ଫ୍ରାନ୍ସରେ ପରିସ୍ଥିତି ଅସମ୍ଭାଳ: ମେୟରଙ୍କ ଘର ଉପରେ କାର୍ ଚଢାଇଦେଲେ ବିକ୍ଷୋଭକାରୀ, ମେୟରଙ୍କ ସହ ପତ୍ନୀ ଓ ପୁଅ ଆହତ

କନକ ବ୍ୟୁରୋ: ଫ୍ରାନ୍ସରେ ହିଂସା ଥମିବାର ନାଁ ନେଉନି । ନାବାଳକ ଟ୍ରାଫିକ୍ ନିୟମ ନମାନିବାରୁ ପୁଲିସ ତା’ ଉପରକୁ ଗୁଳି ଚଳାଇବା ଏବଂ ଘଟଣାସ୍ଥଳରେ ତା’ର ମୃତ୍ୟୁ ଘଟଣାକୁ ବିରୋଧ କରି ଫ୍ରାନ୍ସରେ ପରିସ୍ଥିତି ଅତି ଜଟିଳ ହୋଇଛି ।

ଫ୍ରାନ୍ସରେ ଲଗାତାର ପଞ୍ଚମ ଦିନ ଧରି ଦଙ୍ଗା ଜାରି ରହିଛି। ଦଙ୍ଗାକାରୀଙ୍କ ଆତଙ୍କ ବେଳକୁ ବେଳ ଭୟାନକ ହେଉଥିବା ବେଳେ ପୁଲିସ ପ୍ରଶାସନ ଅସହାୟ ପାଲଟି ଯାଇଛି। ଅତିରିକ୍ତ ୪୫ ହଜାର ସୁରକ୍ଷା କର୍ମୀଙ୍କ ନିୟୋଜନ ସତ୍ତ୍ବେ ହିଂସା ନିୟନ୍ତ୍ରଣ ହେଉନାହିଁ। ଗତରାତିରେ ମଧ୍ୟ ଦଙ୍ଗାକାରୀ ଶତାଧିକ ସରକାରୀ ଭବନରେ ନିଆଁ ଲଗାଇ ଦେବା ସହ ୨ ଶହରୁ ଅଧିକ ଗାଡ଼ି ଜାଳି ଦେଇଛନ୍ତି। ପ୍ରାୟ ୧ ହଜାର ଦୋକନ ଜଳି ପାଉଁଶ ହୋଇଯାଇଛି।

