ଅକ୍ଟୋବର ୨୪ରେ ବିଜେପୁର ପାଇବ ନୂଆ ବିଧାୟକ। ଉପନିର୍ବାଚନ ପାଇଁ ବାଜିଲା ବିଗୁଲ୍। ଅକ୍ଟୋବର ୨୧ରେ ପଡିବ ଭୋଟ୍, ୨୪ରେ ଗଣତି

କନକ ବ୍ୟୁରୋ: ବାଜିଲା ବିଜେପୁର ନିର୍ବାଚନୀ ବିଗୁଲ । ଆସନ୍ତା ଅକ୍ଟୋବର ୨୧ ତାରିଖରେ ବିଜେପୁରରେ ଉପନିର୍ବାଚନ ପାଇଁ ମତଦାନ ହେବ । ତିନି ଦିନ ପରେ ଅର୍ଥାତ୍ ୨୪ ତାରିଖରେ ଭୋଟ୍ ଗଣତି କରାଯିବ । ଏହିଦିନ ସ୍ପଷ୍ଟ ହୋଇଯିବ, ନବୀନ ଖାଲି କରିଥିବା ଆସନ କାହା ହାତକୁ ଯାଉଛି? ବିଜେଡି, ବିଜେପି ନା କଂଗ୍ରେସ ? ପାଟକୁରା ପରେ ବିଜେପୁରକୁ ନେଇ ସରଗରମ ରାଜ୍ୟ ରାଜନୀତି । ତିନି ଦଳ ମଧ୍ୟରେ କସରତ ଆରମ୍ଭ ହୋଇସାରିଥିବା ବେଳେ ପ୍ରାର୍ଥୀ କିଏ ହେବ ଏବେ ତାଉପରେ ରହିଛି ସମସ୍ତଙ୍କ ନଜର ।

କିଏ ଦଖଲ କରିବ ବିଜେପୁର? ବିଜୟ ବାନା ଉଡାଇ ପାରିବ କି ବିଜେଡି? ନା ବିଜୟ ବାନା ଉଡାଇବେ ବିଜେପି କିମ୍ବା କଂଗ୍ରେସ? ବିଜେପୁର ଉପନିର୍ବାଚନ ପାଇଁ ତାରିଖ ଘୋଷଣା ସହ ରାଜନୈତିକ ଉଷ୍ମତା ବଢିଛି ଓ ଅଙ୍କକଷା ଆରମ୍ଭ ହୋଇଯାଇଛି, ପଶ୍ଚିମ ଓଡିଶାର ଏହି ଆସନ କାହା ଖାତାକୁ ଯିବ? ହୁଏତ ସଂଖ୍ୟା ଦୃଷ୍ଟି କୋଣରୁ ଏହା ସେତେଟା ପ୍ରଭାବ ରଖୁନି ହେଲେ ପତିଆରାର ଲଢେଇରେ ଏହା ସମ୍ମାନର ପ୍ରଶ୍ନ ପାଲଟିଛି ।

ଗତ ୨ଟି ନିର୍ବାଚନରେ ପ୍ରତି ରାଜନୈତିକ ଦଳ ବିଜେପୁରରେ ସେମାନଙ୍କ ପ୍ରାର୍ଥୀ ପରିବର୍ତ୍ତନ କରିଥିବା ବେଳେ ଏଥର କାହାକୁ ମୈଦାନକୁ ଓହ୍ଲାଇବ କେଉଁ ଦଳ ସେନେଇ ଅଙ୍କକଷା ଆରମ୍ଭ ହୋଇଛି । ବିଜେଡି ପୁଣି ରୀତାଙ୍କୁ ପ୍ରାର୍ଥୀ କରିବ କି? କଂଗ୍ରେସ କଣ ପୁଣି ରୀପୁନାଥ ସେଠଙ୍କୁ ଭରସିବ କି? ବିଜେପି କାହା ନାଁରେ ମୋହର ମାରିବ? ସନତ ଗଡତିଆ ନା ଆଉ କାହାକୁ ସାମ୍ନାକୁ ଆଣିବ?

ସାଧାରଣ ନିର୍ବାଚନ ପରେ ରାଜଧାନୀ ରାଜନୀତି ପାଟକୁରା ନିର୍ବାଚନକୁ ନେଇ ଗରମ ହୋଇଥିଲା ଆଉ ଏବେ ଆସିଛି ବିଜେପୁର ଉପ ନିର୍ବାଚନ । ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟରୁ ଦିଆଯାଇଥିବା ତଥ୍ୟ ଅନୁସାରେ ସେପଟେମ୍ବର ୨୩ରେ ନିର୍ବାଚନ ପାଇଁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ । ସେପଟେମ୍ବର ୩୦ ନାମାଙ୍କନ ଶେଷ ତାରିଖ ଥିବା ବେଳେ ଅକଟୋବର ୨୧ରେ ଭୋଟ ଏବଂ ୨୪ରେ ଗଣତି କରାଯିବ । ଆଉ ଏହିଦିନ ସ୍ପଷ୍ଟ ହେବ, ନବୀନ ଖାଲି କରିଥିବା ଆସନ କାହାକୁ ହାତକୁ ଯାଉଛି?

ଏବେ ନଜର ପକାନ୍ତୁ ଗତ ୨ଟି ନିର୍ବାଚନରେ କିଭଳି ଥିଲା ବିଜେପୁରରେ ଭୋଟିଂରେ ଟ୍ରେଣ୍ଡ । ୨୦୧୯ ସାଧାରଣ ନିର୍ବାଚନରେ ବିଜେଡି ପ୍ରାର୍ଥୀ ନବୀନ ପଟ୍ଟନାୟକ ଏହି ଆସନରୁ ୧ ଲକ୍ଷ ୧୦ ହଜାର ୬୦୪ ଭୋଟ ପାଇଥିବା ବେଳେ ବିଜେପି ପ୍ରାର୍ଥୀ ସନତ ଗଡତିଆ ୫୩ ହଜାର ୪୮୨ ଭୋଟ ଓ କଂଗ୍ରେସ ପ୍ରାର୍ଥୀ ରୀପୁନାଥ ସେଠ ୧୪ ହଜାର ୩୪୪ ଭୋଟ ପାଇଥିଲେ । ୨୦୧୮ ଉପ ନିର୍ବାଚନରେ ବିଜେଡିକୁ ୧ ଲକ୍ଷ ୨ ହଜାର ୮୭୧ ଭୋଟ ପାଇଥିବା ବେଳେ ବିଜେପି ୬୦ ହଜାର ୯୩୯ ଏବଂ କଂଗ୍ରେସ ୧୦ ହଜାର ୨୭୪ ଭୋଟ ପାଇଥିଲା । ଏହି ଧାରା ଆଗାମୀ ଉପ ନିର୍ବାଚନରେ ବଜାୟ ରହୁଛି ନା ଏଥିରେ ବଡ ଫରକ ଆଣିବା ପାଇଁ ନୂଆ ରଣନୀତି ଅଣାଯାଉଛି, ତାକୁ ନେଇ ଏବେ ଚର୍ଚ୍ଚା ।