କନକ ବ୍ୟୁରୋ : ନାବାଳିକା ଛାତ୍ରୀଙ୍କୁ କମେଣ୍ଟ ମାରି ହଟହଟା ହେଲେ ରୋଡ୍ ରୋମିଓ । କମେଣ୍ଟ ମରା ମହଙ୍ଗା ପଡ଼ିଛି, ଉତ୍ତମ ମଧ୍ୟମ ଖାଇବା ସହ କାନ ଧରି ଉଠବସ୍ ହୋଇଛନ୍ତି । ଘଟଣା ଘଟିଛି ପୁରୀ ଜିଲ୍ଲା ଗୋପ ବ୍ଳକ ଅଂଚଳରେ । କିଛି ନାବାଳିକା ଛାତ୍ରୀ, ସ୍ଥାନୀୟ ଏକ କୋଚିଂ ସେଂଟରକୁ ଯାଉଥିବା ବେଳେ ଗତ ତିନି ଧରି ଛାତ୍ରୀଙ୍କୁ ପିଛା କରିବା ସହ କମେଣ୍ଟ ମାରୁଥିଲେ ତିନି ଜଣ ଯୁବକ । ଏ ସଂପର୍କରେ ପରିବାର ଲୋକଙ୍କୁ ଜଣାଇଥିଲେ ଛାତ୍ରୀ ।

ଗୁରୁବାର ଗୋପ କୁଶଭଦ୍ରା ସେତୁ ଉପରେ ପରିବାର ଲୋକ ଜଗି ବସିଥିବା ବେଳେ ସେହି ତିନି ଜଣ ଯୁବକ ପୂର୍ବଭଳି ଅଶ୍ଳୀଳ ଇଂଗିତ ପ୍ରଦର୍ଶନ କରିଥିଲେ । ଏହାଦେଖି ଆଇନକୁ ହାତକୁ ନେଇଥିଲେ ପରିବାର ଲୋକ । ଯୁବକମାନଙ୍କୁ ଘଟଣା ସ୍ଥଳରେ କାବୁ କରିବା ସହ ଉତମ ମଧ୍ୟମ ଦେଇଥିଲେ । ଏହାପରେ ଗୋପ ବଜାରକୁ ଆଣି ଉପନିବନ୍ଧକ କାର୍ଯ୍ୟାଳୟ ସମ୍ମୁଖରେ କାନ ଧରି ବସ ଉଠ କରି ଛାଡିଥିଲେ ।

ତେବେ ବସ ଉଠ୍ କରୁଥିବା ଭିଡିଓକୁ କେହି ଜଣେ ସୋସିଆଲ୍ ମିଡିଆରେ ଛାଡ଼ି ଦେବାରୁ ଏହା ଏବେ ଭାଇରାଲ ହେବାରେ ଲାଗିଛି । ତେବେ ଭାଇରାଲ ହୋଇଥିବା ଭିଡିଓକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ । ଏହାକୁ କଙ୍ଗାରୁ କୋର୍ଟର କାର୍ଯ୍ୟ ସହ ତୁଳନା କରିଛନ୍ତି ।