ରାଜ୍ୟକୁ ମିଳିବେ ନୂଆ ରାଜ୍ୟପାଳ  । ଆସନ୍ତାକାଲି ଶପଥ ଗ୍ରହଣ କରିବେ ରଘୁବର ଦାସ ।

କନକ ବ୍ୟୁରୋ: ନୂଆ ରାଜ୍ୟପାଳ ରଘୁବର ଦାସଙ୍କୁ ରାଜଭବନରେ ସ୍ୱାଗତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବାଚସ୍ପତି ପ୍ରମିଳା ମଲ୍ଲିକ, ମୁଖ୍ୟ ଶାସନ ସଚିବ ପ୍ରଦୀପ ଜେନା, ପୁଲିସ କମିଶନର ସୁନୀଲ ବଂଶଲ ପ୍ରମୁଖ ଉପସ୍ଥିତ ଥିଲେ । ରାଜ୍ୟପାଳ ସକାଳେ ଭୁବନେଶ୍ୱରରେ ପହଂଚିବା ପରେ ପୁରୀ ଯାଇ ଜଗାଦର୍ଶନ କରିଥିଲେ । ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାଶ ତାଙ୍କୁ ସ୍ୱାଗତ ଜଣାଇବା ସହ ଶ୍ରୀମନ୍ଦିରକୁ ପାଛୋଟି ନେଇଥିଲେ । ପ୍ରାୟ ଏକ ଘଂଟା କାଳ ଶ୍ରୀମନ୍ଦିରରେ ରହିବା ସହ ମହାପ୍ରଭୁଙ୍କୁ  ଦେଖି ଭାବବିହ୍ୱଳ  ହୋଇଥିଲେ ରଘୁବର ଦାସ । ଆସନ୍ତାକାଲି ରାଜ୍ୟର ୨୬ତମ ରାଜ୍ୟପାଳ ଭାବରେ ଶପଥ ଗ୍ରହଣ କରିବେ । କେନ୍ଦ୍ର ସରକାରଙ୍କ ବିକାଶର ଯୋଜନା କିପରି ତୃଣମୂଳ ସ୍ତରରେ ପଂହଚିପାରିବ । ତାକୁ ଗୁରୁତ୍ୱ ଦିଆଯିବ ବୋଲି ପ୍ରତିକ୍ରିୟା ରଖିଛନ୍ତି ନୂଆ ରାଜ୍ୟପାଳ ।

କୁହାଯାଏ, ୨୦୧୪ରେ ରଘୁବର ଦାସଙ୍କ ସଫଳ ଗୋଟି ଚାଳନା ଯୋଗୁଁ ଜେଏମଏମ୍କୁ ହଟାଇ କ୍ଷମତାକୁ ପୁଣିଥରେ ଫେରିଥିଲା ବିଜେପି । ଅର୍ଥାତ ଝାଡ଼ଖଣ୍ଡ ରାଜନୀତିରେ ତାଙ୍କର ଅଖଣ୍ଡ ପ୍ରଭାବ ରହି ଆସିଛି । ନଜର ପକାନ୍ତୁ, ରଘୁବର ଦାସଙ୍କ ରାଜନୈତିକ କ୍ୟାରିୟର ଉପରେ :

୨୦୧୪ରୁ ୨୦୧୯ ପର୍ଯ୍ୟନ୍ତ ଝାଡ଼ଖଣ୍ଡର ମୁଖ୍ୟମନ୍ତ୍ରୀ

ଝାଡ଼ଖଣ୍ଡର ପ୍ରଥମ ଅଣ-ଆଦିବାସୀ ମୁଖ୍ୟମନ୍ତ୍ରୀ

୨୦୦୯ ଶିବୁ ସୋରେନ ସରକାରରେ ୫ମାସ ପାଇଁ ଉପ-ମୁଖ୍ୟମନ୍ତ୍ରୀ

୧୯୮୦ରେ ପ୍ରତିଷ୍ଠାତା ସଦସ୍ୟ ଭାବେ ବିଜେପିରେ ଯୋଗଦାନ

୧୯୯୫ରେ ପ୍ରଥମେ ବିଧାୟକ ଭାବେ ନିର୍ବାଚିତ

ଜାମସେଦପୁର-ଇଷ୍ଟରୁ ୫ ଥର ବିଧାୟକ ହୋଇଛନ୍ତି ରଘୁବର ଦାସ

ଦୁଇ ଥର ଝାଡ଼ଖଣ୍ଡ ବିଜେପିର ସଭାପତି ହୋଇଛନ୍ତି

୨୦୧୯ରେ ତାଙ୍କ ନେତୃତ୍ୱରେ ନିର୍ବାଚନ ଲଢ଼ିଥିଲା ବିଜେପି

ଜେଏମଏମ୍ ପୁଣିଥରେ ସରକାର ଗଢ଼ିଥିଲା

ଜାମସେଦପୁର-ଇଷ୍ଟରୁ ନିର୍ବାଚନ ହାରିଥିଲେ ରଘୁବର ଦାସ

କୁହାଯାଉଛି, ଝାଡ଼ଖଣ୍ଡରେ ବିଜେପିର ଗୋଷ୍ଠୀକନ୍ଦଳକୁ ଟାଳିବା ପାଇଁ ରଘୁବର ଦାସଙ୍କୁ ରାଜ୍ୟପାଳ ଭାବେ ନିଯୁକ୍ତି ଦେଇଛନ୍ତି କେନ୍ଦ୍ର ସରକାର । ରାଜନୀତି ଗୋଟିଚାଳନାରେ ସେ ବେଶ୍ ସିଦ୍ଧହସ୍ତ ।