ପିଲାବେଳୁ ଜେଜେ ମାଆ ଥିଲେ ଆଦର୍ଶ, କେହି ନଥିଲେ ରୋଲ ମଡେଲ : ରାଷ୍ଟ୍ରପତି ଦ୍ରୌପଦୀ ମୁର୍ମୁ

କନକ ବ୍ୟୁରୋ : ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆଜି ଦ୍ୱିତୀୟ ଦିନର ଗସ୍ତ । ଦ୍ୱିତୀୟ ଦିନରେ ଅନେକ ହଜିଲା ସ୍ମୃତି ସାଉଁଟିଛନ୍ତି ରାଷ୍ଟ୍ରପତି । ପ୍ରଥମେ ଖଣ୍ଡଗିରିରେ ଥିବା ତପୋବନ ହାଇସ୍କୁଲରେ ପହଂଚିଛନ୍ତି । ସେଠାରେ ଥିବା ପୁରାତନ ଛାତ୍ରଛାତ୍ରୀଙ୍କ ସହ ସ୍କୁଲ ପିଲାଙ୍କୁ ସାକ୍ଷାତ କରିଛନ୍ତି ଦ୍ରୌପଦୀ । ସ୍କୁଲରେ ପହଞ୍ଚିବା ପରେ ରାଷ୍ଟ୍ରପତିଙ୍କୁ ଭବ୍ୟ ସ୍ୱାଗତ କରାଯାଇଥିଲା । ସେଠାରେ ସେ ପିଲାମାନଙ୍କ ସହ ଆଲୋଚନା କରିଛନ୍ତି ।

ପିଲାଙ୍କ ସହିତ ଭାବବିନିମୟ କରିଥିବା ବେଳେ ତାଙ୍କର କେହି ରୋଲ୍ ମଡେଲ ନଥିବା କହିଛନ୍ତି ରାଷ୍ଟ୍ରପତି । ମୋର ଜେଜେ ମାଆ ଥିଲେ ମୋ ପାଇଁ ସବୁକିଛି । ମୁଁ ତାଙ୍କୁ ଦେଖି ଦେଖି ଛୋଟରୁ ବଡ ହୋଇଛି । ଗାଁପରିବେଶରେ କିଭଳି ଚଳିବାକୁ ହୁଏ ସମସ୍ତ ଚଳନୀ ଶିଖିଛି । ଜେଜେମା’ଙ୍କଠାରୁ ସାହସ ପାଇଛି ଓ ସାହସୀ ହୋଇଛି । ସେହିଭଳି ପିଲାବେଳେ ଦେଶବିଦେଶର କୌଣସି ଗ୍ୟାନ ନଥିଲା । ତେବେ ଆମେ ଯାହା ହେବାକୁ ଚାହୁଁଛ ତାକୁ ନିଜର ଲକ୍ଷ୍ୟ କରିନେବା ଉଚିତ୍ ବୋଲି ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଛନ୍ତି ।