ଏପ୍ରିଲ୍ ମାସରୁ ବଢିବ ଅତ୍ୟାବଶ୍ୟକ ଔଷଧର ମୂଲ୍ୟ ।

କନକ ବ୍ୟୁରୋ : ବାର୍ଷିକ ‘ହୋଲସେଲ୍‌ ପ୍ରାଇସ୍‌ ଇଣ୍ଡେକ୍ସ୍‍’ ବଢ଼ାଇବା ନିମନ୍ତେ ସରକାର ଔଷଧ ନିର୍ମାତାମାନଙ୍କୁ ଅନୁମତି ଦେବାରୁ ଆସନ୍ତା ଏପ୍ରିଲ୍‌ ମାସରୁ ଯନ୍ତ୍ରଣା ନିବାରକ, ବ୍ୟାକ୍ଟେରିଆନାଶକ, ହୃଦରୋଗ ଔଷଧ ଏବଂ ଆଣ୍ଟିବାୟୋଟିକର ମୂଲ୍ୟ କିଛି ମାତ୍ରାରେ ବୃଦ୍ଧି ପାଇବ।

ସରକାର ଜାରି କରିଥିବା ବିଜ୍ଞପ୍ତି ଅନୁସାରେ, ୨୦୨୦ ବର୍ଷ ନିମନ୍ତେ ‘ଡବ୍ଲୁପିଆଇ’ ୦.୫% ଥିଲା ବୋଲି ଶୁକ୍ରବାର ଦିନ ‘ନ୍ୟାସନାଲ୍‌ ଫାର୍ମାସ୍ୟୁଟିକାଲ୍‌ ପ୍ରାଇସିଙ୍ଗ୍‌ ଅଥରିଟି’ କହିଛନ୍ତି। ବାର୍ଷିକ ‘ଡବ୍ଲୁପିଆଇ’ ଅନୁସାରେ ପ୍ରତିବର୍ଷ ‘ଡ୍ରଗ୍‌ ରେଗୁଲେଟର୍‌’ ଅତ୍ୟାବଶ୍ୟକ ଔଷଧର ମୂଲ୍ୟ ବୃଦ୍ଧି କରିବାକୁ ଅନୁମତି ଦେଇଥାଏ। କିନ୍ତୁ, ୨୦୨୦ ବର୍ଷରେ ଔଷଧ ଉତ୍ପାଦନର ମୂଲ୍ୟ ପ୍ରାୟ ୧୫%ରୁ ୨୦% ବୃଦ୍ଧି ପାଇଥିବାରୁ କମ୍ପାନିଗୁଡ଼ିକ ବିଶେଷ ପ୍ରଭାବିତ ହୋଇଛନ୍ତି। ତେଣୁ, ଏ ବର୍ଷ ଔଷଧ ଶିଳ୍ପ ୨୦% ବୃଦ୍ଧି ଚାହୁଁଛି।

ଔଷଧ ଶିଳ୍ପର ଜଣେ କାର୍ଯ୍ୟନିର୍ବାହୀ କହନ୍ତି, ଶତକଡ଼ା ହାରରେ ଦେଖିବାକୁ ଗଲେ ଦର ବୃଦ୍ଧି ପାଇଁ ମିଳିଥିବା ଅନୁମତି ଅତି ନଗଣ୍ୟ। ମହାମାରୀ ସମୟରେ ଔଷଧ ପ୍ରସ୍ତୁତ ନିମନ୍ତେ ଆବଶ୍ୟକ କଞ୍ଚାମାଲ, ପଣ୍ୟବାହୀ ପୋତର ଭଡ଼ା, ପ୍ୟାକେଜିଙ୍ଗ୍‌ ସାମଗ୍ରୀ ଏବଂ ଅନ୍ୟାନ୍ୟ ଆନୁସଙ୍ଗିକ ସାମଗ୍ରୀର ଦର ବୃଦ୍ଧି କାରଣରୁ ଔଷଧ ଶିଳ୍ପ ବିଶେଷ ପ୍ରଭାବିତ ହୋଇଛି। ତେଣୁ, ଔଷଧ ମୂଲ୍ୟ ବୃଦ୍ଧି କରିବାକୁ ଆମେ ସରକାରଙ୍କୁ ନିବେଦନ କରିଥିଲୁ।

ହୃଦରୋଗ, ମଧୁମେହ, ଆଣ୍ଟିବାୟୋଟିକ୍‌, ବ୍ୟାକ୍ଟେରିଆନାଶକ ଏବଂ ଭିଟାମିନ୍‌ ଭଳି ଔଷଧ ପ୍ରସ୍ତୁତି ନିମନ୍ତେ ଆବଶ୍ୟକ କଞ୍ଚାମାଲ ଚୀନରୁ ଆମଦାନି କରାଯାଇଥାଏ। ମହାମାରୀ ଯୋଗୁଁ ୨୦୨୦ ପ୍ରାରମ୍ଭରେ କଞ୍ଚାମାଲ ଯୋଗାଣରେ ବ୍ୟାଘାତ ସୃଷ୍ଟି ହୋଇଥିଲା। ବର୍ଷର ମଧ୍ୟ ଭାଗରେ ପୁଣି ଯୋଗାଣ ଆରମ୍ଭ ହେଲା ବେଳକୁ ଚୀନ୍‌ ମଧ୍ୟ କଞ୍ଚାମାଲ ଦର ୧୦% ରୁ ୨୦% ବୃଦ୍ଧି କରିଥିଲା।