କାଲି ଠାରୁ ସର୍ବସାଧାରଣଙ୍କ ପାଇଁ ଖୋଲିବ ରାଷ୍ଟ୍ରପତିଙ୍କ ମୋଗଲ ଗାର୍ଡେନ । ୱାକ-ଇନ ପ୍ରବେଶ ଉପରେ ରୋକ୍ , ଅନଲାଇନ୍ ରେ ଟିକେଟ କରି ପଶିପାରିବେ ଭ୍ରମଣକାରୀ
କନକ ବ୍ୟୁରୋ : କରୋନା ମହାମାରୀ ଭିତରେ ଆସନ୍ତା କାଲି ଠାରୁ ସର୍ବସାଧାରଣଙ୍କ ପାଇଁ ଖୋଲିବ ରାଷ୍ଟ୍ରପତିଙ୍କ ମୋଗଲ ଉଦ୍ୟାନ । ଏନେଇ ଆଜି ରାଷ୍ଟ୍ରପତି ରାମନାଥ କୋବିନ୍ଦ ରାଷ୍ଟ୍ରପତି ଭବନରେ ‘ଉଦ୍ୟାନୋତ୍ସବ’ର ଶୁଭାରମ୍ଭ କରିବେ । ଆସନ୍ତା କାଲି ଠାରୁ ୨୧ ତାରିଖ ପର୍ଯ୍ୟନ୍ତ ରାଷ୍ଟ୍ରପତିଙ୍କ ମୋଗଲ ଉଦ୍ୟାନ ସର୍ବସାଧାଣଙ୍କ ପାଇଁ ଖୋଲା ରହିବ ।
ଏହି ଭବନ ଖୋଲିବା ନେଇ ଚଳିତ ବର୍ଷ ସତର୍କତାମୂଳକ ପଦକ୍ଷେପ ନିଆଯାଇଛି । ଯେମିତି କି ୱାକ-ଇନ ପ୍ରବେଶ ଉପରେ ରୋକ୍ ଲଗାଯାଇଛି । ଯେଉଁମାନେ ମୋଗଲ ଉଦ୍ୟାନ ବୁଲିବାକୁ ଚାହିଁବେ ସେମାନଙ୍କୁ ଅଗ୍ରୀମ ଅନଲାଇନ ଟିକଟ ବୁକିଂ କରିବାକୁ ପଡିବ । ଲୋକମାନେ rastrapatisachivalaya.gov.in ୱେବସାଇଟ୍ ମାଧ୍ୟମରେ ଏଥିପାଇଁ ବୁକିଂ କରିପାରିବେ ବୋଲି ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଟିକେଟ ବୁକିଂ କରି ଅନୁମତି ପାଇବା ପରେ ବି ଉଦ୍ୟାନ ବୁଲି ଦେଖିବାକୁ କିଛି କଟକଣା ଜାରି କରାଯାଇଛି । ଯେମିତି କି ପ୍ରତ୍ୟେକ ଥରରେ ସର୍ବାଧିକ ୧୦୦ ଜଣ ଲୋକ ଉଦ୍ୟାନ ଭିତରକୁ ପ୍ରବେଶ କରିପାରିବେ । ଏହାସହ ଭ୍ରମଣ ସମୟରେ ଦର୍ଶକ ମାନଙ୍କୁ ସରକାରଙ୍କ କୋଭିଡ୍ କଟକଣା ମାନିବାକୁ ପଡିବ । ମାସ୍କ ଓ ସାମାଜିକ ଦୂରତା ଉପରେ ଅଧିକ ଗୁରୁତ୍ୱ ଦିଆଯିବା ସହ ପ୍ରବେଶ ଦ୍ୱାରରେ ଥର୍ମାଲ ସ୍କ୍ରିନିଂ କରାଯିବ । କୋଭିଡ ସଂକ୍ରମିତ ବ୍ୟକ୍ତିଙ୍କୁ ଦର୍ଶନ ପାଇଁ ଅନୁମତି ମିଳିବ ନାହିଁ ।
ସମସ୍ତ ଭ୍ରମଣକାରୀ ମାନେ ରାଷ୍ଟ୍ରପତିଙ୍କ ଇଷ୍ଟେଟ୍ ଗେଟ୍ ନମ୍ବର ୩୫ ଦେଇ ପ୍ରବେଶ ଓ ପ୍ରସ୍ଥାନ କରିବେ । ଉଦ୍ୟାନ ଭିତରକୁ ପାଣି ବୋତଲ, ହ୍ୟାଣ୍ଡବ୍ୟାଗ, ପର୍ସ, କ୍ୟାମେରା, ରେଡିଓ, ଛତା ଓ ଖାଦ୍ୟ ପଦାର୍ଥ ନେବାକୁ ବାରଣ କରାଯାଇଛି । ସେପଟେ ସରକାରଙ୍କ ପକ୍ଷରୁ ଭ୍ରମଣକାରୀଙ୍କ ପାଇଁ ସାନିଟାଇଜର, ପାନୀୟ ଜଳ, ଶୌଚାଳୟ ଓ ପ୍ରାଥମିକ ଚିକିତ୍ସାର ସମସ୍ତ ସୁବିଧା ଯୋଗାଇ ଦିଆଯିବ ବୋଲି କୁହାଯାଇଛି । ଭ୍ରମଣକାରୀ ମାନେ ସେହି ଟିକଟ୍ ମାଧ୍ୟମରେ ମୋଗଲ ଉଦ୍ୟାନ ଦେଖିବା ସହ ରାଷ୍ଟ୍ରପତି ଭବନ ଓ ରାଷ୍ଟ୍ରପତି ଭବନ ସଂଗ୍ରହାଳୟ ମଧ୍ୟ ବୁଲି ଦେଖିପାରିବେ ।