ସମାଜସେବୀ ଓ ଗାୟିକା ମୀନାକ୍ଷୀ ଧରଙ୍କ ପରଲୋକ : ଚିକିତ୍ସାଧୀନ ଅବସ୍ଥାରେ ୫୨ବର୍ଷ ବୟସରେ ପରଲୋକ
କନକ ବ୍ୟୁରୋ : ରାଉରକେଲାର ସୁପରିଚିତ ମଂଚ ଉପସ୍ଥାପିକା, ସୁସଂଗଠିକା, ସମାଜସେବୀ ଓ ଗାୟିକା ମିନାକ୍ଷୀ ଧରଙ୍କ ୫୨ ବର୍ଷ ବୟସରେ ପରଲୋକ ହୋଇଯାଇଛି । ପ୍ରାୟ ୯ ଦିନ ଧରି ସେ ହସ୍ପିଟାଲରେ ଚିକିତ୍ସତ ହେଉଥିଲେ । ଅଭାବନୀୟ କଥାଟି ହେଉଛି, ଗତ ୧୨ ତାରିଖରେ ନିଜ ସ୍କୁଟିରେ ଘରକୁ ଫେରିବା ସମୟରେ କୋଏଲ ନଗର ନିକଟରେ ୨ ଜଣ ଲୁଟେରା ତାଙ୍କ ଭ୍ୟାନିଟି ବ୍ୟାଗକୁ ଝାମ୍ପି ନେଇଥିଲେ । ସ୍କୁଟି ଚଳାଉଥିବା ସମୟରେ ଭାରସାମ୍ୟ ହରାଇ ସେ ରାସ୍ତାରେ ପଡି ଯାଇଥିଲେ ଓ ମୁଣ୍ଡରେ ଗଭୀର ଆଘାତ ଲାଗିଥିଲା । ପ୍ରଥମେ ତାଙ୍କୁ ଆଇଜିଏଚ ଓ ପରେ ଅବସ୍ଥା ସଂକଟାପନ୍ନ ହେବାରୁ ବେଦବ୍ୟାସସ୍ଥିତ ଜୟପ୍ରକାଶ ହସ୍ପିଟାଲକୁ ନିଆଯାଇଥିଲା । ସେଠାରେ ମସ୍ତିଷ୍କରେ ଅସ୍ତ୍ରୋପଚାର ପରେ ଭେଂଟିଲେଟରରେ ରଖାଯାଇଥିଲା । ଶୁଭେଚ୍ଛୁଙ୍କ ଅନେକ ପ୍ରାର୍ଥନା ସତ୍ୱେ ତାଙ୍କ ଜୀବନ ବଂଚାଇବା ସମ୍ଭବ ହୋଇପାରିନଥିଲା ।
Kanak News is now on WhatsApp
Join and get latest news updates delivered to you via WhatsApp
ମିନାକ୍ଷୀ ଗତ ୧୯୬୯ ଅକ୍ଟୋବର ୨୬ରେ ଦେବଗଡରେ ଜନ୍ମ ଗ୍ରହଣ କରିଥିଲେ। ଦେବଗଡ ଜିଲ୍ଲାରେ ବିଏ ପାସ୍ କରିଥିଲେ । ୧୯୯୩ରେ ସମ୍ବଲପୁରର ନଳିନୀକାନ୍ତ ଧରଙ୍କୁ ବିବାହ କରିଥିଲେ। ସ୍ବାମୀଙ୍କ ନଳିନୀଙ୍କ ସହ ରାଉରକେଲାରେ ରହୁଥିଲେ । ତାଙ୍କ ମୃତ୍ୟୁରେ ସହରର ରାଜନୈତିକ, ସାମାଜିକ ଓ ସାଂସ୍କୃତିକ ସଙ୍ଗଠନ ମହଲରେ ଗଭୀର ଶୋକ ପ୍ରକାଶ ପାଇଛି । ମିନାକ୍ଷୀ ଧର କେବଳ ଜଣେ ଭଲ ଉପସ୍ଥାପିତା ଥିଲେ ତା ନୁହେଁ, ଭଲ ସୁସଙ୍ଗଠନିକା ମଧ୍ୟ ଥିଲେ। ସହରର ପ୍ରତ୍ୟେକ ସାଂସ୍କୃତିକ କାର୍ଯ୍ୟକ୍ରମରେ ତାଙ୍କର ଉପସ୍ଥିତି ରହିଥିଲା । ସହରରେ ପ୍ରତ୍ୟେକ ଅନୁଷ୍ଠାନ ସହିତ ସେ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡିଥିଲେ।
