୧୯୯୯ ମହାବାତ୍ୟା ପରେ ଓଡିଶାରେ ଲ୍ୟାଣ୍ଡଫଲ୍ କରିବ ସବୁଠୁ ବଡ ବାତ୍ୟା! ଜାଣନ୍ତୁ କିଭଳି ସଜାଗ ରହିଛନ୍ତି ସରକାର ଓ ସେନା ।
କନକ ବ୍ୟୁରୋ : ୧୯୯୯ ମହାବାତ୍ୟା ପରେ ପୁଣିଥରେ ଆଉ ଏକ ବଡ ବାତ୍ୟାର ସାକ୍ଷୀ ପାଲଟିବାକୁ ଯାଉଛି ଓଡିଶା । ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ଫୋନି ଭୟଙ୍କର ରୂପ ଧରି ଓଡିଶା ଉପକୂଳ ଆଡକୁ ମାଡି ଆସୁଛି । ଆସନ୍ତାକାଲି ସକାଳ ୮ଟାରୁ ୧୦ଟା ମଧ୍ୟରେ ବାତ୍ୟା ଫୋନି ପୁରୀ ଠାରେ ଲ୍ୟାଣ୍ଡଫଲ୍ କରିବ । ଏହାପୂର୍ବରୁ ଜଏଣ୍ଟ ଟାଇଫୁନ ୱାର୍ଣ୍ଣିଂ ସେଣ୍ଟର ଫୋନିକୁ ନେଇ ବଡ ବୟାନ ଦେଇଛି । ୧୯୯୯ରେ ଓଡିଶାରେ ଧ୍ୱଂସର ତାଣ୍ଡବଲୀଳା ରଚିଥିବା ମହାବାତ୍ୟା ପରେ ଫୋନି ସବୁଠୁ ବଡ ବାତ୍ୟା ଭାବେ ଓଡିଶା ଉପକୂଳରେ ଲ୍ୟାଣ୍ଡଫଲ୍ କରିବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଭୟଙ୍କର ବାତ୍ୟା ୧୧ଟି ଜିଲ୍ଲାରେ ନିଜର ସାଂଘାତିକ ପ୍ରକୋପ ଦେଖାଇବ ବୋଲି ପାଣିପାଗ ବିଭାଗ ପକ୍ଷରୁ ସର୍ତକ କରାଯାଇଛି । ଓଡିଶାର ଉପକୂଳବର୍ତ୍ତୀ ଜିଲ୍ଲା, ପୁରୀ, ଜଗତସିଂହପୁର, କେନ୍ଦ୍ରାପଡା, ଭଦ୍ରକ, ବାଲେଶ୍ୱର, ଗଜପତି, ମୟୂରଭଞ୍ଜ, ଗଞ୍ଜାମ,ଖୋର୍ଦ୍ଧା, କଟକ ଓ ଯାଜପୁରରେ ଫୋନି ନିଜର ଫଣା ମେଲାଇବ । ଏହାଛଡା ରାଜ୍ୟର ଆଉ କିଛି ଜିଲ୍ଲାରେ ମଧ୍ୟ ଫୋନିର ପ୍ରଭାବ ଦେଖିବାକୁ ମିଳିବ । ଯେଉଁଥିପାଇଁ ଏହି ଜିଲ୍ଲା ଗୁଡିକ ଉପରେ ମଧ୍ୟ ସର୍ତକ ଦୃ୍ଷ୍ଟି ରଖାଯାଇଛି । ଭାରତୀୟ ପାଣିପାଗ ବିଭାଗର ସୂଚନା ଅନୁଯାୟୀ, ଫୋନି ଲ୍ୟାଣ୍ଡଫଲ କରିବା ପୂର୍ବରୁ ଏହି ଜିଲ୍ଲା ଗୁଡିକରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ । ଯାହା ଏବେଠୁ ଆରମ୍ଭ ହୋଇ ସାରିଛି । ଏହାବାଦ୍ ଫୋନି ଲ୍ୟାଣ୍ଡଫଲ କରିବା ବେଳେ ପବନର ବେଗ ଘଣ୍ଟାପ୍ରତି ୧୭୦ରୁ ୧୮୦ କିଲୋମିଟର ରହିବ । ଏପରିକି କିଛି ସ୍ଥାନରେ ଏହା ୨୦୦ କିଲୋମିଟର ପାର କରିବ ବୋଲି ପାଣିପାଗ ବିଭାଗ ପକ୍ଷରୁ ସର୍ତକ ସୂଚନା ଜାରି କରାଯାଇଛି । ତେଣୁ ଫୋନି ଲ୍ୟାଣ୍ଡଫଲ୍ କରିବା ସମୟରେ ଘରୁ ନ ବାହାରିବାକୁ ଲୋକଙ୍କୁ ପରାମର୍ଶ ଦେଇଛନ୍ତି ରାଜ୍ୟ ସରକାର ।
ଫୋନି ପାଇଁ ପ୍ରସ୍ତୁତି :
– ପୁରୀ ଉପକୂଳରେ ଫୋନି ପହଞ୍ଚିବା ପୂର୍ବରୁ ଉଭୟ ରାଜ୍ୟ ଓ କେନ୍ଦ୍ର ସରକାର ମଧ୍ୟ ତତ୍ପର ହୋଇ ଉଠିଛନ୍ତି । ବାତ୍ୟା ଫୋନି ପାଇଁ ଭାରତୀୟ ବାୟୁସେନା ଓ ନୌସେନାକୁ ଆଲର୍ଟ କରାଯାଇଛି । ଏହାଛଡା ଏନଡିଆରଏଫ ଓ ଓଡିଆରଏଫ ଟିମକୁ ମଧ୍ୟ ପ୍ରଭାବିତ ହେବାକୁ ଥିବା ଜିଲ୍ଲା ଗୁଡିକରେ ମୁତୟନ କରାଯାଇଛି ।
– ସମସ୍ତ ସ୍କୁଲ ଓ କଲେଜକୁ ଆଗାମୀ ୩ ଦିନ ପର୍ଯ୍ୟନ୍ତ ଛୁଟି ଘୋଷଣା କରାଯାଇଛି । ପାଖାପାଖି ୧୧ ଲକ୍ଷ ଲୋକଙ୍କୁ ଅନ୍ୟ ସ୍ଥାନକୁ ସ୍ଥାନାନ୍ତର କରାଯିବ ।
– ଏନଡିଆରଏଫର ୨୮ଟି ଟିମକୁ ଓଡିଶାରେ ନିୟୋଜିତ କରାଯାଇଥିବା ବେଳେ ୩୦ ଟିମକୁ ଷ୍ଟାଣ୍ଡବାଇରେ ରଖାଯାଇଛି । ବାତ୍ୟା ପରେ ପରିସ୍ଥିତିକୁ ଦୃଷ୍ଟିରେ ରଖି ଏମାନଙ୍କୁ ପ୍ରଭାବିତ ଅଞ୍ଚଳକୁ ଛଡାଯିବ ।
– ଫୋନିର ମୁକାବିଲା ପାଇଁ ବାୟୁସେନାର ଚେତକକୁ ମଧ୍ୟ ପ୍ରଭାବିତ ଅଞ୍ଚଳରେ ରିଲଫ୍ ପାଇଁ ମୁତୟନ କରାଯିବ ।
– ଫୋନିକୁ ଦୃଷ୍ଟିରେ ରଖି ଇଷ୍ଟକୋଷ୍ଟ ରେଲୱେ ମଧ୍ୟ ଭୁବନେଶ୍ୱର ଓ ପୁରୀ ଦେଇ ଯାତାୟତ କରୁଥିବା ସମସ୍ତ ଟ୍ରେନକୁ ବାତିଲ କରାଯାଇଛି ।