କେବଳ ଏତିକି ନୁହେଁ ଦକ୍ଷିଣ ପ୍ୟାରିସର ମେୟରଙ୍କ ଘର ଉପରେ ବିକ୍ଷୋଭକାରୀ କାର୍ ମଡାଇଦେବାରୁ ମେୟରଙ୍କ ସହ ତାଙ୍କ ପତ୍ନୀ ଓ ପୁଅ ଆହତ ହୋଇଥିବା ଜଣାପଡିଛି । ଦଙ୍ଗାକାରୀମାନେ ବାସଭବନକୁ ଜାଳିଦେବାକୁ ମଧ୍ୟ ଉଦ୍ୟମ କରିଥିଲେ ବୋଲି ମେୟର ଭିନ୍‌ସେଣ୍ଟ୍‌ ଜିନ୍‌ବ୍ରୁନ୍‌ କହିଛନ୍ତି। ଗତରାତି ତାଙ୍କ ପାଇଁ ଅତ୍ୟନ୍ତ ଭୟାନକ ଥିଲା ଏବଂ ସେ ଘରେ ନଥିବା ସମୟରେ ଆକ୍ରମଣ ହୋଇଥିଲା । ପତ୍ନୀ ଓ ଦୁଇ ସନ୍ତାନ ଶୋଇଥିବା ସମୟରେ ଦଙ୍ଗାକାରୀମାନେ ଏକ କାର୍‌କୁ ଘର ଉପରେ ଚଢ଼ାଇ ଦେଇଥିଲେ। ଏଥିରେ ତାଙ୍କ ପତ୍ନୀ ଗୁରୁତର ଆହତ ହୋଇଛନ୍ତି ଏବଂ ଦୁଇ ସନ୍ତାନଙ୍କ ମଧ୍ୟରୁ ଜଣେ ଆହତ ହୋଇଛି।
ଫ୍ରାନ୍ସର ବିଭିନ୍ନ ସହରରେ ହଜାର ହଜାର ସରକାରୀ ଦପ୍ତର ପୋଡ଼ି ପାଉଁଶ ହୋଇଯାଇଥିବା ବେଳେ ଲୁଟ୍‌ପାଟ୍‌ ମଧ୍ୟ ଅତି ବ୍ୟାପକ ହୋଇଛି। ଏଭଳି ସ୍ଥିତିରେ ଆଇନ ଶୃଙ୍ଖଳା ରକ୍ଷା କରିବା ଅତୀବ କଷ୍ଟକର ହୋଇପଡ଼ିଛି। ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଏହି ଦଙ୍ଗା ପାଇଁ ସବୁଠାରୁ ବଡ଼ ସଙ୍କଟ ସାମ୍ନା କରୁଛନ୍ତି ଏବଂ ପରିସ୍ଥିତି ଖୁବ୍‌ଶୀଘ୍ର ନିୟନ୍ତ୍ରଣକୁ ଆସିବ ବୋଲି ଲୋକଙ୍କୁ ପୁଣିଥରେ ଆଶ୍ବସ୍ତ କରିଛନ୍ତି। ପୁଲିସ ଗୁଳିରେ ଯେଉଁ ୧୭ ବର୍ଷୀୟ ମୁସ୍‌ଲିମ ବାଳକ ନାହେଲ ଏମ୍‌ ନିହତ ହୋଇଥିଲା ତା’ର ପରିବାର ନାଇଜେରିଆରୁ ଆସି ପ୍ୟାରିସ୍‌ରେ ରହୁଥିଲେ। କେତେକ ଅପରାଧ ମାମଲାରେ ଜଡ଼ିତ ଏହି ବାଳକକୁ ଯେଭଳି ଗୁଳି କରାଗଲା ତାହା ଅକ୍ଷମଣୀୟ ବୋଲି ରାଷ୍ଟ୍ରପତି ମାକ୍ରନ କହିଛନ୍ତି। ଆଜି ମୃତ ବାଳକଙ୍କ ପରିବାର ପକ୍ଷରୁ ଶାନ୍ତି ରକ୍ଷା ପାଇଁ ଲୋକଙ୍କୁ ନିବେଦନ କରାଯାଇଛି।

ଗତ ୫ ଦିନ ମଧ୍ୟରେ ୪ ହଜାରରୁ ଅଧିକ ଲୁଟ୍‌ପାଟ୍‌ ମାମଲା ସାମ୍ନାକୁ ଆସିଛି। ଗତ ୨୪ ଘଣ୍ଟାରେ ପ୍ରାୟ ୧ ହଜାର ଲୋକ ଗିରଫ ହୋଇଛନ୍ତି ଏବଂ ମୋଟ ଗିରଫ ସଂଖ୍ୟା ୩ ହଜାର ଟପିଗଲାଣି ବୋଲି ଜଣାପଡ଼ିଛି। ଦେଶର ଶତାଧିକ ସ୍କୁଲ, ପୁଲିସ ଷ୍ଟେସନ ଏବଂ ମଲ୍‌ଗୁଡ଼ିକୁ ଦଙ୍ଗାକାରୀମାନେ ଟାର୍ଗେଟ୍‌ କରିଛନ୍ତି। ଦଙ୍ଗା ଯୋଗୁଁ ୨୦୦ରୁ ଅଧିକ ପୁଲିସ ଅଫିସର ଆହତ ହୋଇଛନ୍ତି।