ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ପୂର୍ବ ଭାରତର ପ୍ରମୁଖ ରାଜ୍ୟ ଦଖଲ କରିବାକୁ ପ୍ରସ୍ତୁତ କରୁଥିବା ରଣନୀତି ଉପରେ ବଡ ପ୍ରଶ୍ନବାଚୀ ସୃଷ୍ଟି ହୋଇଛି । ବିଜେପିର ବରିଷ୍ଠ ନେତା, ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟ ତଥା ଦୁଇ ଥର ରାଜ୍ୟସଭା ସାଂସଦ ଥିବା ଚନ୍ଦନ ମିତ୍ର ଜାତୀୟ ଗଣମାଧ୍ୟମରେ ଏଭଳି ଗୋଟିଏ ଲେଖା ଲେଖି ବିତର୍କ ଆରମ୍ଭ କରିଛନ୍ତି । ଓଡିଶାରେ ମିଶନ ୧୨୦ର ନାରା ଧରି କାର୍ଯ୍ୟ କରୁଥିବା ବିଜେପିର ଚାଣକ୍ୟଙ୍କ ଗଣିତ ଉପରେ ପ୍ରଶ୍ନବାଚୀ ତିଆରି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମ ଦି ହିନ୍ଦୁସ୍ଥାନ ଟାଇମ୍ସରେ ଚନ୍ଦନ ମିତ୍ର ଲେଖିଛନ୍ତି,
ଓଡ଼ିଶା ଓ ପଶ୍ଚିମବଙ୍ଗରେ କାମ କରିବ ନାହିଁ ବିଜେପିର ଜାତି ଧ୍ରୁବୀକରଣ ଫର୍ମୁଲା । ବିରୋଧୀ ମୁକ୍ତ ଭାରତ ଅଭିଯାନରେ ପୂର୍ବାଂଚଳର ଦୁଇ ରାଜ୍ୟ ବେଙ୍ଗଲ ଓ ଓଡ଼ିଶାରେ ପ୍ରତିବନ୍ଧକର ସାମନା କରିବ ବିଜେପି । କିଛି ଦକ୍ଷିଣ ରାଜ୍ୟରେ ମଧ୍ୟ ବିଜେପିର ସ୍ଥିତି ଭଲ ନାହିଁ, କିନ୍ତୁ ପୂର୍ବାଂଚଳରେ ତା’ ଅପେକ୍ଷା ବଡ଼ ଚ୍ୟାଲେଂଜ ରହିଛି, କାରଣ ଦୁଇ ଶକ୍ତିଶାଳୀ ଆଂଚଳିକ ନେତା ମମତା ବାନାର୍ଜୀ ଏବଂ ନବୀନ ପଟ୍ଟନାୟକଙ୍କୁ ସାମନା କରିବାକୁ ପଡ଼ିବ । ଯେଉଁମାନଙ୍କ ଲୋକପ୍ରିୟତା କ୍ଷୟ ହେବା ଦେଖାଯାଉନାହିଁ, ଯଦିଓ ବିଭିନ୍ନ ବିବାଦରେ ସେମାନେ ଛନ୍ଦି ହୋଇଛନ୍ତି । ତେଣୁ ଯେତେବେଳେ ପୂର୍ବ ଭାରତରେ ବିଜୟ ପାଇଁ ରଣନୀତି ପ୍ରସ୍ତୁତି ହେଉଛି, ବିଜେପିର ଆଧିପତ୍ୟ ଥିବା ଉତ୍ତର ଭାରତ ଓ ପଶ୍ଚିମ ଭାରତ ଭଳି ରଣନୀତି ବଦଳାଇ ନୂଆ ଆଭିମୁଖ୍ୟ ଗ୍ରହଣ କରିବାକୁ ପଡ଼ିବ । ଯେହେତୁ ପୂର୍ବାଂଚଳରେ ଜାତି ନିର୍ବାଚନରେ ନିର୍ଣ୍ଣାୟକ ଭୂମିକା ନେଇନଥାଏ, ତେଣୁ ଉତ୍ତର ଭାରତ ଭଳି ବିଜେପିର ଜାତି ଫର୍ମୁଲା ଏଠାରେ କାମ କରିବ ନାହିଁ ।
ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଓଡ଼ିଶାରେ ୧୨୦ରୁ ଅଧିକ ଆସନରେ ଜିତିବା ନେଇ ଦୃଢୋକ୍ତି ଦେଖାଇବା ପରେ ଏଭଳି କଡା ଲେଖା ବିଜେପି କ୍ୟାମ୍ପକୁ ମଧ୍ୟ ବିଚଳିତ କରିଥିବା ଚର୍ଚ୍ଚା ହେଉଛି । ଅମିତ ଶାହାଙ୍କ ଗଣିତକୁ ପରୋକ୍ଷରେ ଭୁଲ ବୋଲି ଇସାରା କରିଛନ୍ତି ଚନ୍ଦନ ମିତ୍ର । ସେ କହିଛନ୍ତି ଉଭୟ ତୃଣମୂଳ କଂଗ୍ରେସ ଓ ବିଜେଡି ଅଟଳବିହାରି ବାଜପାୟୀଙ୍କ ସରକାରରେ ଭାଗିଦାରୀ ଥିଲେ । ହେଲେ ୨୦୦୯ରେ ଏନଡିଏରୁ ବାହାରି ଆସି ଏକଲା ଚଲୋ ନୀତିରେ ବିପୁଳ ଜନ ସମର୍ଥନ ହାସଲ କରିଛନ୍ତି । ଲଗାତାର ଦୁଇଟି ନିର୍ବାଚନରେ ଜନମତ ପାଇ ସରକାର ଗଢିଛନ୍ତି । ୨୦୧୪ରେ ମୋଦିଙ୍କ ଲହରି ସାରା ଦେଶରେ ଚାଲିଥିବା ବେଳେ ପ୍ରଭାବିତ ହୋଇନାହିଁ ଦୁଇ ରାଜ୍ୟ ।
ଚନ୍ଦନ ମିତ୍ର ଆହୁରି ମଧ୍ୟ ଲେଖିଛନ୍ତି, ଦୁଇ ରାଜ୍ୟରେ ବିଜେପିର ଭୋଟ ଭାଗ ବଢିଛି । ହେଲେ ତୃଣମୂଳ କଂଗ୍ରେସ ଓ ବିଜେଡିର ବିକଳ୍ପ ଭାବେ ଦଳ ନିଜକୁ ଠିଆ କରିପାରିନାହିଁ । ୨୦୧୯ ନିର୍ବାଚନରେ ଉଭୟ ଲୋକସଭା ଓ ବିଧାନସଭା ପାଇଁ ଓଡ଼ିଶାରେ ନିର୍ବାଚନ ହେବ । ମାତ୍ର କଡ଼ା ଟକ୍କର ପାଇଁ ଦଳ ଉଦ୍ୟମ କରିପାରେ । ଉଭୟ ପଶ୍ଚିମବଙ୍ଗ କିମ୍ବା ଓଡିଶାରେ ବିଜେପିର ବିଜୟ ଏଠାରେ ଏତେ ସହଜ ନୁହେଁ । ସିଧାସଳଖ ଭାବେ ଦଳୀୟ ଅଧ୍ୟକ୍ଷଙ୍କ ଗଣିତ ଓ ରଣନୀତିକୁ ସମାଲୋଚନା କରିଛନ୍ତି ଚନ୍ଦନ ମିତ୍ର ।
