ଦୁଇ ଦିନିଆ ରୁଷ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ‘ଈର୍ଷା’ କରୁଛି ୟୁରୋପ ?

କନକ ବ୍ୟୁରୋ: ୫ ବର୍ଷ ମଧ୍ୟରେ ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ମୋଦୀ ରୁଷ ଗସ୍ତରେ। ୟୁରୋପ ସମେତ ଆମେରିକା ରୁଷିଆ ଉପରେ ଅନେକ କଠୋର କଟକଣା ଲଗାଇଥିବା ବେଳେ ମୋଦୀଙ୍କ ଗସ୍ତ ଉପରେ ସାରା ବିଶ୍ୱ ନଜର ରଖିଛି। ଏହି କଟକଣାର କାରଣ ୟୁକ୍ରେନ ଉପରେ ଆକ୍ରମଣ ବୋଲି କୁହାଯାଉଛି। ଅନ୍ତିମ ଥର ମୋଦୀ ୨୦୨୨ ମସିହାରେ ପୁଟିନଙ୍କୁ ଭେଟିଥିଲେ । କିନ୍ତୁ ଏହି ଭେଟଘାଟ ମସ୍କୋରେ ନୁହେଁ ବରଂ ଉଜବେକିସ୍ତାନର ସମରକାଣ୍ଡର ଏସସିଓ ସମ୍ମିଳନୀରେ ହୋଇଥିଲା ।

ଏହି ବୈଠକରେ ମୋଦୀ ପୁଟିନଙ୍କୁ କହିଥିଲେ ଯେ ଏବେ ଯୁଦ୍ଧର ଯୁଗ ନୁହେଁ। ନୂଆଦିଲ୍ଲୀ ଏବଂ ମସ୍କୋ ମଧ୍ୟରେ ଦଶନ୍ଧି ଧରି ଉତ୍ତମ ସମ୍ପର୍କ ରହିଛି। ବିଶେଷକରି ୧୯୭୧ରେ ଯେତେବେଳେ ଭାରତ-ସୋଭିଏତ ଶାନ୍ତି, ବନ୍ଧୁତା ଏବଂ ସହଯୋଗ ଚୁକ୍ତି ଭାରତ ଏବଂ ପୂର୍ବତନ ସୋଭିଏତ ସଂଘ ଦ୍ୱାରା ସ୍ୱାକ୍ଷରିତ ହୋଇଥିଲା। ଏସିଆରେ ଆମେରିକୀୟ ଓ ଚୀନର ଆଧିପତ୍ୟକୁ ସନ୍ତୁଳିତ କରିବା ପାଇଁ ମସ୍କୋ ଆରମ୍ଭରୁ ଭାରତ ସହ ସହଯୋଗକୁ ଜରୁରୀ ମନେ କରୁଛି । ଅନ୍ତର୍ଜାତୀୟ ରାଜନୀତିରେ ଭାରତକୁ ରୁଷ୍ ଭଳି ଏକ ପ୍ରମୁଖ ଶକ୍ତି ସର୍ବଦା ସମର୍ଥନ କରୁଛି। ଭାରତର ଅଧିକାଂଶ ସାମରିକ ଯନ୍ତ୍ରପାତି ଏବେ ବି ସୋଭିଏତ-ରୁଷିଆର । ଭଲ ସମ୍ପର୍କ ରହିଥିଲେ ସ୍ପେୟାର ପାର୍ଟସ ଦରକାର । ଏବେ ବି ଭାରତୀୟ ବାୟୁସେନାର ଅଧିକାଂଶ ଲଢୁଆ ବିମାନ ରୁଷ ଦ୍ୱାରା ନିର୍ମିତ।

ଭାରତର ଚିନ୍ତା ହେଉଛି ଯେ ରୁଷ୍ ଚୀନ୍ ସହ ସମ୍ବେଦନଶୀଳ ଜ୍ଞାନକୌଶଳ ବାଣ୍ଟିପାରେ । ଚୀନ୍ କିମ୍ବା ପାକିସ୍ତାନ ସହ ସଂଘର୍ଷ ହେଲେ ରୁଷିଆ ସ୍ପେୟାର ପାର୍ଟସ ଯୋଗାଣକୁ ବିଳମ୍ବ କରିପାରେ ବୋଲି ଆଶଙ୍କା କରାଯାଉଛି। ଯଦି ଏପରି ହୁଏ ତେବେ ଭାରତକୁ କ୍ଷତି ସହିବାକୁ ପଡିପାରେ ଏବଂ ଏହି କାରଣରୁ ଭାରତ ରୁଷିଆ ଏବଂ ପାଶ୍ଚାତ୍ୟ ଦେଶ ମଧ୍ୟରେ ସମ୍ପର୍କକୁ ସନ୍ତୁଳିତ କରିବା ପାଇଁ ଏକ ରଣନୈତିକ ଉପାୟ ଆପଣାଉଛି। ଭାରତୀୟ ଦୂତାବାସ ୱେବସାଇଟରେ ଥିବା ତଥ୍ୟ ଅନୁଯାୟୀ, ଉଭୟ ଦେଶର ରାଜନୈତିକ ନେତୃତ୍ୱ ପାଇଁ ଭାରତ ଓ ରୁଷ୍ ମଧ୍ୟରେ ବାଣିଜ୍ୟ ଓ ଅର୍ଥନୈତିକ ସହଯୋଗ ବୃଦ୍ଧି ଗୁରୁତ୍ୱପୂର୍ଣ୍ଣ। ୨୦୨୫ ସୁଦ୍ଧା ଦ୍ୱିପାକ୍ଷିକ ନିବେଶକୁ ୪ ଲକ୍ଷ ୧୭ ହଜାର କୋଟି ଏବଂ ଦ୍ୱିପାକ୍ଷିକ ବାଣିଜ୍ୟକୁ ୨ ଲକ୍ଷ ୫୦ ହଜାର କୋଟିକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି।

ଇତିହାସ ପୃଷ୍ଠା ଠାରୁ ଆରମ୍ଭ କରି ଏବେର ସ୍ଥିତି ପର୍ୟ୍ୟନ୍ତ ଆପଣ କେଉଁଠି ବି ଦେଖନ୍ତୁ, ଏହି ଦୁଇ ଦେଶ ମଧ୍ୟରେ ବନ୍ଧୁତାରେ କୌଣସି ଉଣା ଦେଖିବାକୁ ମିଳିବନି। ବୋଧହୁଏ ଏହି କାରଣରୁ ପ୍ରଧାନମନ୍ତ୍ରୀ ମୋଦୀ ତାଙ୍କ ତୃତୀୟ