ଜଣେ ବାସନ ମାଜିଲେ ପେଟ ପୂରିବ, ଆଉ ଜଣେ ବାସନ ବିକିଲେ ପରିବାର ଚଳିବ । ଫୋନିର କ୍ଷତ ଲିଭିନଥିବା ପୂର୍ବରୁ ମାଡ଼ି ଆସିଲା ମହାମାରୀ, ଏବେ ଦୁଇ ଗଣ୍ଡେ ଖାଇବାକୁ ବି କରୁଛନ୍ତି ଗୁହାରୀ । ‘ଜଗା’ ଦୁଆରୁ ଆସିଲା ଜୀବନ ଯନ୍ତ୍ରଣାର ଦୁଇ କାହାଣୀ, ସରକାର ଶୁଣିବା ହେଉ…
କନକ ବ୍ୟୁରୋ: କାହାଣୀ ଏକ କିନ୍ତୁ ଯନ୍ତ୍ରଣା ଅନେକ । ଭୂତାଣୁ ନୁହେଁ ଏଠି ଭୋକର ଭୟ ଜୀବନ ଜିଇଁବାର ଭରସା ଭାଙ୍ଗିଛି । ମହାମାରୀ କରୋନା କଟକଣା ମଧ୍ୟବିତ୍ତକୁ କେତେ କଲବଲ କରିପାରେ ତାହା ଜଗା ଦୂଆରୁ ଆସିଥିବା ଏହି ଦୁଇ ଯନ୍ତ୍ରଣାଦୟକ କାହାଣୀ ହିଁ ବୟାନ କରିବ ।
Kanak News is now on WhatsApp
Join and get latest news updates delivered to you via WhatsApp
ବିଧାତା ଦେଇଥିବା ଫୋନି କ୍ଷତକୁ ବର୍ଷେ ପୂରିବା ପରେ ମାଡ଼ିଆସିଲା ଆଉ ଏକ ବିପର୍ଯ୍ୟୟ ଯାହା ମଣିଷର ଜୀବନ-ଜୀବିକାକୁ ଦେଇଛି ଖାଲି ଯନ୍ତ୍ରଣା ଆଉ ଯନ୍ତ୍ରଣା । ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ପୁରୀ ନରେନ୍ଦ୍ର କୋଣ ଭୋଇ ସାହିରେ ରହୁଥିବା କୁନ୍ତି ଭୋଇ । ସ୍ୱାମୀ ସାତଜନ୍ମର ଶପଥ ଦେଇ ଅଧାବାଟରୁ ଆରପାରିକୁ ଯିବାପରେ ହାତ ନପତେଇ ପୁରୀର ଏକ ହୋଟେଲରେ କାମକରି ପରିବାରର ପେଟ ପୋଷୁଥିଲେ କୁନ୍ତି । ହେଲେ ବୋଝ ଉପରେ ନଳିତା ବିଡ଼ା ପରି ଗତବର୍ଷ ଫୋନି ପାଟିବାକୁ ଚାଲିଗଲା ମୁଣ୍ଡ ଉପରର ଛାତ । ସରକାରଙ୍କଠୁ ସହାୟତା ମିଳିନଥିବାବେଳେ ଏବେ ମାଡ଼ିଆସିଛି କରୋନା ମହାମାରୀ । ଗ୍ରାହକଙ୍କୁ ହେଟେଲରେ ଖାଇବା ମନାଥିବାରୁ ସେ ବାସନ ମଧ୍ୟ ମାଜିପାରୁ ନାହାନ୍ତି । ଆଉ କଟକଣା ଯୋଗୁଁ କୁନ୍ତି କାହା ଘରକୁ ମଧ୍ୟ ଯାଇପାରୁ ନାହାନ୍ତିି । ଏବେ ଘରେ ବୃଦ୍ଧା ମାଆକୁ ଦୁଇ ଓଳି କେମିତି ଖୁଆଇବେ କହି କହି ନିଜ ଭାଗ୍ୟକୁ କୋଷୁଛନ୍ତି କୁନ୍ତି ।
ସେହିପରି ଜଗା ଦୂଆରୁ ଆସିଥିବା ଆଉ ଏକ ଯନ୍ତ୍ରଣାଦାୟ କାହାଣୀ ବି ଆପଣଙ୍କ ଆଖିରେ ଲୁହ ଆଣିଦେବ । ଏ ହେଉଛନ୍ତି ପୁରୀ ଶ୍ରୀକ୍ଷେତ୍ର କଲୋନୀରେ ରହୁଥିବା ପୂର୍ଣ୍ଣିମା କିନ୍ତୁ ତାଙ୍କ ଜୀନରେ ଭରି ରହିଛି କେବଳ ଅମାବାସ୍ୟାର ଅନ୍ଧକାର । ନା ଅଛି ଭଲ ଘର ନା ଖାଇବାକୁ ମିଳୁଛି ଦୁଇ ଓଳି ଦାନା । ଯେଉଁ ବାସନ ଖଣ୍ଡେ ବିକିଲେ ପରିବାରର ପେଟ ପୁରୁଥିଲା ସେଥିରୁ ଏବେ ଝରୁଛି ଲକଡାଉନ୍ ଲହୁ । ଅଧା ଓଡ଼ିଶା ଅନଲକ୍ ହୋଇଥିଲେ ବି ସଂକ୍ରମଣ ଭୟ ପାଇଁ ଭରସାର ବାସନରେ ଏବେ ବି ପଡ଼ିଛି ତାଲା । ତେବେ ଏତିକିରେ ସରିନି ଶ୍ରୀକ୍ଷେତ୍ରର ପୂର୍ଣ୍ଣିମାଙ୍କ ସଂଘର୍ଷର କାହାଣୀ । ସରକାର ମାସିକ ଚାଉଳ ଡାଲି ଦେଉଛନ୍ତି ହେଲେ ପାଖରେ ଟଙ୍କାଟିଏ ନଥିଲେ ତେଲ, ଲୁଣ କେଉଁଠୁ ଆଣିବୁ ବୋଲି କହି କାନ୍ଦୁଛନ୍ତି ପୂର୍ଣ୍ଣିମା ।
ତେବେ ସଂକ୍ରମଣ ରୋକିବାକୁ ସରକାର ଅନେକ ପଦକ୍ଷେପ ନେଉଥିଲେ ମଧ୍ୟ କଟକଣା ଭିତରେ ପେଟ ପାଇଁ ସଂଘର୍ଷ କରୁଥିବା ଏଭଳି ଅନେକ ପୂର୍ଣ୍ଣିମା ଓ କୁନ୍ତି କଷ୍ଟ ସହୁଛନ୍ତି । ଏଭଳି ସମୟରେ ସରକାର ବା ପ୍ରଶାସନ ଏମାନଙ୍କ ପାଇଁ କ’ଣ ବ୍ୟବସ୍ଥା କରୁଛନ୍ତି ତାହା ଉପରେ ଏବେ ସମସ୍ତଙ୍କ ନଜର ।