ଲେଖାକୁ ନେଇ ବିଜେପିର ରାଜ୍ୟ ଉପସଭାପତି ସମୀର ମହାନ୍ତି ପ୍ରତିକ୍ରିୟା ରଖିଛନ୍ତି । ସାମ୍ବାଦିକଙ୍କ ସୂଚନା ଦେଇ କହିଛନ୍ତି,
ଚନ୍ଦନ ମିତ୍ରଙ୍କ ସନ୍ଦେହକୁ ଭୁଲ ପ୍ରମାଣିତ କରାଯିବ, ମିଶନ ୧୨୦କୁ ସାକାର ହେବ । ଚନ୍ଦନ ମିତ୍ର ହେଉଛନ୍ତି ପଶ୍ଚିମବଙ୍ଗର ବ୍ୟକ୍ତି, ସେହି ରାଜ୍ୟ ବାବଦରେ କହିଥିଲେ ଭଲ ହୋଇଥାନ୍ତା । ଓଡିଶାର ଭାଜପା କର୍ମକର୍ତ୍ତା ତାଙ୍କ ସନ୍ଦେହକୁ ଭୁଲ ପ୍ରମାଣିତ କରିବେ । ଚନ୍ଦନ ମିତ୍ରଙ୍କ ଦୀର୍ଘ ବର୍ଷ ହେବ ଓଡିଶା ସହ ସଂପର୍କ ନାହିଁ । ଭୋଟରଙ୍କ ମନ ପରିବର୍ତ୍ତନ ବାବଦରେ ବୋଧହୁଏ ତାଙ୍କ ପାଖରେ ତଥ୍ୟ ନାହିଁ । ପଂଚାୟତ ନିର୍ବାଚନରେ ବଡ ପରିବର୍ତ୍ତନର ସଂକେତ ଦେଇଛନ୍ତି ଭୋଟର । ଲେଖା ପ୍ରାୟୋଜିତ ହୋଇପାରେ ବୋଲି ଦଳ କହିଛି । ଶ୍ରେଷ୍ଠ ପ୍ରଶାସକଙ୍କ ଦଳର ଅର୍ଥାତ୍ ବିଜୁ ଜନତା ଦଳ ପ୍ରାୟୋଜିତ ଲେଖା ବାହାର କରିଥାଇପାରେ ବୋଲି ସମୀର ମହାନ୍ତି ଅଭିଯୋଗ ଆଣିଛନ୍ତି ।
ବିଜୁ ଜନତା ଦଳ ସମୟକୁ ସୁଯୋଗରେ ପରିଣତ କରିବାର ଅବସର ଛାଡିନାହିଁ । ସରକାରୀ ଦଳ ମୁଖ୍ୟ ସଚେତକ ଅମର ପ୍ରସାଦ ଶତପଥୀ କହିଛନ୍ତି,
ଯଦି ଚନ୍ଦନ ମିତ୍ରଙ୍କ ବକ୍ତବ୍ୟ ପ୍ରାୟୋଜିତ, ତେବେ ମିଶନ ୧୨୦ର କଥା କହୁଥିବା ଅମିତ ଶାହାଙ୍କ ବକ୍ତବ୍ୟ କାହା ପ୍ରାୟୋଜିତ? ଅମିତ ଶାହାଙ୍କ ବକ୍ତବ୍ୟ ଉପରେ ଚନ୍ଦନ ସନ୍ଦେହ ଦେଖାଇଛନ୍ତି । ଚନ୍ଦନ ମିତ୍ର ଓଡିଶା ସାଂଗଠନିକ ଦାୟିତ୍ୱରେ ଥିଲେ, ତେଣୁ ରାଜନୈତିକ ଚିତ୍ରକୁ ସେ ବେଶ ଭଲ ଭାବେ ବୁଝିଛନ୍ତି । ବାସ୍ତବତାକୁ ଅଧାର କରି ମତ ରଖିଛନ୍ତି ଚନ୍ଦନ ମିତ୍ର । ଲେଖା ପ୍ରାୟୋଜିତ ନେଇ ବିଜେପି ଯେଉଁ ଅଭିଯୋଗ ଆଣିଛି ତାହା ଭିତ୍ତିହୀନ । ନିଜ ଦଳର ସ୍ଥିତିକୁ ବିଜେପି ସଠିକ ଭାବେ ଅନୁଶୀଳନ କରୁ ବୋଲି ବିଜୁ ଜନତା ଦଳ କହିଛି ।
