ଚାଷୀ ସମର୍ଥନରେ ବାହାରିଲେ ରାହୁଲ ଗାନ୍ଧୀ । ୱାୟନାଡରେ କଂଗ୍ରେସ ନେତାଙ୍କୁ ବସାଇ ଟ୍ରାକ୍ଟର ରାଲିରେ ବାହାରିଲେ ରାହୁଲ ।
କନକ ବ୍ୟୁରୋ : ଚାଷୀ ଆନ୍ଦୋଳନ ନେଇ କେନ୍ଦ୍ର ସରକାରଙ୍କୁ ଘେରିଲେ କଂଗ୍ରେସ ନେତା ରାହୁଲ ଗାନ୍ଧୀ । ଆଗାମୀ ବିଧାନସଭା ନିର୍ବାଚନ ପାଇଁ ୩ଦିନିଆ କେରଳ ଓ ତାମିଲନାଡୁ ଗସ୍ତରେ ଥିବା ବେଳେ କେରଳ ୱାୟନାଡରେ ଚାଷୀଙ୍କ ସମର୍ଥନରେ ଟ୍ରାକ୍ଟର ରାଲି ବାହାର କରିଛନ୍ତି ରାହୁଲ । ଏହି ସମୟରେ କଂଗ୍ରେସ ଯୁବରାଜ ରାହୁଲ ନିଜେ ଟ୍ରାକ୍ଟର ଚଳାଇ ଥିବା ବେଳେ ଅନ୍ୟ କଂଗ୍ରେସ ନେତା ମାନେ ତାଙ୍କ ସହ ବସିଥିବା ଦେଖିବାକୁ ମିଳିଛି । ଚାଷୀ ସମସ୍ୟା ନେଇ କେନ୍ଦ୍ର ସରକାର ଓ ପ୍ରଧାନମନ୍ତ୍ରୀ ମୋଦୀଙ୍କୁ ଟାର୍ଗେଟ କରିଛନ୍ତି ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ରାହୁଲ କେନ୍ଦ୍ରକୁ ଟାର୍ଗେଟ କରି ଆହୁରି ମଧ୍ୟ କହିଛନ୍ତି ଯେ ଶକ୍ତିଶାଳୀଙ୍କୁ ଅଧିକ ଶକ୍ତିଶାଳୀ କରିବା ସରକାରଙ୍କ ଲକ୍ଷ୍ୟ କିନ୍ତୁ କଂଗ୍ରେସ ଅବହେଳିତଙ୍କ ବିକାଶ ଉପରେ ଗୁରୁତ୍ୱ ଦିଏ । ଏହାସହ ମନରେଗାକୁ ନେଇ ମଧ୍ୟ ମୋଦୀଙ୍କୁ ଟାର୍ଗେଟ କରିଛନ୍ତି ରାହୁଲ ।
ସେପଟେ ଆରଜେଡି ନେତା ତେଜସ୍ୱୀ ଯାଦବ ମଧ୍ୟ ଦର ବୃଦ୍ଧି ପ୍ରସଙ୍ଗରେ ସରକାରଙ୍କ ଉପରେ ବର୍ଷିଛନ୍ତି । ସୋମବାର ଦିନ ଟ୍ରାକ୍ଟର ଚଳାଇ ବିଧାନସଭାରେ ପହଂଚିଛନ୍ତି ଏହି ଯୁବ ନେତା । ତେଜସ୍ୱୀ ମଧ୍ୟ କେନ୍ଦ୍ର ସରକାରଙ୍କୁ ଚାଷୀ ବିରୋଧୀ ସରକାର ବୋଲି କହିବା ସହ ସରକାର ଚାଷୀଙ୍କ ସମସ୍ୟା ଶୁଣୁନଥିବା ଅଭିଯୋଗ କରିଛନ୍ତି । ଏପରିକି ତୈଳ ଦର ବୃଦ୍ଧି ପ୍ରସଙ୍ଗରେ ସରକାର କୌଣସି ପ୍ରତିକ୍ରିୟା ରଖୁନଥିବା ନେଇ କ୍ଷୋଭ ପ୍ରକାଶ କରିଛନ୍ତି ତେଜସ୍ୱୀ ।
ଦେଶରେ ଗତ କିଛି ଦିନ ତୈଳ ଦର ଅହେତୁକ ଭାବେ ବଢି ଚାଲିଥିବା ବେଳେ କେତେକ ସ୍ଥାନରେ ପେଟ୍ରୋଲ ଲିଟର ପିଛା ଶହେ ଟଙ୍କା ଟପିଛି । ଏପରିକି ରୋଷେଇ ଗ୍ୟାସ ସିଲିଣ୍ଡର ଦର ମଧୃ ବୃଦ୍ଧି ପାଇଛି । ଯାହାକୁ ନେଇ ଜନ ଅସନ୍ତୋଷ ବଢିଚାଲିଥିବା ବେଳେ ଏହାକୁ ନେଇ ପ୍ରତିବାଦ ମଧ୍ୟ ଜୋରଦାର ହୋଇଛି ।