କନକ ବ୍ୟୁରୋ : ଟି-୨୦ ବିଶ୍ୱକପ ଶେଷ ହୋଇଛି । କିନ୍ତୁ ଏହା ଭିତରେ ଦିନିକିଆ ବିଶ୍ୱକପକୁ ନେଇ ଆଇସିସି ବଡ ଘୋଷଣା କରିଛି । ତେବେ ୨୦୨୭ରେ ହେବାକୁ ଥିବା ଦିନିକିଆ ବିଶ୍ୱକପରେ ୧୦ଟି ଟିମ୍ ବଦଳରେ ୧୪ଟିମ ଟାଇଟଲ ପାଇଁ ମୈଦାନକୁ ଓହ୍ଲାଇବେ । ତେବେ ୨୦୨୩ରେ ଭାରତରେ ହେବାକୁ ଥିବା ଦିନିକିଆ ବିଶ୍ୱକପରେ ୧୦ଟି ଦଳ ହିଁ ଭାଗ ନେବେ । କିନ୍ତୁ ୨୦୨୭ରେ ହେବାକୁ ଥିବା ବିଶ୍ୱକପରେ ୧୦ଟି ଟିମ୍ ରାକିଙ୍ଗ ଆଧାରରେ ସିଧାସଳଖ ବିଶ୍ୱକପ ମ୍ୟାଚ୍ ପାଇଁ ଟିକେଟ ହାତେଇବେ । ଅନ୍ୟ ୪ଟି ଦଳ କ୍ୱାଲିଫାୟର ମ୍ୟାଚ୍ ଆଧାରରେ ଟୁର୍ଣ୍ଣାମେଣ୍ଟରେ ଟିକେଟ ହାତେଇବେ । କ୍ରିକେଟ ଖେଳୁଥିବା ଛୋଟ ଦେଶ ଗୁଡିକୁ ଏହି ଟୁର୍ଣ୍ଣାମେଣ୍ଟରେ ଯୋଡିବାକୁ ଆଇସିସି ଏଭଳି ପଦକ୍ଷେପ ନେଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୨୭ରେ ହେବାକୁ ଥିବା ଦିନିକିଆ ବିଶ୍ୱକପରେ କିଛି ପରିବର୍ତ୍ତନ ପାଇଁ ଦିଆଯାଇଥିବା ପ୍ରସ୍ତାବକୁ ଗ୍ରୀନ୍ ସିଗନାଲ ଦେଇଛି ଆଇସିସି । ଏହାଛଡା ୨୦୨୩ ବିଶ୍ୱକପ୍ ପାଇଁ ଆଇସିସି ୧୩ ଟିମ୍ ମଧ୍ୟରେ ସୁପର ଲିଗ୍ ଆରମ୍ଭ କରିବାକୁ ଯାଉଛି । ଏଥିରେ ୧୨ଟି ପୂର୍ଣ୍ଣ ସଦସ୍ୟ ଥିବା ଟିମ୍ ସହ ନେଦରଲାଣ୍ଡକୁ ସୁଯୋଗ ଦିଆଯାଇଛି । ଯେଉଁଥିରେ ପ୍ରତ୍ୟେକ ଦଳ ୮ଟି ଲେଖାଏଁ ସିରିଜ ଖେଳିବେ । ହୋମଗ୍ରାଉଣ୍ଡରେ ୪ଟି ଓ ବିଦେଶ ମାଟିରେ ୪ଟି ଲେଖାଏଁ ସିରିଜ ଖେଳିବେ । କିନ୍ତୁ ୨୦୨୭ ବିଶ୍ୱକପରେ ଟିମ ସଂଖ୍ୟା ବୃଦ୍ଧି ସହ ଏହି ନିୟମକୁ ଉଠାଇ ଦେଇଛି ଆଇସିସି । ୨୦୨୭ ବିଶ୍ୱକପର ଆୟୋଜନ ଜିମ୍ବାୱେ, ନାମିବିଆ ଓ ଦକ୍ଷିଣ ଆଫ୍ରିକା ମିଳିତ ଭାବେ କରିବେ । ମଙ୍ଗଳବାର ଆଇସିସି ୨୦୨୪ରୁ ୨୦୩୧ ମଧ୍ୟରେ ହେବାକୁ ଥିବା ଆଇସିସି ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ଜାରି କରିଥିଲା । ଯେଉଁଥିରେ ଭାରତକୁ ୩ଟି ବଡ ଟୁର୍ଣ୍ଣାମେଣ୍ଟ ଆୟୋଜନ ପାଇଁ ଗ୍ରୀନ୍ ସିଗନାଲ ମିଳିଛି । ୨୦୨୬ ଟି-୨୦ ବିଶ୍ୱକପ ସହ ୨୦୨୯ ଚାମ୍ପିୟନ୍ସ ଟ୍ରଫି ଓ ୨୦୩୧ ବିଶ୍ୱକପ ଆୟୋଜନର ଭାର ଭାରତ ଉପରେ ନ୍ୟସ୍ତ କରିଛି ଆଇସିସି ।