କନକ ବ୍ୟୁରୋ : ଭାରତ-ଦକ୍ଷିଣ ଆଫ୍ରିକା ମଧ୍ୟରେ ତୃତୀୟ ତଥା ଅନ୍ତିମ ଟେଷ୍ଟ ବେଶ ରୋମାଞ୍ଚକର ସ୍ଥିତିରେ ପହଞ୍ଚିଛି । କିଏ ବିଜୟୀ ହେବ ତାହାକୁ ନେଇ ଅନ୍ଦାଜ ଲଗାଇବା କଷ୍ଟକର ହୋଇପଡିଛି । ତେବେ ଏହି ସିରିଜରେ ଭାରତର ମଧ୍ୟକ୍ରମ ସମ୍ପୂର୍ଣ୍ଣ ବିଫଳ ହୋଇଛି । ଖାସକରି ଟିମ୍ ଇଣ୍ଡିଆର ଦୁଇ ସଙ୍କଟମୋଚକ କୁହାଯାଉଥିବା ଆଜିଙ୍କ୍ୟ ରାହାଣେ ଓ ଚେତେଶ୍ୱର ପୂଜାରା ଚଳିତ ସିରିଜରେ ପୂରା ଫେଲ ହୋଇଛନ୍ତି । ଉଭୟଙ୍କ ବ୍ୟାଟରୁ ସେଭଳି ରନ ସ୍କୋର ବାହାରିନାହିଁ । ତେଣୁ ଆଗାମୀ ସିରିଜରେ ଉଭୟଙ୍କୁ ନେଇ କଠୋର ନିଷ୍ପତ୍ତି ନେଇପାରନ୍ତି ଚୟନକତ୍ତା ଓ ଟିମ୍ ମ୍ୟାନେଜମେଣ୍ଟ । ଏନେଇ ସଂକେତ ଦେଛନ୍ତି ପୂର୍ବତନ କ୍ରିକେଟର ସୁନୀଲ ଗାଭାସ୍କର ।

Advertisment

ସୁନୀଲ ଗାଭାସ୍କରଙ୍କ ଅନୁଯାୟୀ, ଶ୍ରୀଲଙ୍କା ସିରିଜ ପାଇଁ ଟିମ୍ ଇଣ୍ଡିଆର ୨ଟି ସ୍ଥାନ ଖାଲି ରହିପାରେ । ଉଭୟ ଆଜିଙ୍କ୍ୟ ରାହାଣେ ଓ ଚେତେଶ୍ୱର ପୂଜାରାଙ୍କୁ ଦଳରୁ ବିଦା ହେବାକୁ ପଡିପାରେ । ଶ୍ରେୟସ ଆୟାର ଡେବ୍ୟୁ ଟେଷ୍ଟରେ ଦମଦାର ପ୍ରଦର୍ଶନ କରିଥିଲେ ତେଣୁ ତାଙ୍କୁ ଶ୍ରୀଲଙ୍କା ବିପକ୍ଷରେ ସୁଯୋଗ ମିଳିପାରେ । ସେହିଭଳି ଚେତେଶ୍ୱର ପୂଜାରାଙ୍କ ସ୍ଥାନରେ କ୍ରିକେଟର ହନୁମା ବିହାରୀ ୩ ନମ୍ବର ସ୍ଥାନରେ ବ୍ୟାଟିଂ କରିପାରନ୍ତି । ଉଭୟ ପୂଜାରା ଓ ରାହାଣେ ଗତ ୨ ବର୍ଷ ହେବ ବଡ ସ୍କୋର ବିନା ମଧ୍ୟ ଦଳରେ ତିଷ୍ଠି ରହିଛନ୍ତି । ରାହାଣେଙ୍କ ବ୍ୟାଟରୁ ଶେଷ ଥର ପାଇଁ ୨୦୨୦ରେ ଏବଂ ପୂଜାରାଙ୍କ ବ୍ୟାଟରୁ ଶେଷ ଶତକ ୨୦୧୯ରୁ ଆସିଥିଲା । ତେଣୁ ଉଭୟଙ୍କୁ ଟିମରେ ସାମିଲ କରିବା ନେଇ ଏବେ ପ୍ରଶ୍ନ ଉଠାଇଲେଣି କ୍ରିକେଟ ପ୍ରଂଶସକ । ଦକ୍ଷିଣ ଆଫ୍ରିକା ବିପକ୍ଷ ସିରିଜରେ ଏହି ଦୁଇ ଖେଳାଳୀଙ୍କୁ ବାଦ୍ ଦିଆଯିବ ବୋଲି ଚର୍ଚ୍ଚା ହେଉଥିଲା କିନ୍ତୁ ଟିମ୍ ମ୍ୟାନେଜମେଣ୍ଟ ଉଭୟଙ୍କ ଉପରେ ଭରସା ଦେଖାଇବା ସହ ଟିମରେ ସ୍ଥାନ ଦେଇଥିଲା । କିନ୍ତୁ ଉଭୟ ଖେଳିଥିବା ଶେଷ ୬ଟି ପାଳିରୁ କେବଳ ଗୋଟିଏ ଲେଖାଏଁ ଅର୍ଦ୍ଧଶତକ ଦେଖିବାକୁ ମିଳିଛି ।

ଆସନ୍ତା ଫେବ୍ରୁଆରୀରେ ଶ୍ରୀଲଙ୍କା ବିପକ୍ଷରେ ସିରିଜ ଖେଳିବ ଟିମ୍ ଇଣ୍ଡିଆ । ବାଙ୍ଗାଲୋର ଓ ମୋହାଲିରେ ଖେଳାଯିବାକୁ ଥିବା ଏହି ଟେଷ୍ଟରୁ ଉଭୟ ପୂଜାରା ଓ ରାହାଣେ ବାଦ୍ ପଡିପାରନ୍ତି । ଏହାଛଡା ବାଙ୍ଗାଲୋରରେ ନିଜର ଶହେ ତମ ଟେଷ୍ଟ ମ୍ୟାଚ୍ ଖେଳିପାରନ୍ତି କୋହଲି ।