ରାତି ପାହିଲେ ପିପିଲି ଉପନିର୍ବାଚନ । ବିଧାୟକ ବାଛିବେ ପିପିଲିବାସୀ, ସକାଳ ୭ରୁ ମତଦାନ ।
କନକ ବ୍ୟୁରୋ : କାଲି ପଡିବ ପିପିଲି ଭୋଟ୍ । କରୋନାକୁ ଆଖି ଆଗରେ ରଖି ବୁଥରେ ସ୍ୱତନ୍ତ୍ର ବ୍ୟବସ୍ଥା ହୋଇଛି । ସମ୍ବେଦନଶୀଳ ବୁଥରେ ବ୍ୟାପକ ପୋଲିସ ମୁତୟନ କରାଯିବା ସହ ପୂରା ବ୍ୟବସ୍ଥାକୁ ସିସିଟିଭିର ନଜରରେ ରଖାଯାଇଛି । ହେଲେ ଏସବୁ ଭିତରେ କିନ୍ତୁ ରାଜନୀତି ଥମି ନାହିଁ । କେନ୍ଦ୍ରୀୟ ଫୋର୍ସ ମୁତୟନ ନେଇ ମୁହାଁମୁହିଁ ହୋଇଛନ୍ତି ବିଜେଡି ଓ ବିଜେପି ।
Kanak News is now on WhatsApp
Join and get latest news updates delivered to you via WhatsApp
ରାତି ପାହିଲେ ପିପିଲି ଉପନିର୍ବାଚନ । ବିଧାୟକ ବାଛିବେ ପିପିଲିବାସୀ । ନିର୍ବାଚନ ପାଇଁ ପୋଲିଂ ବୁଥରେ ପୋଲିଂ ପାର୍ଟି ପହଞ୍ଚି ସାରିଛନ୍ତି । ଇଭିଏମ ମେସିନ ସହ ଭୋଟ ଗ୍ରହଣ ପାଇଁ ଅନ୍ୟାନ୍ୟ ଆବଶ୍ୟକ ସାମଗ୍ରୀ ପ୍ରସ୍ତୁତ କରି ରଖିଛନ୍ତି । ରାତି ପାହିଲେ ନେତା ବାଛିବେ ପିପିଲିର ୨ଲକ୍ଷ ୨୯ ହଜାର ଭୋଟର । ସକାଳ ୭ଟାରୁ ଆରମ୍ଭ ହେବ ମତଦାନ । ଦିବ୍ୟାଙ୍ଗ ଭୋଟରଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବାବେଳେ ୨୦ଟି ଆଦର୍ଶ ମତଦାନ କେନ୍ଦ୍ର କରାଯାଇଛି ।
ନିର୍ବାଚନ ପାଇଁ ସୁରକ୍ଷା କଡାକଡି । ୩୪୮ ରୁ ୧୭୫ ସମ୍ବେଦନଶୀଳ ବୁଥ୍ । ଉପନିର୍ବାଚନ ପାଇଁ ମୋଟ ୩୪୮ଟି ବୁଥରେ ମତଦାନ ହେବ । ସେଥିରୁ ୧୭୫ଟି ସମ୍ବେଦନଶୀଳ ତାଲିକାରେ ରହିଛି । ୧୦୨ଟି ଅତି ସମ୍ବେଦନଶୀଳ ଓ ୭୩ଟି ସମ୍ବେଦନଶୀଳ ତାଲିକାରେ ରହିଛି । ୧୭୫ ବୁଥରୁ ମତଦାନର ସିଧାପ୍ରସାରଣ କରିବାକୁ ନିଷ୍ପତ୍ତି ନେଇଛି ପ୍ରଶାସନ । ସେହିପରି ପୋଲିଂ ବୁଥ୍ ଗୁଡିକରେ ସିସିଟିଭି କ୍ୟାମେରା ଲଗାଯାଇଛି । ନିର୍ବାଚନକୁ ଶୃଙ୍ଖଳିତ କରିବା ପାଇଁ ୧୯୮୩ ସୁରକ୍ଷାକର୍ମୀ ଓ ୩୨ ମୋବାଇଲ୍ ଟିମ ନିୟୋଜିତ ହୋଇଛନ୍ତି । ସମ୍ବେଦନଶୀଳ କେନ୍ଦ୍ର ଓ ଅତିସମ୍ବେଦନଶୀଳ କେନ୍ଦ୍ର ଗୁଡିକରେ ଅର୍ଦ୍ଧସାମରିକ ବାହିନୀ ଓ ସଶସ୍ତ୍ର ପୋଲିସ ମୂତୟନ କରାଯାଇଛି ।
କେନ୍ଦ୍ରୀୟ ଫୋର୍ସ ମୂତୟନ ନେଇ ମୁହାଁମୁହିଁ । ପିପିଲି ଉପନିର୍ବାଚନ ସମୟରେ ୯୭ଟି ସମ୍ବେଦନଶୀଳ ଓ ଅତି ସମ୍ବେଦନଶୀଳ ବୁଥରେ ସୁରକ୍ଷା ବ୍ୟବସ୍ଥା ନେଇ ସିଇଓଙ୍କୁ ଭେଟି ଦାବି ଜଣାଇଛି ବିଜେପି । କେନ୍ଦ୍ରିୟ ଫୋର୍ସ ତଥା ପାରା ମିଲିଟାରୀ ଫୋର୍ସ ମୁତୟନ ଦାବିରେ ଗତକାଲି ବିଜେପିର ୭ ଜଣିଆ ଟିମ୍ ସିଇଓଙ୍କୁ ଭେଟି ଦାବି ଜଣାଇଥିଲେ । ସେପଟେ ଏହି ପ୍ରସଙ୍ଗକୁ ନେଇ ପ୍ରତିକ୍ରିୟା ରଖିଛି ବିଜେଡ଼ି । ବିଜେଡ଼ି କହିଛି ରାଜନୈତିକ ଷ୍ଟଣ୍ଟ ତଥା ଡ୍ରାମା କରୁଛି ବିଜେପି ।
ଭୋଟରଙ୍କ ପାଇଁ ବୁଥରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ମତଦାତା ଭୋଟ ଦେବା ପୂର୍ବରୁ ସେମାନଙ୍କୁ ଗ୍ଲୋବସ ଦିଆଯିବ ଓ ଭୋଟ୍ ଦେବା ପରେ ମେସିନର ସାନିଟାଇଜ୍ କରାଯିବ । ତାପରେ ଆଉ ଜଣେ ଭୋଟର ଭୋଟ ଦେବେ । ସେହିପରି ଯେଉଁମାନଙ୍କ ନିକଟରେ କରୋନାର କିଛି ଲକ୍ଷଣ ଥିବ ସେମାନେ ଶେଷ ମୂହୂର୍ତ୍ତରେ ଭୋଟ ଦେବାକୁ ନିଷ୍ପତ୍ତି ହୋଇଛି ।