ମନୋଜଙ୍କୁ ଝୁରୁଛି ମାଆମାଟି: ଦେଶ ପାଇଁ ପୁଅ ପ୍ରାଣବଳି ଦେବା ପରେ ଦୟନୀୟ ଅବସ୍ଥାରେ କଟୁଛି ପରିବାରର ଦିନ । ପେଟକୁ ଦାନା ଗଣ୍ଡେ ଦେବାକୁ ଝାଡୁ ବିକୁଛନ୍ତି ସହିଦଙ୍କ ବାପାମାଆ
କନକ ବ୍ୟୁରୋ: ସେପାରିରେ ମନୋଜ, ଏପାରିରେ ମନୋଜଙ୍କ ସ୍ମୃତି । ଗେହ୍ଲା ପୁଅର ଗୋଟି ଗୋଟି ମୂହୂର୍ତ୍ତକୁ ମନେପକାଇ ମାଆ କାନ୍ଦୁଛି ତ ଗାଁ ବି ଝୁରୁଛି । ବର୍ଷେ ପରେ ବି ସହିଦଙ୍କ ସ୍ମୃତିରେ ବୁଡିରହିଛି ସାରା ଗାଁ, ରତ୍ନ ହରାଇ ରହିରହି କାନ୍ଦୁଛି ରତନପୁର ମାଟି ମାଆ । ଆଜିକୁ ଠିକ ବର୍ଷେ ତଳେ ଅର୍ଥାତ ୧୪ ଫେବୃୟାରୀ ୨୦୧୯ରେ ଆତଙ୍କୀ ଆକ୍ରମଣରେ ସହିଦ ହୋଇଥିଲେ ନିଆଳୀ ରତନପୁର ଗାଁର ବୀର ଯବାନ ମନୋଜ ବେହେରା । ଜମ୍ମୁକଶ୍ମୀର ପୁଲୱାମାରେ ଆତଙ୍କବାଦୀଙ୍କ ବିସ୍ଫୋରଣରେ ଦେଶ ପାଇଁ ପ୍ରାଣବଳୀ ଦେଇଥିଲେ ଓଡିଆ ପୁଅ ମନୋଜ ବେହେରା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ସୀମାରେ ପୁଅ ସହିଦ ହେବା ପରେ, ଦେଶ ପାଇଁ ପୁଅ ଜୀବନ ଦେବା ପରେ ଏବେ ଦୟନୀୟ ଅବସ୍ଥାରେ କଟୁଛି ପରିବାର ଦିନ । ରାତି ପାହି ସକାଳ ହେଲେ ପେଟ ପାଇଁ ସଙ୍ଘର୍ଷ ଆରମ୍ଭ କରି ଦେଉଛନ୍ତି ମନୋଜଙ୍କ ବାପାମାଆ । କେମିତି ଚଳିବ ପରିବାର ? କେଉଁଠୁ ଆସିବ ଦାନା? ଏଇ ଚିନ୍ତାରେ କୌଳିକ ବୃତିକୁ ଆପଣେଇ ନେଇଛନ୍ତି ସହିଦଙ୍କ ବାପାମାଆ ।
ପୁଅ ଥିଲେ ହୁଏତ ବୟସର ଅପରାହ୍ଣରେ ଏମିତି କଷ୍ଟ, ଏମିତି ଯନ୍ତ୍ରଣା ଭୋଗିବାକୁ ପଡି ନଥାନ୍ତା । ହେଲେ ପୁଅକୁ ନେଇ ଦେଖିଥିବା ସବୁ ସ୍ୱପ୍ନ ସୀମାରେ ସହିଦ ହେବା ପରେ ଏବେ ଭାଗ୍ୟକୁ ନେଇ ବଞ୍ଚୁଛନ୍ତି ମନୋଜଙ୍କ ମାଆବାପା । ଯେଉଁ ପୁଅ ଦେଶର ଟେକ ରଖିଲା ଆଜି ସେହି ପୁଅର ପରିବାର ଝାଡୁ, ପହଁରା, ତାଳପତ୍ରର ଟୋକେଇ କରି ବଜାରରେ ବିକୁଛନ୍ତି । ତେବେ ସରକାରଙ୍କ ସବୁ ସୁବିଧା ମନୋଜଙ୍କ ପତ୍ନୀ ଇଲିଲତା ଭୁବନେଶ୍ୱରରେ ରହି ପାଉଥିବା ବେଳେ ସେମାନଙ୍କୁ କିଛି ମିଳୁ ନଥିବା ତାଙ୍କ ମାଆ ଅଭିଯୋଗ କରିଛନ୍ତି ।
ସେପଟେ ସହିଦ ସାଙ୍ଗ ସହ ବିତାଇଥିବା ସମୟକୁ ପ୍ରତି ମୁହୂର୍ତ୍ତରେ ମନେପକାଇ ମନୋଜଙ୍କ ଝୁରୁଛନ୍ତି ତାଙ୍କ ସାଙ୍ଗ । ଆଉ ମନୋଜ ପଢିଥିବା ସ୍କୁଲରେ ବି ସେ ସମାନ ସ୍ଥିତି । କୁନି କୁନି ପିଲାମାନେ ବଡ ହୋଇ ମନୋଜଙ୍କ ପରି ହେବେ ବୋଲି ଶପଥ ନେଇଛନ୍ତି ।
ପୁଅ ଗାଁକୁ ଫେରିବନି କି ମାଆ କୋଳକୁ ଫେରିବନି । ଚିରନ୍ତନ ସତ୍ୟ ଆଉ ଜୀବନର ବାସ୍ତବତା ଜାଣି ବି ଶୁଖିଯାଇଥିବା ଘାଆ ତଳୁ ଦରଜକୁ ଭୁଲିପାରୁନି ମାଆ, ଭୁଲିପାରୁନି ଗାଁ…