ତେବେ ବଡ କଥା ହେଉଛି, ଜଣେ ଜାତୀୟ ସ୍ତରର ନେତା ଚନ୍ଦନ ମିତ୍ର, ଅମିତ ଶାହାଙ୍କ ଗଣିତ ନେଇ ପ୍ରଶ୍ନ ଉଠାଇବା ପରେ ବିଜୁ ଜନତା ଦଳକୁ ମୈାକା ମିଳିଯାଇଛି । ଖାସ କରି ଯେତେବେଳେ ବିଜେଡି ସାଂସଦ ଦଳ ବିରୌଧୀ ଲେଖା ମାନ ଲେଖି ନବୀନଙ୍କୁ ବିଚଳିତ କରୁଥିଲେ, ଠିକ ସେତିକି ବେଳେ ସମାନ ଫର୍ମୁଲାରେ ଆଗକୁ ବଢିଛନ୍ତି ଅମିତ ଶାହା । ବିରୋଧୀ ବିଜେଡି ଏହାକୁ ପ୍ରସଙ୍ଗ କରି ସଫା ସଫା କହୁଛି, ଆଗ ନିଜ ଦଳରେ ଠିକ କରନ୍ତୁ, ଓଡିଶାରେ କେତେ ଆସନ ଜିତିବ ବିଜେପି ।
ଅମିତ ଶାହା ନିକଟରେ ତିନି ଦିନିଆ ଓଡିଶା ଗସ୍ତରେ ଆସି ବିଜେଡି ସୁପ୍ରିମୋଙ୍କୁ ସମାଲୋଚନା କରିଥିଲେ । ସାମ୍ବାଦିକ ସମ୍ମିଳନୀରେ ଅମିତ ଶାହା କହିଥିଲେ, ଗତ ୩ ବର୍ଷରେ କେନ୍ଦ୍ର ପାଖାପାଖି ୪ ଲକ୍ଷ କୋଟି ଟଙ୍କା ଦେଇଛି । ସ୍ୱାଧୀନତା ପରେ ପ୍ରଥମ ଥର ପାଇଁ ଓଡିଶାକୁ ଏତେ ସହାୟତା କେନ୍ଦ୍ରରୁ ଆସିଛି । ରାଜ୍ୟ ସରକାର ଅର୍ଥ ଲୋକଙ୍କ ପାଖରେ ପହଂଚାଇବାରେ ବିଫଳ ହୋଇଛନ୍ତି । ବିଜେପି ୧୨୦ ସିଟ ଜିତି ୨୦୧୯ରେ ରାଜ୍ୟରେ ସରକାର ଗଠନ କରିବ । ବିଗତ ବର୍ଷରେ ଅନ୍ୟ ରାଜ୍ୟ ତୁଳନାରେ ଓଡିଶାରେ ବିକାଶ କମ୍ ହୋଇଛି । ଯଦି ବିଜେଡି ବିକାଶ କରିପାରୁନି, ସତ୍ତାରେ ରହିବାର ଅଧିକାର ନାହିଁ । ଓଡିଶାରେ ମେଂଟ ନୁହେଁ ନିର୍ବାଚନ ଏକାକୀ ନିର୍ବାଚନ ଲଢି ବିଜେପି ସରକାର ଗଢିବ ବୋଲି ଦୃଢୋକ୍ତି ଦେଖାଇଥିଲେ ଶାହା । ମାଗାଜିନରୁ ପୁରସ୍କାର ନେଲେ ବିକାଶ ହେବ ନାହିଁ ବୋଲି ନବୀନଙ୍କୁ କରିଥିଲେ କଟାକ୍ଷ। ୧୨୦ ମିଶନ ଯାହାକୁ ଅସମ୍ଭବ ଲାଗୁଛି, ତାଙ୍କ ବୟସ ଅଧିକ ହେଲାଣି ବୋଲି ବାଣ ମାରିଥିଲେ ଅମିତ ଶାହା ।
