କନକ ବ୍ୟୁରୋ : ପଞ୍ଜାବରେ ଆଗାମୀ ୨୦୨୨ ରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ହେଲେ ନିର୍ବାଚନ ପୂର୍ବରୁ ଶାସକ କଂଗ୍ରେସ ଓ ବିରୋଧୀ ଆପ୍ ମଧ୍ୟରେ ଚାଲିଥିବା ସଂଘର୍ଷ ମଧ୍ୟରେ ଭୋଟରମାନେ ଲାଭବାନ ହେବେ ବୋଲି ଅନୁମାନ କରାଯାଉଛି । ଗତକାଲି ପଞ୍ଜାବ ଗସ୍ତରେ ଯାଇ ଆମ୍ ଆଦମୀ ପାର୍ଟିର ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଯେଭଳି ଯୋଜନା ଘୋଷଣା କରିଥିଲେ ସେଥିରେ ଚମକି ଉଠିଛି କଂଗ୍ରେସ । କେଜ୍ରିୱାଲ କହିଥିଲେ କି ଯଦି ଆଗାମୀ ନିର୍ବାଚନରେ ପଞ୍ଜାବରେ ଆପର ସରକାର ଗଠନ ହେବ ତେବେ ୧୮ ବର୍ଷରୁ ଅଧିକ ସମସ୍ତ ମହିଳାଙ୍କୁ ସରକାର ମାସିକ ୧ ହଜାର ଟଙ୍କା ଦେବେ । କେଜ୍ରିୱାଲଙ୍କ ଏଭଳି ଘୋଷଣା ପରେ ଏବେ ଆକ୍ସନ ମୋଡରେ ମୁଖ୍ୟମନ୍ତ୍ରୀ ଚରଣଜିତସିଂ ଚନ୍ନୀ । ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ସେ ସୋମବାର ଦିନ ପ୍ରଥମଥର ପାଇଁ ଲୁଧିଆନା ଗସ୍ତ କରିଥିଲେ । ସେଠାରେ ସେ ଦଳର କର୍ମୀମାନଙ୍କ ସହ ନବଜୋତସିଂ ସିଦ୍ଧୁଙ୍କୁ ନେଇ ବୈଠକ କରିଥିଲେ । ବୈଠକ ପରେ ସେ ଘୋଷଣା କରିଥିଲେ କି ରାଜ୍ୟର କେବୁଲ ଟିଭି ସେବା ଦର ୧୦୦ ଟଙ୍କା ରହିବ ।
Kanak News is now on WhatsApp
Join and get latest news updates delivered to you via WhatsApp
ପଞ୍ଜାବର ଅଟମ ନଗରରେ ସେ ପାର୍ଟିର ନେତାଙ୍କୁ ସମ୍ବୋଧିତ କରି କହିଛନ୍ତି କି କେବୁଲ ମାଫିଆମାନେ ରାଜ୍ୟରେ କେବୁଲ ଟିଭି ଦର ବୃଦ୍ଧି କରି ଲୋକମାନଙ୍କୁ ଶୋଷଣ କରୁଛନ୍ତି । ଏହାସହ ସେ ବାଦଲ ପରିବାର ଉପରେ ଟାର୍ଗେଟ କରିଥିଲେ । ସେ କହିଥିଲେ କି ପଞ୍ଜାବରେ ପରିବହନ ଓ କେବୁଲ ଟିଭି ବ୍ୟବସାୟରେ ବାଦଲ ପରିବାର ଆଧିପତ୍ୟ ବିସ୍ତାର କରି ବସିଛନ୍ତି । ଏବେ ରାଜ୍ୟର ଲୋକମାନଙ୍କୁ ମାସିକ କେବୁଲ ଟିଭି ଦର ୧୦୦ ଟଙ୍କାରୁ ଅଧିକ ଦେବାକୁ ପଡିବ ନାହିଁ । ଏହାସହ ଯେଉଁ କେବୁଲ ନେଟୱାର୍କ କମ୍ପାନୀମାନେ ଏହାଠାରୁ ଅଧିକ ଟଙ୍କା ଆଦାୟ କରିବେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚନ୍ନି ସ୍ପଷ୍ଟ କରିଛନ୍ତି ।
ଏହାସହ ଚନ୍ନି କହିଥିଲେ କି ବେଆଇନ ଭାବେ ଯେଉଁ ବସଗୁଡିକୁ ପରିମିଟ ମିଳିଛି ସେମାନଙ୍କ ଠାରୁ ପରମିଟ୍ ଫେରସ୍ତ ଅଣାଯିବ ଓ ତାହାକୁ ବେରୋଜଗାର ଯୁବକମାନଙ୍କୁ ପ୍ରଦାନ କରାଯିବ । ଏହାସହ ୧୦ ଦିନ ମଧ୍ୟରେ ନଗର ପରିଷଦ ଓ ନିଗମରେ କାମ କରୁଥିବା ସଫେଇ କର୍ମଚାରୀଙ୍କୁ ନିୟମିତ କରାଯିବ ଓ ଭର୍ତ୍ତି ପାଇଁ କଣ୍ଟାକ୍ଟ ପ୍ରଣାଳୀ ସମାପ୍ତ କରାଯାଇ ସିଧା ନିଯୁକ୍ତି ଦିଆଯିବ ।