ନ୍ୟୁଜିଲାଣ୍ଡ ଟିମରେ ଆଉ ଜଣେ ଭାରତୀୟ ବଂଶୋଦ୍ଭବ । ସଚିନ ଓ ଦ୍ରାବିଡଙ୍କ ସହ ରହିଛି ଖାସ୍ ସମ୍ପର୍କ, ଜାଣନ୍ତୁ କିଏ ଏହି ରଚୀନ ରବିନ୍ଦ୍ର ।
କନକ ବ୍ୟୁରୋ : ନ୍ୟୁଜିଲାଣ୍ଡ ଟିମରେ ଆଉ ଜଣେ ଭାରତୀୟ ବଂଶୋଦ୍ଭବ । ବୁଧବାର ଜୟପୁରରେ ଖେଳାଯାଇଥିବା ପ୍ରଥମ ଟି-୨୦ ମୁକାବିଲାରେ ନ୍ୟୁଜିଲାଣ୍ଡ ପରାଜିତ ହୋଇଥିଲା ସତ କିନ୍ତୁ ଟିମରେ ସ୍ଥାନ ପାଇଥିବା ଜଣେ ଖେଳାଳୀଙ୍କ ବାବଦରେ ଜାଣିବାକୁ ଚାହିଁଥିଲା ପୂରା ଦେଶ । ଭାରତ ବିପକ୍ଷ ପ୍ରଥମ ଟି-୨୦ ମୁକାବିଲାରେ ନ୍ୟୁଜିଲାଣ୍ଡ ପକ୍ଷରୁ ମୈଦାନକୁ ଓହ୍ଲାଇଥିଲେ ରଚିନ ରବୀନ୍ଦ୍ର । ନାଁ ସହ ଚେହେରା ବି ପୂରା ଭାରତୀୟଙ୍କ ଭଳି । ଆଉ ପଡିଆରେ ରଚୀନଙ୍କୁ ଦେଖିବା ପରେ ତାଙ୍କ ବାବଦରେ ଜାଣିବାକୁ କ୍ରିକେଟପ୍ରେମୀଙ୍କ ମଧ୍ୟରେ ଉତ୍ସାହ ବଢିଥିଲା । ଆଉ ମ୍ୟାଚ୍ ସରିବାର କିଛି ଘଣ୍ଟା ମଧ୍ୟରେ ରଚୀନଙ୍କୁ ନେଇ ଚର୍ଚ୍ଚା ହୋଇଥିଲା । କାରଣ ନ୍ୟୁଜିଲାଣ୍ଡ ପକ୍ଷରୁ ଖେଳୁଥିବା ୨୨ ବର୍ଷୀୟ ରଚୀନଙ୍କର ଭାରତ ସହ ବହୁ ଆଗରୁ ସମ୍ପର୍କ ରହିଛି । ଏପରିକି ଦୁଇ ଜଣ ଭାରତୀୟ କ୍ରିକେଟରଙ୍କ ନାଁ ସହ ରଚୀନଙ୍କ ନାଁର ସମ୍ପର୍କ ରହିଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ରଚୀନ ରବୀନ୍ଦ୍ରଙ୍କ ବାପା ଆର. କୃଷ୍ଣମୂର୍ତ୍ତି ୯୦ ଦଶକରେ କାର୍ଯ୍ୟ ଅନ୍ୱେଷଣରେ ନ୍ୟୁଜିଲାଣ୍ଡ ଚାଲି ଯାଇଥିଲେ । ଆଉ ସେଠାରେ ରଚୀନଙ୍କର ଜନ୍ମ ହୋଇଥିଲା । ରଚୀନଙ୍କ ବାପା ଆର କୃଷ୍ଣମୂର୍ତ୍ତିଙ୍କର କ୍ରିକେଟ ପ୍ରତି ଦୁର୍ବଳତା ରହିଥିଲା । ଏପରିକି କୃଷ୍ଣମୂର୍ତ୍ତି ଏବଂ ଭାରତର ପୂର୍ବତନ ବୋଲର ଶ୍ରୀନାଥ ଭଲ ସାଙ୍ଗ ମଧ୍ୟ । ଉଭୟ ବାଙ୍ଗାଲୋରରେ ସାଙ୍ଗ ହୋଇ କ୍ରିକେଟ ଖେଳିଛନ୍ତି । ଆଉ କ୍ରିକେଟ ପ୍ରତି ଥିବା ଦୁର୍ବଳତା ତାଙ୍କୁ ନ୍ୟୁଜିଲାଣ୍ଡରେ ଏକ କ୍ରିକେଟ କ୍ଲବ ଖୋଲିବାକୁ ପ୍ରେରଣା ଯୋଗାଇଥିଲା । ତେବେ ରଚୀନଙ୍କ ନାଁ ପଛରେ ଦୁଇ ଭାରତୀୟ କ୍ରିକେଟରଙ୍କ ନାଁ ଲୁଚି ରହିଛି ।
