ଜାପାନରେ ପ୍ରଧାନମନ୍ତ୍ରୀ ମୋଦୀ । ମୋଦୀ ନାରାରେ କମ୍ପିଲା ଟୋକିଓ ।
କନକ ବ୍ୟୁରୋ: ସୋମବାରଠୁ ପ୍ରଧାନମନ୍ତ୍ରୀ ମୋଦିଙ୍କ ଦୁଇ ଦିନିଆ ଜାପାନ ଗସ୍ତ ଆରମ୍ଭ ହୋଇଛି । ଗସ୍ତର ପ୍ରଥମ ଦିନରେ ଟୋକିଓରେ ପହଁଚିବାପରେ ମୋଦିଙ୍କୁ ଭବ୍ୟସ୍ୱାଗତ ଓ ସମ୍ବର୍ନ୍ଧନା ପ୍ରଦାନ କରାଯାଇଛି । ପ୍ରବାସୀ ଭାରତୀୟଙ୍କୁ ସମ୍ବୋଧିତ କରିବା ସହ ବିଭିନ୍ନ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଯୋଗ ଦେଇଛନ୍ତି । ମଙ୍ଗଳବାର କ୍ୱାଡ ସମ୍ମିଳନୀରେ ଯୋଗ ଦେବା ସହ ଆମେରିକା,ଜାପାନ ଓ ଅଷ୍ଟ୍ରେଲିଆ ରାଷ୍ଟ୍ରମୁଖ୍ୟଙ୍କୁ ଭେଟିବେ ପ୍ରଧାନମନ୍ତ୍ରୀ । ମୋଟ ୪୦ ଘଂଟାର ଜାପାନ ରହଣୀ ସମୟରେ ୨୩ଟି ବୈଠକରେ ଯୋଗ ଦେବେ ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ମୋଦି ମୋଦି ନାରା ସହ ଭାରତ ମାତା କି ଜୟ, ବନ୍ଦେ ମାତରମ ନାରାରେ କମ୍ପିଲା ଜାପାନ ରାଜଧାନୀ ଟୋକିଓର ହୋଟେଲ ନିଉ ଓତାନି । ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ ଜଣାଥିଲେ ଜାପାନରେ ରହୁଥିବା ପ୍ରବାସୀ ଭାରତୀୟ । କାର୍ଯ୍ୟକ୍ରମର ସ୍ଥଳର ଦୁଇ ପାଶ୍ୱର୍ରେ ପ୍ରବାସୀ ଭାରତୀୟମାନେ ଭିଡ ଜମାଇ ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ ଜଣାଇଥିବାବେଳେ ମୋଦି ମଧ୍ୟ ହାତ ହଲାଇ ଅଭିବାଦନ ଗ୍ରହଣ କରିଥିଲେ । ସୋମବାର ଟୋକିଓରେ ପହଁଚିବାପରେ ମୋଦିଙ୍କ ରହଣୀସ୍ଥଳରେ ଏଭଳି କିଛି ଦୃଶ୍ୟ ଦେଖିବାକୁ ମିଳିଥିଲା । ସେପଟେ ପ୍ରଧାନମନ୍ତ୍ରୀଙ୍କୁ ଭେଟି ଖୁସି ପ୍ରକାଶ କରିଛନ୍ତି ଜାପାନରେ ରହୁଥିବା ପ୍ରବାସୀ ଭାରତୀୟ ।
ପ୍ରବାସୀ ଭାରତୀୟଙ୍କୁ ସମ୍ବୋଧିତ କରି ମୋଦି କହିଛନ୍ତି ଯେ ଭାରତର ବିକାଶ ଯାତ୍ରାରେ ଜାପାନର ଏକ ମହତ୍ୱପୂର୍ଣ୍ଣ ଯୋଗଦାନ ରହିଛି । ଦୁଇ ଦେଶ ପରସ୍ପରର ପ୍ରକୃତ ସହଯୋଗୀ ଓ ଉଭୟ ଦେଶ ମଧ୍ୟରେ ଆଧ୍ୟାତ୍ମିକତା ଓ ସହଯୋଗର ବନ୍ଧନ ରହିଛି । ସେହିପରି ପ୍ରବାସୀଙ୍କ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି, ଭାରତୀୟ ସଂପ୍ରଦାୟ ଦୁଇ ଦେଶ ମଧ୍ୟରେ ସର୍ମ୍ପକକୁ ଅଧିକ ମଜବୁତ କରୁଛି । ବିଶ୍ୱ ସମସ୍ୟାର ସମାଧାନ ପାଇଁ ଭଗବାନ ବୁଦ୍ଧଙ୍କ ଦ୍ୱାରା ପ୍ରଦର୍ଶିତ ମାର୍ଗ ଅନୁସରଣ କରିବା ଉଚିତ ବୋଲି କାର୍ଯ୍ୟକ୍ରମରେ ମୋଦି କହିଛନ୍ତି । ଏହାପରେ ପ୍ରଧାନମନ୍ତ୍ରୀ ମୋଦୀ ଆମେରିକା ରାଷ୍ଟ୍ରପତି ଜୋ ବାଇଡେନ ଓ ଜାପାନ ପ୍ରଧାନମନ୍ତ୍ରୀ ଫୁମିଓ କିସିଡାଙ୍କ ସହ ଇଣ୍ଡୋ ପେସିଫିକ ଇକୋନୋମିକ ଫ୍ରେମୱାର୍କ କାର୍ଯକ୍ରମରେ ଯୋଗ ଦେଇଥିଲେ ।