କନକ ବ୍ୟୁରୋ: ମହିଳାଙ୍କୁ ଯେତେ ପ୍ରକାର କ୍ୟାନସର ହୋଇଥାଏ, ଦ୍ୱିତୀୟ ସ୍ଥାନରେ ରହିଛି ସର୍ଭିକାଲ୍ କ୍ୟାନସର ବା ଜରାୟୁ କର୍କଟ ।
ସ୍ତନ କର୍କଟ ପରେ ଜରାୟୁ କର୍କଟର ସ୍ଥାନ
୧୫ ବର୍ଷରୁ ୪୪ ବର୍ଷ ବୟସ ବର୍ଗର ମହିଳାମାନେ ଅଧିକ ଆକ୍ରାନ୍ତ ହୋଇଥାନ୍ତି
ଭାରତରେ ପ୍ରତିବର୍ଷ ପ୍ରାୟ ୧ ଲକ୍ଷ ୨୩ ହଜାର ମହିଳା ଏହି ରୋଗରେ ପଡ଼ିଥାନ୍ତି
ପ୍ରାୟ ୬୭ ହଜାର ୫୦୦ ମହିଳା ଜରାୟୁ କର୍କଟରେ ପ୍ରାଣ ହରାଇଥାନ୍ତି

Advertisment

ତେବେ ଆଶ୍ୱସ୍ତର କଥା ହେଉଛି, ଜରାୟୁ କର୍କଟକୁ ପ୍ରତିରୋଧ କରିବା ପାଇଁ ଟିକା ରହିଛି । ଜାତୀୟ ଟିକାକରଣ କାର୍ଯ୍ୟକ୍ରମରେ ଏହାକୁ ସାମିଲ କରିବାକୁ ଯୋଜନା କରିଛନ୍ତି କେନ୍ଦ୍ର ସରକାର । ଏ ନେଇ ଅଗଷ୍ଟ ୧୫ ତାରିଖରେ ଘୋଷଣା କରିପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏପଟେ ଆକାଂକ୍ଷୀ ଜିଲ୍ଲାରେ ୯ରୁ ୧୩ ବର୍ଷର ଝିଅଙ୍କୁ ମାଗଣାରେ ଟିକା ଦେବାକୁ ଅଂଟା ଭିଡିଛନ୍ତି ରାଜ୍ୟ ସରକାର ।

୧୦ଟି ଆକାଂକ୍ଷୀ ଜିଲ୍ଲାର ହାଇସ୍କୁଲରେ ୯ରୁ ୧୩ ବର୍ଷ ବୟସର ବାଳିକାମାନଙ୍କୁ ମାଗଣାରେ ହ୍ୟୁମାନ ପାପିଲୋମା ଭାଇରସ୍ (ଏଚପିଭି) ଟିକା ଦେବା ପାଇଁ ଯୋଜନା କରୁଛନ୍ତି ରାଜ୍ୟ ସରକାର । ସର୍ଭିକାଲ କ୍ୟାନସର ବା ଜରାୟୁ କର୍କଟରୁ ସୁରକ୍ଷା ଦେବ ଏହି ଟିକା । ଦୁଇବର୍ଷ ଭିତରେ ୧୦ଟି ଜିଲ୍ଲା - ବଲାଙ୍ଗିର, ଢେଙ୍କାନାଳ, ଗଜପତି, କନ୍ଧମାଳ, କଳାହାଣ୍ଡି, ନୂଆପଡ଼ା, ନବରଙ୍ଗପୁର, ରାୟଗଡ଼ା, ମାଲକାନଗିରି ଓ କୋରାପୁଟରେ ଟିକା ଦିଆଯିବାକୁ ଲକ୍ଷ୍ୟ ରଖାଯାଇଛି । ଏହି ଟିକା ୭୦ ପ୍ରତିଶତ ପର୍ଯ୍ୟନ୍ତ ପ୍ରଭାବଶାଳୀ ବୋଲି କହିଛନ୍ତି ବିଶେଷଜ୍ଞ ଡାକ୍ତର ।

ଜରାୟୁ କର୍କଟରୁ ମହିଳାଙ୍କୁ ରକ୍ଷା କରିବା ପାଇଁ ଜାତୀୟ ଟିକାକରଣ ମିସନରେ ସିରମ୍ ଇନଷ୍ଟିଚ୍ୟୁଟର ସ୍ୱଦେଶୀ ଟିକାକୁ ସାମିଲ କରିବାକୁ କେନ୍ଦ୍ର ସରକାର ଯୋଜନା କରୁଛନ୍ତି । ଡିସେମ୍ବର ସୁଦ୍ଧା ୧ କୋଟି ଟିକା ଯୋଗାଇପାରିବ ବୋଲି ସିରମ୍ ।