ଯଦି ବର୍ତ୍ତମାନ ଚନ୍ଦନ ମିତ୍ର ମିଶନ ୧୨୦କୁ ନେଇ ସନ୍ଦେହ ପ୍ରକଟ କରୁଛନ୍ତି, ଏହା ପଛରେ କଣ ତାଙ୍କର ବୟସ ଅଧିକା ହେବା ଏକ କାରଣ କି? ସାଧାରଣରେ ଏହି ପ୍ରଶ୍ନ ଉଠିବ, କାହିଁକିନା ନବୀନ ପଟ୍ଟନାୟକ ଯେତେବେଳେ ଏହି ୧୨୦ ଆସନ ଉପରେ ସନ୍ଦେହ ପ୍ରକଟ କରିଥିଲେ, ସେତେବେଳେ ଅମିତ ଶାହା କହିଥିଲେ ଯେ ଯାହାର ବୟସ ଅଧିକ ହୋଇଛି, ତାଙ୍କୁ ଏହି ସଂଖ୍ୟା ଉପରେ ସନ୍ଦେହ ଆସିବ । ନବୀନ ପଟ୍ଟନାୟକଙ୍କୁ ୭୦ ବର୍ଷ ହୋଇଥିବା ବେଳେ ଚନ୍ଦନ ମିତ୍ରଙ୍କୁ ୬୧ ବର୍ଷ । ଦେଖିବାକୁ ଗଲେ ନବୀନଙ୍କ ଠାରୁ ଚନ୍ଦନ ବୟସରେ ସାନ । ସେହିଭଳି ଅମିତ ଶାହାଙ୍କ ବୟସ ୫୨ ବର୍ଷ । ସେ ଦୃଷ୍ଟିରୁ ହୁଏତ ଯାହା ଅମିତଙ୍କ ପାଇଁ ସମ୍ଭବ ତାହା ଅନ୍ୟମାନଙ୍କ ପାଇଁ ଅସମ୍ଭବ । ଏଭଳି କିଛି ଚର୍ଚ୍ଚା ଏବେ ରାଜ୍ୟ ରାଜନୀତିକୁ ସରଗରମ କରିଛି । ସୀମିତ ଅଙ୍କ ଆଉ ଅସୀମିତ ଆଶାରେ ରହିଛନ୍ତି ଓଡିଶାର ତମାମ ରାଜନୈତିକ ଦଳ । ୨୦୧୯ରେ କିଏ ଜିତିବ କେତେ ଆସନ ତାକୁ ନେଇ ବିତର୍କ ଜୋରଦାର ଚାଲିଛି । ବିଜେପିର ୧୨୦କୁ ଚାଲେଂଜ କରି ବିଜେଡି କହିଥିଲା ୧୨୩ ଆସନ ଜିତି ସରକାର ଗଠନ କରିବୁ । ସେହିଭଳି କଂଗ୍ରେସ କହିଥିଲା ଆମେ ଜିତିବୁ ୮୫ ଆସନ । ଓଡିଶାର ବିଧାନସଭା ଆସନ ସଂଖ୍ୟା ୧୪୭ ଥିବା ବେଳେ, କାହାର ସଂଖ୍ୟା ସଠିକ ହେବ ତାକୁ ନେଇ ଚାଲିଛି ଅଙ୍କକଷା । କିନ୍ତୁ ଜଣଙ୍କର ଯେ ଅଙ୍କ ଭୁଲ ଏହା, ଏହା ଥୟ ।
