ଆମେଠି ଦେଖିବ ଆନୁଗତ୍ୟ ବନାମ ବାସ୍ତବ ସ୍ଥିତି ! ରାହୁଲଙ୍କୁ ଟକ୍କର ଦେଉଛନ୍ତି ସ୍ମୃତି, କଂଗ୍ରେସ ଗଡରେ ଏଥର କିଏ କରିବ କାୟା ବିସ୍ତାର ?
କନକ ବ୍ୟୁରୋ : ଆମେଠି ଏଥର ଦେଖିବ ଆନୁଗତ୍ୟ ବନାମ ବାସ୍ତବ ସ୍ଥିତି । ଗୋଟିଏ ପଟେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ନିର୍ବାଚନ ଲଢୁଥିବା ବେଳେ ତାଙ୍କୁ ପୁଣି ଥରେ ଟକ୍କର ଦେଉଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । କଂଗ୍ରେସର ଗଡ କୁହାଯାଉଥିବା ଆମେଠିରେ ଗୋଟିଏ ପଟେ ରହିଛି ଆନୁଗତ୍ୟ ଅପରପକ୍ଷରେ ରହିଛି ବାସ୍ତବ ସ୍ଥିତି । ଏହି ଭିଭିଆଇ ସଂସଦୀୟ କ୍ଷେତ୍ର ପୁଣି ଥରେ ଦେଖିବ ହେଭିୱେଟ ଲଢେଇ । ଏହି ଲୋକସଭା ଆସନକୁ ନିଜ ଅକ୍ତିଆରକୁ ନେବାକୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ବିରୋଧରେ ପୁଣି ଥରେ ବିଜେପି ପ୍ରାର୍ଥୀ ହୋଇଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ଆମେଠି ଲୋକସଭା ଆସନକୁ ହାତେଇବାକୁ କଂଗ୍ରେସ ଓ ବିଜେପି ମଧ୍ୟରେ ଜୋରଦାର ହେଉଛି ଟକ୍କର । ସ୍ମୃତି ଇରାନୀ ହାରିବା ସତ୍ୱେ ରାହୁଲ ଗାନ୍ଧୀଙ୍କ ଠାରୁ ଅଧିକ ଆମେଠି ଗସ୍ତ କରିଛନ୍ତି ବୋଲି ବିଜେପି କହୁଥିବା ବେଳେ ଏହାକୁ କାଉଁଟର କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ସବୁଠୁ ବଡ କଥା ହେଉଛି କଂଗ୍ରେସର ଗଡ ଆମେଠିରେ ସ୍ମୃତି ଇରାନୀ ବିଜେପି ପାଇଁ କ୍ଷେତ୍ର ପ୍ରସ୍ତୁତ କରିଛନ୍ତି । ଯେଉଁଠି ୧୯୭୭ ଓ ୧୯୯୮ରେ ମାତ୍ର ଦୁଇ ଥର କଂଗ୍ରେସ ପରାଜୟ ହୋଇଥିଲା ସେଠାରେ ପୁଣି କଂଗ୍ରେସର ବିଜୟକୁ ନେଇ ଆଶା ଆଶଙ୍କା ସୃଷ୍ଟି ହୋଇଛି । ଆମେଠିକୁ ନେଇ ନୂଆ ନୂଆ ସ୍ଲୋଗାନ ମଧ୍ୟ ମାହୋଲକୁ ସରଗରମ କରିଛି । ବିଜେପି ‘ଅବକି ବାର ଆମେଠି ହମାର୍’ ସ୍ଲୋଗାନ ଦେଉଥିବା ବେଳେ ଏହାକୁ ଟକ୍କର ଦେଉଛି କଂଗ୍ରେସର ସ୍ଲୋଗାନ । ଯେଉଁଥିରେ କୁହାଯାଇଛି ‘ଅବକି ବାର୍ ସ୍ମୃତି ଇରାନୀ କି ତିସରି ହାର୍, ରାହୁଲ ଜୀ କି ଜିତ୍ କା ଅନ୍ତର ୫ଲାଖ୍ କେ ପାର୍’ ।
୨୦୧୪ ନିର୍ବାଚନ ବେଳେ ରାହୁଲ ସନ୍ଦେଶ ଯାତ୍ରା ସତ୍ୱେ ଏହା ଭୋଟରେ ପରିଣତ ହେବାରେ ଏତେଟା ପ୍ରଭାବ ପକାଇନଥିଲା । କାରଣ ୨୦୦୯ରେ ରାହୁଲ ୩ଲକ୍ଷ ୭୦ହଜାର ଭୋଟରେ ଜିତିଥିବା ବେଳେ ୨୦୧୪ରେ ଏହା ଥିଲା ୧ଲକ୍ଷ ୭ହଜାର । ଏଥର ଆମେଠି ଆସନ ସହ କେରଳର ୱାୟନାଡ ଆସନରୁ ବି ନିର୍ବାଚନ ଲଢୁଛନ୍ତି କଂଗ୍ରେସ ଅଧ୍ୟକ୍ଷ । ତେବେ ଏହାକୁ ନେଇ ଆମେଠିରେ ତାଙ୍କ ବିରୋଧରେ ଲୋକେ ଅସନ୍ତୋଷ ପ୍ରକାଶ କରିଛନ୍ତି । ଅପରପକ୍ଷରେ ବିଜେପି ମଧ୍ୟ ଏହାର ଫାଇଦା ଉଠାଉଛି । ଆମେଠି ଆସନରୁ ରାହୁଲ ଜିତିବା ନେଇ ଦଳ ସଂଶୟରେ ରହିଛି ତେଣୁ ୱାୟନାଡରୁ ମଧ୍ୟ କଂଗ୍ରେସ ଅଧ୍ୟକ୍ଷ ନିର୍ବାଚନ ଲଢୁଛନ୍ତି ବୋଲି କହିଛି ବିଜେପି ।