ରେସ ସରକାର ସମୟରେ ଚୁପ୍ ରହିିଥିବା ଭାରତ, ମୋଦିଙ୍କ ସମୟରେ କିନ୍ତୁ ବୀର ଆଚରଣ ଦେଖାଇଲା । ବୋଧହୁଏ, ଏହା ଦେଶବାସୀଙ୍କ ମୁଡରେ ଏକ ବଡ ପରିବର୍ତନ ଆଣିଲା ।