ସ୍କୁଲକୁ ଗଲେ, ଚୁନିକୁ ଖୋଜିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଜାଣନ୍ତୁ, ଏହି ଚୁନି କିଏ?
କନକ ବ୍ୟୁରୋ: ସମୟ ବଦଳିଛି, ଏହା ଭିତରେ ବିତିଯାଇଛି ଅନେକ ବର୍ଷ । ହେଲେ ବନ୍ଧୁତାର ରଜ୍ଜୁ ଆଜି ବି ସେମିତି ମଜଭୁତ ରହିଛି । ଆଉ ରାଷ୍ଟ୍ରପତି ଯେତେବେଳେ ୟୁନିଟ୍-୨ ବାଳିକା ଉଚ୍ଚ ବିଦ୍ୟାଳୟରେ ପହଞ୍ଚିଥିଲେ, ନିଜର ପୁରୁଣା ବନ୍ଧୁଙ୍କୁ ଖୋଜି ବସିଥିଲେ । ପିଲା ଦିନର ସାଙ୍ଗମାନଙ୍କ ଚେହେରା ଚିହ୍ନୁ ଚିହ୍ନୁ ହଠାତ୍ ପଚାରଥିିଲେ ଚୁନି କାହିଁ?
Kanak News is now on WhatsApp
Join and get latest news updates delivered to you via WhatsApp
ବିତିଯାଇଥିବା ଦିନ ହୁଏତ ଫେରିବନି, କିନ୍ତୁ ପୁରୁଣା ଦିନର ସ୍ମୃତିକୁ ସାଉଁଟି ଧରିବାର ସୁଯୋଗକୁ ହାତ ଛଡ଼ା କରି ନାହାଁନ୍ତି ମହାମହିମ । ଏହି ସ୍କୁଲର ପ୍ରତିଟି କୋଣ ସହ ପରିଚିତ ଦେଶର ପ୍ରଥମ ନାଗରିକ । ଦ୍ରୌପଦୀ ମୁର୍ମୁ ଯେତେବେଳେ ନିଜେ ପଢ଼ିଥିବା ସ୍କୁଲରେ ପହଞ୍ଚିଥିଲେ, ଅତି ଭାବବିହ୍ୱଳ ହୋଇଯାଇଥିଲେ । ପିଲା ଦିନର ସାଙ୍ଗମାନଙ୍କ ଚେହେରା ଚିହ୍ନୁ ଚିହ୍ନୁ ହଠାତ୍ ପଚାରିଲେ ଚୁନି କାହିଁ?
- କିଏ ସେ ଚୁନି ?
- କାହିଁକି ଚୁନିଙ୍କୁ ଖୋଜୁଥିଲେ ରାଷ୍ଟ୍ରପତି ?
ଚୁନି ହେଉଛନ୍ତି ତାଙ୍କ ପିଲାଦିନ ସାଙ୍ଗ । ଯାହାଙ୍କ ସହ ଭୁବନେଶ୍ୱରର ଏହି ୟୁନିଟ-୨ ଗାର୍ଲସ ହାଇସ୍କୁଲରେ ପାଠ ପଢ଼ୁଥିଲେ । ରାଷ୍ଟପ୍ରତିଙ୍କ ମୁହୁଁରୁ ଚୁନିଙ୍କ କଥା ଶୁଣି ଭାବପ୍ରବଣ ହୋଇଯାଇଥିଲେ ସହପାଠୀ । କାରଣ, ଦେଶର ଶୀର୍ଷ ଆସନରେ ବସିବା ପରେ ବି ରାଷ୍ଟ୍ରପତି ତାଙ୍କ ପିଲାଦିନ ଓ ସ୍କୁଲ ସାଙ୍ଗସାଥୀଙ୍କୁ ଭୁଲି ନଥିଲେ । ଯାହା ରାଷ୍ଟ୍ରପତିଙ୍କ ଏହି ପ୍ରଶ୍ନରୁ ସ୍ପଷ୍ଟ ବାରି ହୋଇପଡ଼ୁଥିଲା ।
ୟୁନିଟ-୨ ଗାର୍ଲସ ହାଇସ୍କୁଲର କୁନ୍ତଳା କୁମାରୀ ସାବତ, ଛାତ୍ରୀ ନିବାସରେ ରହୁଥିବା ବେଳେ ଚିନ୍ମୟୀଙ୍କ ସହ ଦ୍ରୌପଦୀ ମୁର୍ମୁଙ୍କ ଘନିଷ୍ଠତା ବଢ଼ିଥିଲା । ଏହି ସମ୍ପର୍କ ନିବିଡ଼ ହେବା ପଛରେ ବି କାରଣ ଥିଲା । ସେ ହଷ୍ଟେଲରେ ରହୁଥିବା ସମୟରେ ହଷ୍ଟେଲର ଇନଚାର୍ଜ ଥିଲେ ଶାନ୍ତିଲତା ଗୋଚ୍ଛାୟତ । ଶାନ୍ତିଲତାଙ୍କୁ ଯଶୋଦା ମା’ ଭଳି ମାନୁଥିଲେ ଦୌପଦୀ । ଆଉ ଏହି ଶାନ୍ତିଲତା ମ୍ୟାଡମଙ୍କ ଝିଅ ହେଉଛନ୍ତି- ଚିନ୍ମୟୀ ବା ଚିନୁ । ସ୍କୁଲ ଦିନରେ ଚିନ୍ମୟୀ ଓ ତାଙ୍କ ଭଉଣୀ ତନ୍ମୟୀଙ୍କ ସହ ଦୌପଦୀ ମୁର୍ମୁଙ୍କ ନିବିଡ଼ତା ବଢ଼ିଥିଲା ।
ତେବେ ପିଲାଦିନର ସାଙ୍ଗକୁ ଛୋଟ ପିଲାଟିଏ ଭଳି ରାଷ୍ଟ୍ରପତି ଦୌପଦୀ ମୁର୍ମୁ ଖୋଜିବା, ତାଙ୍କ ସରଳ ବ୍ୟକ୍ତିତ୍ୱର ପରିଚୟ ଦେଉଛି । ନହେଲେ, ଏତେ ବଡ଼ ଆସନରେ ବସିଥିବା ମହାମହିମ, ଗୋଟି ଗୋଟି କରି ସମସ୍ତ ସାଙ୍ଗଙ୍କୁ ଚିହ୍ନିଥାନ୍ତେ କେମିତି ଏବଂ ଅନୁପସ୍ଥିତ ସାଙ୍ଗଙ୍କୁ ଖୋଜିଥାନ୍ତେ କେମିତି ?