କନକ ବ୍ୟୁରୋ : ଗୋଟିଏ ଘଟଣାର ଇଏ ହେଉଛି ଏକାଧିକ ପ୍ରତିକ୍ରିୟା । ବିଚାର ପୂର୍ବରୁ ପୁଲିସ୍ ହେପାଜତ୍ରେ ଅପରାଧୀଙ୍କ ମୃତ୍ୟୁ ଘଟଣା, ପୁରୀରୁ କଟକ ଭାୟା ଭୁବନେଶ୍ୱର ଦେଇ ଦିଲ୍ଲୀରେ ପହଂଚିଯାଇଛି । ଘଟଣା ସମ୍ପର୍କରେ ସରକାରଙ୍କୁ ରିପୋର୍ଟ ତଲବ କରିଛନ୍ତି ହାଇକୋର୍ଟ । ପୋଷ୍ଟମର୍ଟମ୍ ରିପୋର୍ଟ ସହ ସବିଶେଷ ତଥ୍ୟ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଆଉ ଏପଟେ ବିଧାନସଭାରେ ହାଜତ ମୃତ୍ୟୁ ମାମଲାରେ ହଙ୍ଗାମା କରିଛନ୍ତି ବିରୋଧୀ । ଉଭୟ ବିଜେପି ଓ କଂଗ୍ରେସ ସଦସ୍ୟମାନେ ଗୃହର ମଧ୍ୟ ଭାଗକୁ ଆସି ହଟଗୋଳ କରିଛନ୍ତି । ପୁରୀ ଏସପିଙ୍କ ଗିରଫ ଦାବି କରିଛନ୍ତି ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ଆଉ ଏହାରି ଭିତରେ ଦିଲ୍ଲୀ ଦରବାରରେ ଶାସକ ଦଳକୁ ଘେରିବା ପାଇଁ, ଜାତୀୟ ମାନବାଧିକାର କମିଶନଙ୍କ ନିକଟରେ ଫେରାଦ ହୋଇଛନ୍ତି ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର । ପୁଲିସ୍ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ସେହିପରି ରାଜ୍ୟ ମାନବାଧିକାର କମିଶନଙ୍କ ପାଖରେ ଘଟଣା ନିରପେକ୍ଷ ତଦନ୍ତ ପାଇଁ କରିଛନ୍ତି ।
ରାଜ୍ୟରେ ଦୁଇ ଦୁଇଟି ହାଜତ ମୃତ୍ୟୁ ଘଟଣାକୁ ନେଇ ରାସ୍ତାକୁ ଓଲ୍ଲାଇଛି ଭୁବନେଶ୍ୱର ଜିଲ୍ଲା ବିଜେପି । ଘଟଣାରେ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବା ସହ କଡ଼ା କାର୍ଯ୍ୟାନୁଷ୍ଠାନ ଦାବି କରିଛି ବିଜେପି । ସେହିପରି ପୁରୀରେ ବାମପନ୍ଥୀ ଦଳ ମଧ୍ୟ ଘଟଣାରେ ପ୍ରତିବାଦରେ ବିକ୍ଷୋଭ କରିଛି ।
ଏସବୁ ଭିତରେ ବଡ଼ କଥା ହେଉଛି- ମୃତ କେ. ରମେଶଙ୍କ ବାପା, ମାଆ ଏବଂ ଦାଦାଙ୍କୁ ହେପାଜତ୍ରେ ରଖିଛି ପୁଲିସ୍ । ପୁଲିସ୍ କାହିଁକି ସେମାନଙ୍କୁ ହେପାଜତରେ ରଖିଛି ବୋଲି ପ୍ରଶ୍ନ କରିଛନ୍ତି ତାଙ୍କ ସମ୍ପର୍କୀୟ । ଆଉ ଏହି ପୁରା ଘଟଣାରେ ପୁରୀ ପୁଲିସ୍କୁ ନେଇ ଉଠୁଥିବା ପ୍ରଶ୍ନର ଉତର ରଖିଛନ୍ତି ଏସ୍ପି । ସମାନ ଢ଼ଙ୍ଗରେ ଘଟିଥିବା ଦୁଇ ଦୁଇଟି ଘଟଣା ପୁଲିସ୍ ଉପରେ ଜନତାଙ୍କ ସନ୍ଦେହକୁ ଆହୁରୀ ଘନିଭୂତ କରିଦେଇଛି ।