କନକ ବ୍ୟୁରୋ: ଉଜୁଡିଯାଇଥିବା ଜଙ୍ଗଲକୁ ସଜାଡୁଛି ସବୁଜ ସୁନା । ମୁଣ୍ଡିଆ ପାହାଡରେ ହସୁଛି ପ୍ରକୃତିରାଣୀ । ମାଟିରୁ ପାହାଡ, ସବୁଠି ପ୍ରକୃତି ଓ ପରିବେଶକୁ ବଞ୍ଚାଇ ରଖିବାର ପ୍ରୟାସ । ସୁରକ୍ଷା ଦେବାର ସଙ୍କଳ୍ପ । ଏହି ଉଦ୍ୟମ ପାହାଡି ଇଲାକାରେ ଧିରେଧିରେ ସଫଳ ହେବାର । ଆଦିବାସୀ ଅଧ୍ୟୁସିତ ପାହାଡ ପର୍ବତ ଘେରା ଗଜପତି ଜିଲ୍ଲାରେ ସଫଳ ରୂପାୟନ ହୋଇଛି ବାଉଁଶ ବନୀକରଣ ଯୋଜନା । ଅଳ୍ପ ସମୟରେ ଘଞ୍ଚ ଜଙ୍ଗଲ ସୃଷ୍ଟି ପାଇଁ ପାରଳାଖେମୁଣ୍ଡି ବନବିଭାଗ ପକ୍ଷରୁ ବିଭିନ୍ନ ସ୍ଥାନରେ ଲଗାଯାଉଛି ବାଉଁଶ ଗଛ ।
Kanak News is now on WhatsApp
Join and get latest news updates delivered to you via WhatsApp
ପାରଳାଖେମୁଣ୍ଡି ଚନ୍ଦ୍ରଗିରି ବନାଞ୍ଚଳର ଆମ୍ବିଳିଆମ୍ବ ଠାରେ ଥିବା ଏହି ସ୍ଥାନର ୩୦ ହେକ୍ଟର ସରକାରୀ ଜଙ୍ଗଲ ଜମିରେ ବନ ବିଭାଗ ପକ୍ଷରୁ ୧୨ ହଜାରରୁ ଅଧିକ ବାଉଁଶ ଗଛ ରୋପଣ କରାଯାଇଛି । ୨୦୧୯ରୁ ଆଜି ଯାଏଁ ବାଉଁଶ ଚାରା ଲଗାଇ ପାହାଡି ଇଲାକାକୁ ଜଙ୍ଗଲରେ ପରିଣତ କରିବାକୁ ଚେଷ୍ଟା କରାଯାଉଛି । ପୂର୍ବରୁ ଫଳ, ଔଷଧୀୟ ଏବଂ ବୁଦା ଜାତୀୟ ବୃକ୍ଷ ଲଗାଯାଉଥିଲେ ବି ଅନୁକୂଳ ବାତାବରଣରେ ବାଉଁଶ ଗଛ ଜଲଦି ବଢୁଥିବାରୁ ଏବେ ବାଉଁଶ ସାଜିଛି ପ୍ରକୃତି ପାଇଁ ବରଦାନ ।
ଅନ୍ୟଗଛ ତୁଳନାରେ ବାଉଁଶ ଗଛ ଦୃତ ଗତିରେ ବଢେ । ଘନତ୍ୱ ଦୃଷ୍ଟିରୁ ଯେତେବଡ ପ୍ରାକୃତିକ ବିପର୍ଯ୍ୟୟ ହେଲେ ବି ଏହା ପ୍ରକୃତିକୁ ସୁରକ୍ଷା ଦେବାରେ ସାହାଯ୍ୟ କରେ । ଜଳବାୟୁ ସନ୍ତୁଳନରେ ଏହା ମୁଖ୍ୟ ଭୂମିକା ନିଭାଉଥିବା ବେଳେ ବାଉଁଶ ଗଛ ତୃଣଭୋଜି ପ୍ରାଣୀଙ୍କ ପାଇଁ ଖାଦ୍ୟ ବନିଥାଏ । ବାଉଁଶ ଗଛ ପ୍ରକୃତି ପାଇଁ ଯେତିକି ଲାଭ ଦାୟକ, ସେତିକି ଆଦିବାସୀ ଜନଜୀବନ, ସ୍ଥାନୀୟ ବାସିନ୍ଦାଙ୍କ ପାଇଁ ମଧ୍ୟ ଲାଭ ଦାୟକ । ତେଣୁ ପାହାଡି ଅଞ୍ଚଳରେ ବାଉଁଶ ଚାରା ରୋପଣ କରାଯାଉଥିବାରୁ ଏବେ ଖୁସି ଅଛନ୍ତି ସ୍ଥାନୀୟ ଲୋକେ ।
ତେବେ ପୃଥିବୀ, ପରିବେଶ ଓ ପ୍ରକୃତି ସୁରକ୍ଷା ପାଇଁ ସମ୍ବାଦ ଡିଜିଟାଲ ପକ୍ଷରୁ ପୁନଶ୍ଚ ପୃଥିବୀ ନାଁରେ ମହତ ଅଭିଯାନ ଆରମ୍ଭ କରାଯାଇଥିବା ବେଳେ ଏହି ଅଭିଯାନକୁ ସଫଳ କରିବାକୁ ସମସ୍ତଙ୍କୁ ଆହ୍ୱାନ ଦିଆଯାଉଛି । ଆମ ଭବିଷ୍ୟତ ପାଇଁ, ଆମ ଆଗାମୀ ପିଢି ପାଇଁ ଆଉ ଗୋଟେ ମୁକ୍ତ ପରିବେଶରେ ଜୀବନଯାପନ ପାଇଁ ପୁନଶ୍ଚ ପୃଥିବୀ ମାଧ୍ୟରେ ଗଛ ଲଗାଇବା ଓ ପ୍ରକୃତିକୁ ସୁରକ୍ଷା ଦେବାକୁ ଅନୁରୋଧ କରାଯାଉଛି । ତେଣୁ ଆସନ୍ତୁ ଏହି ଅଭିଯାନରେ ସାମିଲ ହେବା, ନିଜ ଘର, ବାଡି. ବିଲ, ରାସ୍ତା କଡରେ ଗଛ ଲଗାଇବା । ପ୍ରଦୂଷଣ ମୁକ୍ତ ପରିବେଶ ସୃଷ୍ଟି କରିବା ।