ବାପା ହେବ ତ ଏମିତି ! ମାଟ୍ରିକ ପରୀକ୍ଷାରେ ପୁଅ ଫେଲ୍ ହେବାରୁ ଗାଁ ଲୋକଙ୍କୁ ମିଠା ବାଣ୍ଟିଲେ ବାପା।

ମଧ୍ୟପ୍ରଦେଶରେ ଗତକାଲି ଦଶମ ଏବଂ ଦ୍ୱାଦଶ ଶ୍ରେଣୀର ପରୀକ୍ଷା ଫଳ ପ୍ରକାଶ ପାଇଥିଲା । ଫଳାଫଳ ପ୍ରକାଶ ପାଇବା ପରେ ପାସ୍‌ ହାର ଅପେକ୍ଷା ଫେଲ୍‌ ହାର୍‌ ଅଧିକ ରହିଥିଲା । ବୁନ୍ଦେଲଗଡ଼ ଜିଲ୍ଲାର ଖଜରାହଠାରେ ଜଣେ ଛାତ୍ର ପରୀକ୍ଷା ଫଳ ପ୍ରକାଶ ପରେ ନିରାଶ ହୋଇ ଆତ୍ମହତ୍ୟା ମଧ୍ୟ କରିଥିବା ଖବର ଆସିଥିଲା । ତେବେ ଏବେ ସବୁ ଘଟଣା ମଧ୍ୟରେ ଗୋଟେ ପରିବାର ପୁଅ ଦଶମ ବୋର୍ଡ଼ ପରୀକ୍ଷାରେ ୪ଟି ବିଷୟରେ ଅସଫଳ ହେବା ପରେ ମିଠା ବାଣ୍ଟିବା ଖବର ସମସ୍ତଙ୍କୁ ଆଶ୍ଚର୍ୟ୍ୟ କରିଛି । ଛାତ୍ରଙ୍କ ବାପା ଗାଁର ସବୁ ଲୋକଙ୍କୁ ମିଠା ବାଣ୍ଟିବା ସହ ବାଣ ଫୁଟାଇଥିବା ଜଣାପଡ଼ିଛି ।

ସୁଚନା ମୁତାବକ, ପରୀକ୍ଷା ଫଳ ପ୍ରକାଶ ପରେ ସରସ୍ୱତୀ ଶିଶୁ ବିଦ୍ୟାମନ୍ଦର ଶିବାଜୀ ବୋର୍ଡ଼ରେ ପଢ଼ୁଥିବା ଆଶୁ ବ୍ୟାସ୍‌ ନାମକ ଛାତ୍ର ୬ ଟି ବିଷୟରୁ ୪ଟି ବିଷୟରେ ଅସଫଳ ହୋଇଥିଲେ । ପୁଅର ଫେଲ୍ ହେବା କଥା ଶୁଣି ଆଶୁଙ୍କ ବାପା ସୁରେନ୍ଦ୍ର କୁମାର ବ୍ୟାସ୍‌ ରାଗିବା ପରିବର୍ତ୍ତେ ସମସ୍ତଙ୍କୁ ମିଠା ବାଣ୍ଟିଥିଲେ । ସବୁ ମାତା-ପିତା ଏଭଳି ଖବର ଶୁଣିବା ପରେ ନିଜ ପିଲାମାନଙ୍କୁ ତାଗିଦ୍‌ କରିବା ସହ ରାଗିଥାନ୍ତି । କିନ୍ତୁ ତାହାର ଠିକ୍‌ ବିପରୀତ କରିଥିଲେ ସୁରେନ୍ଦ୍ର କୁମାର ବ୍ୟାସ୍‌ ।

ଏପରି କରିବା ପଛର କାରଣ ପଚରାଯିବାରୁ ସେ କହିଥିଲେ, “ଭୟରେ ମୋ ପୁଅ ଯେମିତି କିଛି ଭୁଲ ପଦକ୍ଷେପ ନ ନେଉ ସେଥିପାଇଁ ମୁଁ ଏପରି କଲି। ” ଅନ୍ୟ ପକ୍ଷରେ ବାପାଙ୍କ ଏପରି କରିବା ପଛର କାରଣ ଜାଣିବା ପରେ ଆଶୁ ଆଉ ଥରେ ପରୀକ୍ଷା ଦେଇ ବାପାଙ୍କୁ ଗର୍ବିତ କରାଇବ ବୋଲି ପ୍ରତିଶ୍ରୁତି ଦେଇଥିବା ଜଣାପଡ଼ିଛି । ସୁରେନ୍ଦ୍ର କୁମାର ବ୍ୟାସଙ୍କ ଏହି ପଦକ୍ଷେପ ନିହାତି ଭାବରେ ସେହି ମାତା-ପିତାମାନଙ୍କୁ ଶିକ୍ଷା ଦେବ, ଯେଉଁମାନେ ପିଲାମାନଙ୍କ ସ୍ଥିତିକୁ ନ ବୁଝି ଭଲ ମାର୍କ ଆଣିବା ପଛରେ ପଡ଼ିଥାନ୍ତି । ସୁରେନ୍ଦ୍ର କୁମାର ବ୍ୟାସଙ୍କ ଏଭଳି କାମର ଖବର ପ୍ରସାର ହେବା ପରେ ସମସ୍ତେ ତାଙ୍କ ଚିନ୍ତାଧାରାକୁ ପ୍ରଶଂସା କରିଥିବା ଦେଖିବାକୁ ମିଳିଛି ।