ଏବେ ବି ଜଳୁଛି ଶିମିଳିପାଳ : ବ୍ୟାଘ୍ର ସଂରକ୍ଷଣ ପ୍ରକଳ୍ପର ୪୭ଟି ସ୍ଥାନରେ ଲାଗିଛି ନିଆଁ, ନାସାର ସାଟେଲାଇଟ ଚିତ୍ରରୁ ସ୍ପଷ୍ଟ
ପରିବେଶବିତଙ୍କ ଦାବି ଜଙ୍ଗଲ ନିଆଁ ବଢାଉଛି ତାତି; ସେପଟେ ନୀଳଗିରିର ଜଳୁଛି ଦେବଗିରି ପାହାଡ ଓ କଟକ ବାଙ୍କୀର ଶାଳ ଜଙ୍ଗଲ
କନକ ବ୍ୟୁରୋ : କିଛି ଦିନର ବ୍ୟବଧାନ ପରେ ପୁଣି ଫେରିଲା ଶିମିଳିପାଳର ନିଆଁ । ପୂର୍ବ ଭଳି ହୁହୁ ହୋଇ ଅତି ଭୟଙ୍କର ଭାବରେ ଜଳୁଛି ଶିମିଳିପାଳ ଜଙ୍ଗଲ । ଅନ୍ୟପଟେ ଗତ କିଛିଦିନ ଧରି ମୟୂରଭଞ୍ଜରେ ତାପମାତ୍ରା ୪୦ ଡିଗ୍ରିରୁ ଅଧିକ ରହି ଆସୁଥିବା ବେଳେ ଗତ ୩୦ ତାରିଖ ମଙ୍ଗଳବାରରେ ଓଜିମେଟର ରିପୋର୍ଟ ଅନୁସାରେ ବାରିପଦା ବିଶ୍ୱର ସବୁଠାରୁ ଉତ୍ତପ୍ତ ସହର ବୋଲି ଜଣାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବିଗତ ବର୍ଷ ତୁଳନାରେ ଚଳିତ ବର୍ଷ ମାତ୍ରାଧିକ ବା ରେକର୍ଡ ମାତ୍ରାର ଗ୍ରୀଷ୍ମପ୍ରବାହ ପାଇଁ କେବଳ ଶିମିଳିପାଳର ନିଆଁ ବୋଲି ପରିବେଶବିତ୍ ମାନେ ଦାବି କରିଛନ୍ତି । ଶିମିଳିପାଳର ଦୁଇଟି ରେଂଜ ତଥା ପୋଡାଡିବା ଏବଂ ଡୁକୁରା ରେଞ୍ଜରେ ଏବେ ବ୍ୟାପିବାରେ ଲାଗିଛି ନିଆଁ । ଏଥର ମଧ୍ୟ କୋର ଏରିଆରେ ନିଆଁ ଲାଗିଥିବା ଦାବି କରିଛନ୍ତି ପରିବେଶବିତ୍ । ନାସାର ରିପୋର୍ଟ ଅନୁସାରେ ଏବେ ବି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ୪୭ଟି ଜାଗାରେ ନିଆଁ ଲାଗିଛି । ପୋଡାଡିହା ରେଞ୍ଜର ଅନନ୍ତପୁର, ବାଲିନାଳ ଏବଂ ଡୁକୁରା ରେଂଜର ମାଣିକପୁର, ବାଲମା ଆଦି ଅଂଚଳରେ ଭୟଙ୍କର ରୁପ ଧାରଣ କରିଛି ନିଆଁ ।
ଯାହାକୁ ନେଇ ଏବେ ଚିନ୍ତାରେ ଶିମିଳିପାଳ ପାଦରେ ବସବାସ କରୁଥିବା ଲୋକେ । ନିଆଁ ଏବେ ଜଙ୍ଗଲରୁ ଗାଁ ମାନଙ୍କୁ ମାଡିଆସୁଥିବା ବେଳେ ବନବିଭାଗ ଏଥିପ୍ରତି କୌଣସି ଦୃଷ୍ଟି ଆକର୍ଷଣ କରୁନଥିବା ଅଭିଯୋଗ ହୋଇଛି । ତେବେ ଦୁଇ ଦୁଇ ଥର ନିଆଁ ଲାଗିବା ଘଟଣା ଶିମିଳିପାଳ ପାଇଁ ଏକ ମହା ବିପଦ ବୋଲି କୁହାଯାଇପାରିବ ।