ଋଷ ରାଷ୍ଟ୍ରପତି ପୁଟିନ କ୍ୟାନସରରେ ପୀଡିତ ନେଇ ଚର୍ଚ୍ଚା: ଅପରେସନ ହେବ ବୋଲି ଆମେରିକୀୟ ଗଣମାଧ୍ୟମ କରିଛି ରିପୋର୍ଟ
କନକ ବ୍ୟୁରୋ: ଋଷ-ୟୁକ୍ରେନ ଭୟାବହ ଯୁଦ୍ଧ ଭିତରେ ଏବେ ଆଉ ଏକ ବଡ ଖବରକୁ ନେଇ ବେଶ ଚର୍ଚ୍ଚା ଆରମ୍ଭ ହୋଇଛି । ୟୁକ୍ରେନ ଉପରେ ବର୍ବରତା କାଣ୍ଡ ଘଟାଇ ସାରା ବିଶ୍ୱକୁ ସ୍ତବ୍ଧ କରିଥିବା ରୁଷ ରାଷ୍ଟ୍ରପତି ଭ୍ଲାଦିମୀର ପୁଟିନ କର୍କଟ ରୋଗରେ ପୀଡିତ ଥିବା କିଛି ଅର୍ନ୍ତଜାତୀୟ ଗଣମାଧ୍ୟମ ସଂସ୍ଥା ଦାବି କରୁଛନ୍ତି । ୟୁକ୍ରେନ ସହ ଯୁଦ୍ଧ ଚାଲିଥିବାବେଳେ ପୁଟିନ ଅସ୍ଥାୟୀଭାବେ ଶାସନ କ୍ଷମତାକୁ ହସ୍ତାନ୍ତର କରି ଅସ୍ତ୍ରୋପଚାର ପାଇଁ ଯିବାକୁ ପ୍ରସ୍ତୁତ ଖବର ମଧ୍ୟ ଆସୁଛି । ଏଭଳି ଘଡିସନ୍ଧି ମୁହୁର୍ତରେ ପୁଟିନ କାହାରକୁ କ୍ଷମତା ହସ୍ତାନ୍ତର କରିବେ? ଯୁଦ୍ଧ ଭିତରେ କିଏ ସମ୍ଭାଳିବେ କ୍ରେମଲିନର କମାଣ? ଏନେଇ ଅନେକ ପ୍ରଶ୍ନ ମଧ୍ୟ ସାମ୍ନାକୁ ଆସୁଛି । ପୁଟିନଙ୍କ ଅସୁସ୍ଥତା ଓ ଅସ୍ତ୍ରୋପଚାର, ଅସ୍ଥାୟୀ କ୍ଷମତା ହସ୍ତାନ୍ତର ଭିତରେ ଆଉ ଏକ ବଡ ଖବରକୁ ନେଇ କିଛି ଅର୍ନ୍ତଜାତୀୟ ମିଡିଆ ଦାବି କରୁଛି ।
Kanak News is now on WhatsApp
Join and get latest news updates delivered to you via WhatsApp
ନିଜର ବିଶ୍ୱସ୍ତ ତଥା ପୂର୍ବତନ ରୁଷ ସଂଘୀୟ ସେବାର ମୁଖ୍ୟ ନିକୋଲାଇ ପାତ୍ରୁଶେଭଙ୍କୁ ପୁଟିନ ଅସ୍ଥାୟୀ କ୍ଷମତା ଦେଇପାରନ୍ତି । ପାତ୍ରୁଶେଭ କିଛି ଦିନ ପାଇଁ ପୁଟିନଙ୍କ କ୍ଷମତାରେ ରହିବେ ବୋଲି କୁହାଯାଉଛି । ୭୦ବର୍ଷୀ ପାତ୍ରୁଶେଭ ରୁଷର ସୁରକ୍ଷା କାଉନସିଲର ସଚିବ ଥିବାବେଳେ ବର୍ତମାନ ଯୁଦ୍ଧରେ ତାଙ୍କୁ ଗୁରୁତ୍ୱପୂର୍ଣ୍ଣ ଭୂମିକା ରହିଛି । କୁହାଯାଉଛି ରୁଷ-ୟୁକ୍ରେନ ଯୁଦ୍ଧର ସେ ମୁଖ୍ୟ ରଣନୀତିକାର ।୧୮ ମାସ ହେଲାଣି ପୁଟିନ ଅବଡୋମିନାଲ କ୍ୟାନସର ଓ ପାର୍କିନସନ ରୋଗରେ ପୀଡିତ ଅଛନ୍ତି ।ମେ ୯ରେ ରୁଷ ବିଜୟ ଦିବସ ପାଳିବା ପରେ ପୁଟିନ ଅସ୍ତ୍ରୋପଚାର ପାଇଁ ଯିବା ନେଇ ରିର୍ପୋଟ ଦାବି କରାଯାଉଛି । ଯେଉଁ ଖବର ଗୁଡିକ ଅର୍ନ୍ତଜାତୀୟ ଗଣମାଧ୍ୟରେ ପ୍ରକାଶିତ ହେଉଛି ଯଦି ତାହା ସତ ହୁଏ ତେବେ ପୁଟିନଙ୍କ ଅନୁପସ୍ଥିତିରେ ନାଟୋ ଦେଶ ଓ ଆମେରିକା ସହ ୟୁକ୍ରେନର ଆଗାମୀ ଆଭିମୁଖ୍ୟ କଣ ରହିବ ? ପୁଟିନଙ୍କ ବିନା କ୍ରେମଲିନ ସେନାର ନୂଆ ରଣନୀତି କଣ ରହିବ ?ତା ଉପରେ ସାରା ବିଶ୍ୱର ନଜର ରଖିଛି ।