କନକ ବ୍ୟୁରୋ: କୁହାଯାଏ ବାପା ଯେଉଁ କର୍ମ କରିଥାନ୍ତି ତାହା ପୁଅମାନେ ପ୍ରାପ୍ତ ହୁଅନ୍ତି । ଅର୍ଥାତ ଭଲ କର୍ମ କରିଥିଲେ ଭଳ ଫଳ ମିଳେ, ଖରାପ କାମ କରିଥିଲେ ପୁଅକୁ କାଳ ହୁଏ । ବାପ-ପୁଅ ସମ୍ପର୍କକୁ ନେଇ ଅନେକ କଥାନଥା, କାହାଣୀ ତ ଆପଣ ଶୁଣିଥିବେ । ହେଲେ ଆଜି ଆମେ ଆପଣଙ୍କୁ କେଉଁ କାହାଣୀ ନୁହେଁ ବରଂ ଏକ ଚିତ୍ର ଦେଖାଇବୁ ଆଉ ବୁଝେଇବାକୁ ଚେଷ୍ଟା କରିବୁ । ଏ କଥାକୁହା ଫଟୋକୁ ଦେଖନ୍ତୁ ଆଉ ବୁଝନ୍ତୁ ଚିତ୍ର ପଛର ଚମକ୍ରାର କଥାଟିକୁ । ଏ ଫଟୋରେ ଦୁଇଟି ପିଢିର କଥାକୁ ଅତି ସୁନ୍ଦର ଭାବେ ବର୍ଣ୍ଣନା କରାଯାଇଛି । ପ୍ରଥମ ଚିତ୍ରରେ ଜଣେ ବାପା ମାଟିର ଛାତି ଉପରେ ଗଛଟେ ଲଗାଇ, ତା ମୂଳରେ ପାଣି ଦେଇ ପୁଅକୁ ତାର ମହନୀୟତା କଥା ବଖାଣୁଛନ୍ତି । ଆଉ କହୁଛନ୍ତି ପୁଅରେ ଦିନ ଆସିବ ଜୀବନରେ ଗଛର ଗୁରୁତ୍ୱକୁ ତୁ ବୁଝି ପାରିବୁ ।
Kanak News is now on WhatsApp
Join and get latest news updates delivered to you via WhatsApp
ଆଉ ୨ୟ ଚିତ୍ରରେ ପୁଅଟି ଯେବେ ବଡ ହେଉଛି, ବାପା ହେଉଛି ଆଉ ତା ପୁଅକୁ ସେ ସେହି ଗଛରେ ଦୋଳିରେ ଝୁଲାଉଛି । ବାପା ନାହାନ୍ତି ସତ ହେଲେ ସେ ଲଗାଇ ଯାଇଥିବା ଗଛ ଆଜି ବଡ ହୋଇ ତାଙ୍କୁ ଛାଇ ଦେଉଛି, ଅମ୍ଳଜାନ ଦେଉଛି । ସେ କରିଥିବା ପୂଣ୍ୟ ତାଙ୍କ ପରପିଢି ଉପଭୋଗ କରୁଛି । ସୋସିଆଲ ମିଡିଆରେ ଘୁରି ବୁଲୁଥିବା ଏ ଚିତ୍ର ଅନେକ ଶିକ୍ଷା ଦେଉଛି । ଏ ଫଟୋକୁ ହଜାର ହଜାର ଲୋକ ସେୟାର ବି କରୁଛନ୍ତି । ହେଲେ ସତରେ କଣ ଆମେ ପରିବେଶର ସୁରକ୍ଷା କଥା ଭାବୁଛେ, ପରିବେଶ ପାଇଁ କାମ କରୁଛେ । ନା ଖାଲି ଫେସବୁକ ପୋଷ୍ଟ କରି ପ୍ରକୃତି ପ୍ରତି ଛଳନା କରୁଛେ ।
ଗଛ ଲଗାଇବା, ଗଛର ସୁରକ୍ଷା କରିବା, ଗଛର ଯତ୍ନ ନେବା କଥା ଆମେ ପିଲାବେଳୁ ଶିଖୁଛୁ । ପାଠ୍ୟ ପୁସ୍ତକରେ ବି ଗଛ ଆମର ବନ୍ଧୁ, ମିତ୍ର ବୋଲି ପଢା ହେଉଛି । କିନ୍ତୁ ବୟସ ବଢିବା ସହ ଗଛ ଲତା ସହ ଆମ ସମ୍ପର୍କ ଧିରେଧିରେ କମି କମି ଯାଉଛି । ମଣିଷ ଯେତେ ଆଧୁନିକ ହେଉଛି ସେତେ ଜଙ୍ଗଲ ନଷ୍ଟ କରୁଛି, ଗଛ କାଟି ଦେଉଛି । ନିଜ ସ୍ୱାର୍ଥ ସାଧନ ପାଇଁ ପରିବେଶ ସହ ସାଙ୍ଘାତିକ ଖେଳ ଖେଳୁଛି ମାନବ ସମାଜ । ଯାହାର ଫଳ ବି ଆମକୁ ଭୋଗିବାକୁ ପଡୁଛି ପ୍ରକୃତି ପାଖରୁ ।
ଏବେ ଖରା ଦିନ । ରାସ୍ତା କଡେ ଗଛ ହଜିହଜି ଯାଉଛି ବୋଲି ଟାଇଁ ଟାଇଁ ଖରା ସହୁଛି ବାଟୋଇ । ଜଙ୍ଗଲ ବି ଜଳିବାର ସମ୍ଭାବନା ରହିଛି । ଅନେକ ସ୍ଥାନରେ ଜଙ୍ଗଲ ଜଳିବାର ଖବର ବି ଆସିଲାଣି । କିଛି ଜଙ୍ଗଲ ଜଳିବା ମନୁଷ୍ୟକୃତ ଭାବେ ହେଉଥିବା ବି ଅଭିଯୋଗ ହୁଏ । ଜଙ୍ଗଲ ଜଳେ, ଉତ୍ତାପ ବଢେ, ଜୀବଜନ୍ତୁ ମରନ୍ତି, ପରିବେଶ ସନ୍ତୁଳନ ହରାଏ । ଏମିତି ଅନେକ କ୍ଷତି ସହେ ପୃଥିବୀ । ତେଣୁ ସମୟ ଆସିଛି ନିଜକୁ ପରିବର୍ତ୍ତନ କରିବାର, ପରିବେଶ ପ୍ରକୃତି ପ୍ରତି କିଛି ସମୟ ବାହାର କରିବାର । ଖରା ଦିନେ ସମସ୍ତଙ୍କୁ ଅନୁରୋଧ ଜଙ୍ଗଲରେ ନିଆଁ ଲଗାନ୍ତୁ ନାହିଁ, ଯଦି କେଉଁଠି ଜଙ୍ଗଲ ଜଳୁଛି ତେବେ ତାହାକୁ ଲିଭାଇବା ପାଇଁ ଉଦ୍ୟମ କରନ୍ତୁ । ଜଙ୍ଗଲର ଯତ୍ନ ନେବାକୁ ସଚେତନ କରନ୍ତୁ । ଏମିତି କଲେ ସମ୍ବାଦ ଡିଜିଟାଲର ଅଭିନବ ପ୍ରୟାସ ପୁନଶ୍ଚ ପୃଥିବୀର ପରିକଳ୍ପନା ସତ ହେବା ସହ ନିଜ ପରପିଢି ପାଇଁ ସାଇତା ରହିବ ଏକ ସୁନ୍ଦର ପୃଥିବୀ ।