କର୍ଣ୍ଣୀ ସେନା ମୁଖ୍ୟ ସୁଖଦେବ ସିଂହଙ୍କୁ ହତ୍ୟା ଘଟଣା । ରାଜସ୍ଥାନରେ ପ୍ରତିବାଦ କରି ବନ୍ଦ ପାଳନ । କଂଗ୍ରେସ ନେତ୍ରୀ କହିଲେ ଫେରିଲା ଜଙ୍ଗଲରାଜ ।
କନକ ବ୍ୟୁରୋ: ମଙ୍ଗଳବାର ଏକ ଘର ଭିତରେ କର୍ଣ୍ଣୀ ସେନା ମୁଖ୍ୟ ସୁଖଦେବ ସିଂହଙ୍କୁ ହତ୍ୟା ଘଟଣା ଏବେ ରାଜସ୍ଥାନ ରାଜନୀତିକୁ ସରଗରମ କରିଛି । ଯାହାର ପ୍ରତିବାଦ କରି ବନ୍ଦ ପାଳିଛନ୍ତି ରାଜପୁତ । ରାଜସ୍ଥାନର ଜୟପୁର, ଜୋଧପୁର, ଅଲବର ସମେତ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଇଛି । ନିର୍ବାଚନ ଫଳାଫଳ ପରେ ଘଟିଥିବା ଏହି ହତ୍ୟାକାଣ୍ଡ ପାଇଁ ଅଶୋକ ଗେହଲଟ ସରକାର ଦାୟୀ ବୋଲି ପ୍ରତିବାଦୀକାରୀ କହିଛନ୍ତି । ମୃତ ସୁଖଦେବ ସିଂହ ବିଦାୟୀ ସରକାର ବା କଂଗ୍ରେସର ବିରୋଧୀ ଥିଲେ । ଗେହଲଟ ସରକାର ସମୟରେ ତାଙ୍କର ସୁରକ୍ଷା କମାଇ ଦିଆଯାଇଥିଲା । ଏପରିକି ସେ ହତ୍ୟାର ଶିକାର ହୋଇପାରନ୍ତି ବୋଲି ନିଜେ ଆଶଙ୍କା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏବେ ନିର୍ବାଚନରେ ପରାଜୟ ପରେ ପ୍ରତିଶୋଧ ନେବାକୁ ଯାଇ ଏହି ହତ୍ୟାକାଣ୍ଡ ଘଟାଯାଇଥିବା କର୍ଣ୍ଣୀ ସେନା ଦାବି କରିଛି । ତେବେ ହତ୍ୟା ପାଇଁ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ନିଜକୁ ଦାୟୀ କରିଛି ।
- ସୁଖଦେବଙ୍କୁ ହତ୍ୟା, ତେଜିଲା ରାଜନୀତି
- କଂଗ୍ରେସ କହିଲା ଫେରିଲା ଜଙ୍ଗଲ ରାଜ
- ଭିଡିଓ ପୋଷ୍ଟ କରି ବିଜେପି ଦେଲା ଜବାବ
ରାଜସ୍ଥାନରେ ବିଧାନସଭା ନିର୍ବାଚନ ଫଳାଫଳର ଦୁଇ ଦିନ ପରେ ସୁଖଦେବ ସିଂ ଗୋଗାମେଡି ହତ୍ୟାକୁ ନେଇ ରାଜନୈତିକ ଝଡ଼ ଆରମ୍ଭ ହୋଇଛି । କଂଗ୍ରେସ ନେତ୍ରୀ ସୁପ୍ରିୟା ଶ୍ରୀନେତ୍ର ଟ୍ୱିଟ୍ କରି କହିଛନ୍ତି ଯେ ରାଜ୍ୟକୁ ଫେରିଲା ଜଙ୍ଗଲ ରାଜ । ସେପଟେ ସରକାର ଗଢିବାକୁ ପ୍ରସ୍ତୁତ ହେଉଥିବା ବିଜେପି ଦାବି କରିଛି ଯେ ପରାଜୟ ପରେ କଂଗ୍ରେସ ସରକାର ପ୍ରତିଶୋଧ ନେବାକୁ ଯୋଜନା କରି ସୁଖଦେବଙ୍କ ସୁରକ୍ଷା କମାଇଥିଲା । ବିଜେପି ରାଷ୍ଟ୍ରୀୟ଼ ମୁଖପାତ୍ର ଶେହଜାଦ ପୁନାୱାଲା ସୁଖଦେବ ସିଂଙ୍କ ଭିଡିଓ ସେୟାର କରି କହିଛନ୍ତି ଯେ ତାଙ୍କ ଜୀବନ ପ୍ରତି ବିପଦ ଥିବା ପୋଲିସ ପାଖରେ ସୂଚନା ଥିଲା । ଏହା ସତ୍ୱେ ମୁଖ୍ୟ଼ମନ୍ତ୍ରୀ ତାଙ୍କ ସୁରକ୍ଷା ହ୍ରାସ କରିଥିଲେ ।
ଏହି ମାମଲାରେ ରୋହିତ ରାଠୋଡ ଓ ନୀତିନ ଫୌଜି ଗିରଫ ହୋଇଛନ୍ତି । ସେନାରେ ନିୟୋଜିତ ଥିବା ନୀତିନ ଏଭଳି କାଣ୍ଡ କାହିଁକି ଭିଆଇଲା ତାକୁ ନେଇ ମଧ୍ୟ ପ୍ରଶ୍ନ ଉଠିଛି , ଯିଏକି ହରିଆଣାବାସୀ । ଏବେ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ଫୋର୍ସ ମୁତୟନ କରାଯାଇଛି । ହିଂସା ଉସକାଉଥିବା କଥାକୁ ବିଶ୍ୱାସ ନ କରିବାକୁ ପୁଲିସ ଜନସାଧାରଣଙ୍କୁ ଅପିଲ କରିଛି ।