ଏଣିକି ସରକାରୀ ଅଫିସର ଚକ୍କର କାଟିବାରୁ ମିଳିବ ମୁକ୍ତି : ମାତ୍ର ଗୋଟିଏ ଫୋନ୍ କଲ୍ ରେ ଘରେ ବସି ଉଠାଇପାରିବେ ସରକାରୀ ସେବାର ଲାଭ । ଜାଣନ୍ତୁ କେଉଁଠି
ଦିଲ୍ଲୀ ସରକାରଙ୍କ ମହତ୍ୱାକାଂକ୍ଷୀ ଯୋଜନା ‘ଡୋର ଷ୍ଟେପ୍ ଡେଲିଭରି ଅଫ୍ ସର୍ଭିସେସ୍’ ଆରମ୍ଭ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲଙ୍କ ଦ୍ୱାରା ଦିଲ୍ଲୀ ସଚିବାଳୟରେ ଆୟୋଜିତ ଏକ କାର୍ଯ୍ୟକ୍ରମରେ ହୋଇଯାଇଛି । “ଆଜି ଦୁନିଆ ପାଇଁ ଐତିହାସିକ ଦିନ । ଏପର୍ଯ୍ୟନ୍ତ ପିଜ୍ଜାର ହୋମ ଡେଲିଭରୀ ହେଉଥିଲା କିନ୍ତୁ ଏବେ ସରକାରଙ୍କୁ ଫୋନ୍ କଲେ, ସରକାର ଘରେ ପହଂଚିଯିବେ । ଏହା ଏକ ଛୋଟ କିନ୍ତୁ ମଜବୁତ୍ ପଦକ୍ଷେପ । ଏହି ଯୋଜନା ଅଧିନରେ ଏବେ ୪୦ ସେବା ଆରମ୍ଭ କରାଯାଇଛି । ଆସନ୍ତା ମାସ ୩୦ ଆହୁରି ସେବା ଏହା ସହ ସଂଲଗ୍ନ କରାଯିବ । ଏହି ଯୋଜନାର ସୀମାକୁ ଧୀରେ ଧୀରେ ବଢ଼ାଯିବ”, ଶୁଭାରମ୍ଭ ସମୟରେ ଦିଲ୍ଲୀ ମୁଖ୍ୟମନ୍ତ୍ରୀ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ସରକାରଙ୍କ ‘ଡୋର ଷ୍ଟେପ୍ ଡେଲିଭରୀ ଅଫ୍ ସର୍ଭିସେସ୍’ ଯୋଜନାର ଲାଭ ଉଠାଇବା ପାଇଁ ସାଧାରଣ ଲୋକଙ୍କୁ ୧୦୭୬ ନମ୍ବରକୁ ଫୋନ୍ କରିବାକୁ ହେବ । ଏହାପରେ ସରକାରଙ୍କ କାର୍ଯ୍ୟକାରୀ ଅଧିକାରୀ ଆପଣଙ୍କ ଘରକୁ ଆସିବେ । ସେମାନେ ଆପଣଙ୍କୁ ପୂର୍ବରୁ ଜଣାଇଦେବେ ଯେ, ଆପଣଙ୍କୁ କେଉଁ କାଗଜପତ୍ର ପ୍ରସ୍ତୁତ କରି ରଖିବାର ଅଛି । ଆପଣଙ୍କ ସୁବିଧା ଅନୁଯାୟୀ ସରକାରଙ୍କ କାର୍ଯ୍ୟକାରୀ ଅଧିକାରୀ ଆପଣଙ୍କ ପାଖକୁ ଆସିବେ । ସମସ୍ତ ଆବଶ୍ୟକୀୟ ଦସ୍ତାବିଜ୍ ଉପଲବ୍ଧ କରାଇବା ପରେ ଏକ ନିଶ୍ଚିତ ସମୟରେ ସାର୍ଟିଫିକେଟ୍ ଉପଲବ୍ଧ କରାଯିବ । ଏହି ସୁବିଧା ପାଇଁ ୫୦ ଟଙ୍କା ଶୁଳ୍କ ନିଆଯିବ । ଯଦି ଫୋନ୍ କରିବା ପରେ ଫୋନ୍ ଉଠାଉନାହାଁନ୍ତି ବା ଲାଇନ୍ ବ୍ୟସ୍ତ ଆସୁଛି, ତେବେ ଚିନ୍ତା କରନ୍ତୁନି । ସେବା ଉପଲବ୍ଧ କରାଉଥିବା କମ୍ପାନୀ ଆପଣଙ୍କୁ ପୁଣି ଫୋନ୍ କରିବ । ସେବା ନେଉଥିବା ଲୋକଙ୍କ ଠାରୁ ମତାମତ ନିଆଯିବ । କମ୍ପାନୀର ପେମେଣ୍ଟ ଲୋକଙ୍କୁ ସନ୍ତୁଷ୍ଟ କରୁଥିବା ଭଳି ହେବ । ମୁଖ୍ୟମନ୍ତ୍ରୀଙ୍କ କହିବାନୁସାରେ, ଯଦି ୨୫ ଲକ୍ଷ ଲୋକ ଏହି ଯୋଜନାର ବ୍ୟବହାର କରୁଛନ୍ତି, ତେବେ ଏହି ସେବା ଜନସାଧାରଣଙ୍କ ପାଖରେ ପହଂଚାଇବା ପାଇଁ ସରକାରଙ୍କ ୧୨ କୋଟି ଟଙ୍କା ଖର୍ଚ୍ଚ ହେବ ।
ଡୋର ଷ୍ଟେପ୍ ଡେଲିଭରୀ ଯୋଜନା ଅଧିନରେ ମିଳିବ ଏହି ସବୁ ସୁବିଧା : ଏହି ସ୍କିମ୍ ରେ ଡ୍ରାଇଭିଙ୍ଗ ଲାଇସେନ୍ସ, ସବୁ ପ୍ରକାରର ସାର୍ଟିଫିକେଟ୍, ପ୍ରମାଣ ପତ୍ର ଆଦି ସୁବିଧା ଗୋଟିଏ କଲ୍ ରେ ଆପଣଙ୍କ ଘରେ ପହଂଚିବ । ଏହି ଯୋଜନା ଅଧିନରେ ଆପଣଙ୍କ ଘରକୁ ସରକାର ଦ୍ୱାରା ନିଯୁକ୍ତ କରାଯାଇଥିବା ମୋବାଇଲ୍-ସହାୟକ ଆସିବ । ଏହି ମୋବାଇଲ୍-ସହାୟକ ହିଁ ସେବା ପାଇଁ ସରକାରଙ୍କ ତରଫରୁ ନିର୍ଦ୍ଧାରିତ ଫିସ୍ ନେଇ ଦସ୍ତାବିଜ୍ ବ୍ୟତୀତ ମେସିନ୍ ରେ ଆଙ୍ଗୁଠିର ଚିହ୍ନ ଲଗାଇବା ସହିତ ସମସ୍ତ ସୁବିଧା ଆପଣଙ୍କ ଘରେ ଉପଲବ୍ଧ କରାଇବ । ଏହି ମୋବାଇଲ୍-ସହାୟକ ସେବା ଯୋଗାଇବା ପାଇଁ ଜନତାଙ୍କ ନିର୍ଦ୍ଧାରିତ ସମୟ ଓ ତାରିଖରେ ହିଁ ଯାଇପାରିବ । ସରକାରୀ ଅଫିସର ଚକ୍କର କାଟିବାରୁ ମୁକ୍ତି ମିଳିବ ।