କୃଷ୍ଣମୂର୍ତ୍ତିଙ୍କ ଅନୁଯାୟୀ, ଭାରତର ଦୁଇ ଲୋକପ୍ରିୟ କ୍ରିକେଟର ସଚିନ ତେନ୍ଦୁଲକର ଓ ରାହୁଲ ଦ୍ରାବିଡଙ୍କ ନାଁରୁ ଅକ୍ଷରକୁ ଆଣି ରଚୀନଙ୍କ ନାଁ ରଖାଯାଇଛି । କାରଣ ରଚୀନଙ୍କ ବାପା କୃଷ୍ଣମୂର୍ତ୍ତି ଏହି ଦୁଇ ଭାରତୀୟ ଖେଳାଳୀଙ୍କର ବଡ ପ୍ରଂଶସକ । ରଚୀନ ଏହା ପୂର୍ବରୁ ମଧ୍ୟ ଭାରତରେ ଖେଳି ସାରିଛନ୍ତି । ଏହାସହ ନ୍ୟୁଜିଲାଣ୍ଡ ପକ୍ଷରୁ ୧୯ ବର୍ଷରୁ କମ ବିଶ୍ୱକପ ଟିମରେ ଖେଳି ସାରିଛନ୍ତି । ୨୦୧୬ ଓ ୨୦୧୮ରେ ୧୯ ବର୍ଷରୁ କମ ବିଶ୍ୱକପ ଟିମରେ ସ୍ଥାନ ପାଇବା ସହ ନ୍ୟୁଜିଲାଣ୍ଡ ପକ୍ଷରୁ ଖେଳିଛନ୍ତି ରଚୀନ । ନ୍ୟୁଜିଲାଣ୍ଡର ଘରୋଇ କ୍ରିକେଟରେ ଷ୍ଟାର ଖେଳାଳୀ ଭାବେ ରଚୀନ ଜଣାଶୁଣା । ୨୦୨୧ରେ ବାଂଲାଦେଶ ବିପକ୍ଷରେ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ନ୍ୟୁଜିଲାଣ୍ଡ ପକ୍ଷରୁ ପଦାର୍ପଣ କରିଥିଲେ ରଚୀନ । କିନ୍ତୁ ଏହି ସିରିଜରେ ନ୍ୟୁଜିଲାଣ୍ଡ ପରାଜିତ ହୋଇଥିଲା । ଏହାପରେ ଟିମ୍ ଇଣ୍ଡିଆ ବିରୋଧରେ ଖେଲିବାକୁ ରଚୀନ ସୁଯୋଗ ପାଇଥିଲେ । କିନ୍ତୁ ଏହି ମ୍ୟାଚରେ ସେଭଳି ଆଖିଦୃଶିଆ ପ୍ରଦର୍ଶନ କରିବାରେ ବିଫଳ ହୋଇଥିଲେ ରଚୀନ । ମାତ୍ର ୮ ବଲରୁ ୭ ରନ୍ କରିବାକୁ ସକ୍ଷମ ହୋଇଥିଲେ ରଚୀନ । ଏଯାବତ ମୋଟ ୬ଟି ଅର୍ନ୍ତଜାତୀୟ ଟି-୨୦ ମ୍ୟାଚ୍ ଖେଳିଥିବା ରଚୀନ ନ୍ୟୁଜିଲାଣ୍ଡ ପକ୍ଷରୁ ୬ଟି ୱିକେଟ ହାସଲ କରିଛନ୍ତି । କିନ୍ତୁ ଭାରତ ବିପକ୍ଷରେ ରଚୀନଙ୍କୁ ବୋଲିଂ କରିବାକୁ ମିଳିନଥିଲା ।