ଭୋଟ୍ ଗଣିତ ଉପରେ ଏବେ ନଜର ପକାଇବା । ପଂଚାୟତ ନିର୍ବାଚନ ପରେ ରାଜ୍ୟରେ ୨ ନମ୍ବର ଦଳ ବିଜେପି । ରାଜ୍ୟ ରାଜନୀତିରେ ପ୍ରଥମେ ଥର ପାଇଁ କଂଗ୍ରେସ ୩ ନମ୍ବର ସ୍ଥାନକୁ ଖସିଛି । ସମୀକ୍ଷକଙ୍କ ମତ, ବିଜେଡି ପାଇଁ ବିଜେପି ଆଡୁ ଅଧିକ ବିପଦ ଅଛି । ପଂଚାୟତ ନିର୍ବାଚନରେ ଯଦିଓ ୪୭୩ ଆସନ ସହ ୧ ନମ୍ବର ସ୍ଥାନରେ ବିଜେଡି ରହିଲା ତେବେ ୨୦୧୨ ତୁଳନାରେ କିନ୍ତୁ ୨୫% ଆସନ ହରାଇଥିଲା ବିଜେଡି । ଅପରପକ୍ଷରେ ୨୯୭ ଆସନରେ ବାଜିମାତ୍ କଲା ବିଜେପି । ୨୦୧୨ ତୁଳନାରେ ବିଜେପି ୯ ଗୁଣା ଅଧିକ ଆସନ ପାଇଲା । ନିର୍ବାଚନରେ ମାତ୍ର ୬୦ ଆସନରେ ଜିତିଥିଲା କଂଗ୍ରେସ । ୨୦୧୨ ତୁଳନାରେ କଂଗ୍ରେସ ଅଧାରୁ ଅଧିକ ଆସନ ହରାଇଲା ।
କନକ ନ୍ୟୁଜକୁ ସ୍ୱତନ୍ତ୍ର ସାକ୍ଷାତକାର ଦେଇ କିଛି ଦିନ ଆଗରୁ ଧର୍ମେନ୍ଦ୍ର ପ୍ରଧାନ କହିଥିଲେ, ଆଜି ନିର୍ବାଚନ ହେଲେ ବିଜେପି ୧୨୦ ଆସନ ଜିତିବ । କୈାଣସି ବି ପରିସ୍ଥିତିରେ ବିଜେଡି ସହ ମେଂଟ ହେବନି । ଆଗାମୀ ନିର୍ବାଚନ ଓଡିଶାରୁ ଲଢି ରାଜ୍ୟର ପ୍ରତିନିଧିତ୍ୱ କରିବି ।ଅମିତ ଶାହା ଯେଉଁ ସଂଖ୍ୟା କୁହନ୍ତି, ତାହା ସତ ହୁଏ। ଉତ୍ତରପ୍ରଦେଶ ଏହାର ଉଦାହରଣ, ଓଡିଶାରେ ମଧ୍ୟ ସଫଳ ହେବ । ତେବେ ଦଳର ବରିଷ୍ଠ ନେତା ଚନ୍ଦନ ମିତ୍ର ଯିଏ ପୂର୍ବରୁ ଓଡିଶା ପ୍ରଭାରୀ ରହିସାରିଛନ୍ତି, ସେ ପ୍ରଶ୍ନ ଉଠାଇବା ପରେ ରାଜନୈତିକ ଝଡ ଆରମ୍ଭ ହୋଇଛି । ଖାଲି ଚନ୍ଦନ ମିତ୍ର ନୁହଁନ୍ତି, ପୂର୍ବରୁ ଏହି ସଂଖ୍ୟାକୁ ନେଇ ବରିଷ୍ଠ ବିଜେପି ନେତା ବିଜୟ ମହାପାତ୍ର ମଧ୍ୟ ପ୍ରଶ୍ନ ଉଠାଇଥିଲେ । କେଉଁ ଆଧାରରେ ଦଳ ରାଜ୍ୟରେ ସଂଖ୍ୟା ପାଇବ ବୋଲି ସେ ପ୍ରଶ୍ନ କରିଥିଲେ । ପଂଚାୟତ ନିର୍ବାଚନ ପରେ ଉପ-ନିର୍ବାଚନରେ ଦଳ ହାରିଥିଲା, ନୁଆପଡାରେ ଅର୍ଥାତ୍ ରାଜ୍ୟ ସଭାପତିଙ୍କ ଜିଲ୍ଲାରେ ଦଳ ଖାତା ଖୋଲିପାରିଲା ନାହିଁ । ଏଭଳି ସ୍ଥିତିରେ ଦଳ କେମିତି ଜିତିବ ବୋଲି ପ୍ରଶ୍ନ ଉଠାଇଥଲେ ବିଜୟ ମହାପାତ୍ର । ଆଉ ଯାହାପରେ ବିଜେପି ରାଜ୍ୟଶାଖା ପକ୍ଷରୁ ତାଙ୍କୁ କଡା ଜବାବ ଦିଆଯାଇଥିଲା ।