ଗତ ୨ ଏପ୍ରିଲ ସ୍ଥାନୀୟ ସିଭିକ୍ ସେଣ୍ଟରରେ ଉତ୍କଳ ସାଂସ୍କୃତିକ ପରିଷଦ ପକ୍ଷରୁ ଆୟୋଜିତ ‘ଗରିମା’ ଥିଲା ତାଙ୍କର ଶେଷ କାର୍ଯ୍ୟକ୍ରମ। କେବଳ ରାଉରକେଲା ନୁହେଁ ପଶ୍ଚିମ ଓଡ଼ିଶାର ଜଣେ ଜଣାଶୁଣା ଉପସ୍ଥାପିକା ଭାବେ ବେଶ୍ ପରିଚିତ ଥିଲେ। ନାରୀମାନଙ୍କୁ ଆଗକୁ ବଢ଼ିବା ଓ ସେମାନଙ୍କ ଲୁକ୍କାୟିତ ପ୍ରତିଭାକୁ ଆଗକୁ ଆଣିବାକୁ ସେ ନିଜେ ଗଠନ କରିଥିଲେ ମହିଳା ସଙ୍ଗଠନ ‘ମମତା’ । ସେ ସହରର ପ୍ରତିଷ୍ଠିତ ଅନୁଷ୍ଠାନ ଆଦର୍ଶ ପାଠାଗାରର ଉପସଭାନେତ୍ରୀ ଥିଲେ । ଏଥିସହ ଉତ୍କଳ ସାଂସ୍କୃତିକ ପରିଷଦ, ରାଉରକେଲା କଳାକାର ଆସୋସିଏସନ୍, ଓଡ଼ିଶା ମ୍ୟୁଜିକ୍ ଆର୍ଟିଷ୍ଟ ୱେଲଫେୟାର ଆସୋସିଏସନ୍, ଆସ୍ଥା, ୟୁଥ ଭାଇବ୍ରେସନ୍, ୟୁଥ ମୁମ୍ଭେମେଣ୍ଟ ଫେଡେରେସନ୍ ଅଫ୍ ଇଣ୍ଡିଆ ସମେତ ସହରର ଶତାଧିକ ସାଂସ୍କୃତିକ ଓ ସାମାଜିକ ସଙ୍ଗଠନର ଜଣେ ସକ୍ରିୟ ସଦସ୍ୟା ଥିଲେ ।
ସହରର ପ୍ରତ୍ୟେକ ରାଜନୈତିକ, ସାମାଜିକ, ସାଂସ୍କୃତିକ ସଙ୍ଗଠନ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଉପସ୍ଥାପନା କରିବାକୁ ତାଙ୍କୁ ଖୋଜାପଡିଥାଏ । ତାଙ୍କର ଗୀତ, ଉପସ୍ଥାପନା ଶୈଳୀ ସେ କେବଳ ରାଉରକେଲା ନୁହେଁ ରାଜ୍ୟରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରି ପାରିଥିଲେ । ରାଉରକେଲା, ସୁନ୍ଦରଗଡ ସମେତ ରାଜ୍ୟ ଏବଂ ରାଜ୍ୟ ବାହାରୁ ଅନେକ ପୁରସ୍କାର, ସମ୍ମାନ ସାଉଣ୍ଟିଥିଲେ। ସ୍ବର୍ଗତ ମିନାକ୍ଷୀ ଧର ରାଉରକେଲା ଶକ୍ତିନଗରରେ ସ୍ବାମୀ ନଳିନୀକାନ୍ତ ଓ ଦୁଇ ଝିଅ ପୁଜା ଓ ପ୍ରାଚୀଙ୍କ ସହ ରହୁଥିଲେ ।