ବିଜେଡି-ବିଜେପି ସଂପର୍କ ଉପରେ ଏବେ ନଜର ପକାଇବା ।୨୦୦୯ ପୂର୍ବରୁ ବିଜେପି-ବିଜେଡି ମେଂଟ ଭାଙ୍ଗିଥିଲା । ଆଉ ଏହି ସମୟରେ ଚନ୍ଦନ ମିତ୍ର ବିଜେପିର ଦୁତ ଭାବେ ଦିଲ୍ଲୀରୁ ଆସିଥିଲେ । ଦୁଇ ଦୁଇ ଥର ରାଜ୍ୟରେ ମେଂଟ ସରକାର ଥିଲା । ବିଜେପି ସହ ମେଂଟ କରି ବିଜେଡି ଆସିଥିଲା କ୍ଷମତାକୁ । ରାଜ୍ୟରେ ଏବେ ବିଜେଡିର ଶତ୍ରୁ ବିଜେପି । ପଂଚାୟତ ନିର୍ବାଚନରେ ବିଜେଡିକୁ ଟକ୍କର ଦେଇଛି ବିଜେପି । ନବୀନ, ମୋଦିଙ୍କ ଅନେକ ନିଷ୍ପତ୍ତିକୁ ଦେଇଛନ୍ତି ସମର୍ଥନ । ରାଷ୍ଟ୍ରପତି ନିର୍ବାଚନ ଠାରୁ ଜିଏସଟି ଯାଏଁ ସମର୍ଥନର ହାତ ବଢାଇଛନ୍ତି ନବୀନ । ବିମୁଦ୍ରାକରଣ ନିଷ୍ପତିକୁ ବି ନବୀନ ଦେଇଥିଲେ ସମର୍ଥନ । ଅତୀତର ସଂପର୍କ ଆଉ ବର୍ତ୍ତମାନର ତିକ୍ତତା ଭିତରେ ପ୍ରଭାବ ବିସ୍ତାର କରିଛି ସଂଖ୍ୟା ଗଣିତ । ବିଜେପି ମିଶନ ଓଡିଶା ଧରି ଆଗକୁ ବଢିବାକୁ ସବୁ ସ୍ତରରେ ରଣନୀତି ତିଆରି କରୁଛି । ପୂର୍ବ ଭାରତକୁ ଶକ୍ତି ବୃଦ୍ଧି କରିବାକୁ ଯୋଜନା କରୁଛି । ପଶ୍ଚିମରେ ଦୁର୍ବଳ ହେଉଥିବାରୁ ମିଶନ୍ ପୂର୍ବ ଭାରତ ଧରି କାମ କରୁଛନ୍ତି ଅମିତ ଶାହା । ହେଲେ ଓଡିଶାରେ ବିଜେପି ସାମ୍ନାରେ ନବୀନ ଚାଲେଂଜ ରହିଛି । ପଶ୍ଚିମବଙ୍ଗରେ ମଧ୍ୟ ମୋଦିଙ୍କ ସାମ୍ନାରେ ମମତା ଚାଲେଂଜ । ଯାହାକୁ ଖୋଲାଖୋଲି ସ୍ୱୀକାର କରିଛନ୍ତି ଚନ୍ଦନ ମିତ୍ର । ଏହାରି ଭିତରେ ନଜର ରହିବ ଚନ୍ଦନ ମିତ୍ରଙ୍କ ସନ୍ଦେହ ସତ ହେଉଛି ନା ବିଜେପି ଚାଣକ୍ୟଙ୍କ ଗଣିତ ।